14 வயது சிறுமியின் நிர்வாணப் படங்கள்: இழப்பீடு தர முகநூலுக்கு உத்தரவு!

World
Typography

பெல்பாஸ்ட், ஜன.13- பழிவாங்கும் நோக்கத்தில் 14 வயதுடைய சிறுமியின் நிர்வாணப் புகைப்படங்கள்  முகநூல் பக்கத்தில்  வெளியானது தொடர்பில் நடந்த வழக்கில் அந்தச் சிறுமிக்கு முகநூல் நிறுவனம் இழப்பீடு வழங்கவேண்டும் என்று வட அயர்லாந்து நீதிமன்றம் முடிவு கூறியுள்ளது.

எனினும், இழப்பீட்டுத் தொகை எவ்வளவு என்பது வெளியிடப்படவில்லை. இந்தத் தீர்ப்பு வழக்கத்திற்கு மாறான ஒன்று என வர்ணிக்கப்பட்டது. 

இந்த வழக்கின் முடிவில் இழப்பீடு குறித்து தங்களுக்கிடையே பேசி முடித்துக் கொள்ள முகநூல் நிறுவனம் இணக்கம் தெரிவித்ததாக அந்தச் சிறுமியின் வழக்கறிஞர் பியர்சி மாக்டெர்மோட் தெரிவித்தார். 

தனிப்பட்ட நபர்களின் தகவல் மற்றும் ஆவணங்களைத் துஷ்பிரயோகம் செய்தகாக இங்குள்ள உயர் நீதிமன்றத்தில் அந்தச் சிறுமியின் சார்பில் வழக்கு தொடுக்கப்பட்டது.

கடந்த 2014 ஆம் ஆண்டுக்கும் 2016ஆம் ஆண்டுக்கும் இடையே அந்தச் சிறுமியின் நிர்வாணப் படங்கள்  முகநூலில் பதிவேற்றம் செய்யப்பட்டுள்ளன. மேலும் இந்தப் புகைப்படங்கள் பதிவேற்றம் செய்யப்படுவதற்கு பழிவாங்கும் நோக்கமே காரணம் என்பதோடு, சம்பந்தப்பட்ட சிறுமி இந்தப் புகைப்படங்கள் காரணமாக பலமுறை அச்சுறுத்தப் பட்டிருப்பதாகவும் நீதிமன்றத்தில் கூறப்பட்டது.

இழப்பீடு வழங்கவேண்டும் என்ற நீதிமன்றத்தின் முடிவு, மேலும் இது போன்ற பல வழக்குகள் போடப்படுவதற்குக் காரணமாக அமையக்கூடும் என எதிர்பார்க்கப்படுகிறது.

முகநூல் நிறுவனம் பொறுப்புள்ள அமைப்பாக செயல்பட்டு, தனது தொழில்நுட்ப வசதியைப் பயன்படுத்தி இதுபோன்ற பதிவுகளை அகற்றியிருக்க வேண்டும் என்று வழக்கறிஞர் பியர்சி வலியுறுத்தினார். ஒவ்வொரு மாதமும் இதுபோன்று பழிவாங்கும் நோக்கத்தில் 51,300 சம்பவங்கள் நடந்து வருவதாக தகவல்கள் கூறுகின்றன.

 

 

 

BLOG COMMENTS POWERED BY DISQUS