Top Stories

டெல் அவீவ், மே.23- இஸ்ரேல் அதிபர் மற்றும் பிரதமருக்கு முன்னால் கைக்கொடுக்க முயன்ற டிரம்பின் கையை அவரது மனைவி மெலானியா தட்டிவிட்டு அவமானப்படுத்தியது இணையத்தில் வைரலாகி பரபரப்பை ஏற்படுத்தி உள்ளது.

அமெரிக்க அதிபர் டிரம்ப்புடன் அவரது மனைவியும், அமெரிக்காவின் முதல் பெண்மணியுமான மெலானியா இருவரும் வெளிநாட்டு சுற்றுப்பயணம் மேற்கொண்டுள்ளனர். முதல் சுற்றுப்பயண தளமாக சவுதி அரேபியாவிற்கு சென்ற டிரம்ப் அதனைத் தொடர்ந்து இஸ்ரேல் மற்றும் பாலஸ்தீனாவிற்கு பயணம் மேற்கொள்ள டெல் அவிவ் நகர விமான நிலையத்தில் தரையிறங்கினார்.

### காணொளி; நன்றி: ODN ###

டெல் அவீவ் விமான நிலையத்தில் தரையிறங்கிய டிரம்ப் தம்பதியரை இஸ்ரேல் அதிபரும், பிரதமரும் சிறப்பாக வரவேற்றனர்.

இதனைத் தொடர்ந்து நடைபெற்ற அரச நெறிமுறையின் போது டிரம்ப் கைக்கொடுக்க முயன்ற போது மெலானியா அவரது கையைத் தட்டிவிட்டார். இந்த காட்சி வீடியோக்களில் பதிவாகி, தற்போது இணையத்தில் வைரலாக பரவியுள்ளது.

டிரம்ப் அமெரிக்க அதிபராக பொறுப்பேற்று கொண்ட நாள் முதல், அவருக்கும் மெலானியாவிற்கும் இடையே கருத்து வேறுபாடு உள்ளதாக கூறப்பட்டு வருவது குறிப்பிடத்தக்கது.

லண்டன், மே.23- லண்டன் பேருந்து நிலைய வளாகத்தில் கிடந்த மர்ம மூட்டையால் வெடிகுண்டு பீதி ஏற்பட்டத்தை அடுத்து அப்பேருந்து நிலையம் மூடப்பட்டுள்ளது.

விக்டோரியா கோச் பேருந்து நிலைய வளாகத்தில் மர்ம மூட்டை ஒன்று இருப்பதைக் கண்டறிந்த போலீசார் பொதுமக்களை அப்பகுதியிலிருந்து வெளியேற்றி உடனே பேருந்து நிலையத்தை மூடிவிட்டனர். தற்போது அந்த மர்ம மூட்டையை போலீசார் சோதனையிட்டு வருகின்றனர்.

மான்செஸ்டர் பகுதியில் ஒரு இசை நிகழ்ச்சியின் போது நடந்த தீவிரவாத தாக்குதலைத் தொடர்ந்து விக்டோரியா கோச் நிலையத்திலும் மர்ம மூட்டை இருந்தது மக்களிடையே பீதியை ஏற்படுத்தியுள்ளது.

மான்செஸ்டரில் நடந்த வெடிகுண்டு தாக்குதலில் குழந்தைகள் உட்பட 22 பேர் உயிரிழந்துள்ளனர். மேலும் 59 பேர் பலத்த காயங்களுக்கு ஆளாயினர். 

தனது இசை நிகழ்ச்சியில் இந்த வெடிகுண்டு தாக்குதல் நடந்ததால் தற்போது மற்ற இடங்களில் நடக்க திட்டமிடப்பட்டிருந்த மற்ற இசை நிகழ்ச்சிகளையும் அரியானா கிராண்டே ஒத்திவைத்துள்ளார்.

அதுமட்டுமின்றி ஜூன் மாதம் 8ஆம் தேதி நடைபெறவவிருந்த பொதுத் தேர்தலையும் பிரதமர் தெரேசா மே ஒத்திவைத்துள்ளார்.

கைரோ, மே 23 - மான்செஸ்டரில் நடைபெற்ற அமெரிக்காவின் பிரபல  பாடகர் அரீனாகிராண்டேயின் இசை நிகழ்ச்சியில் நடந்த வெடிகுண்டு தாக்குதல் தொடர்பாக ஐ.எஸ் ஆதரவாளர்கள் தங்கள் சமூக வலைத்தளங்களில் பதிவேற்றம் செய்து கொண்டாடியுள்ளனர். 

டிவிட்டர் வலைத்தளத்தில் இத்தாக்குதலைக் கொண்டாடி பலர் கருத்து தெரிவித்துள்ளனர். இது தீவிரவாதிகள் நடத்திய தாக்குதலாக இருக்கலாம் என போலீசார் கூறியுள்ளனர். ஆனால், இந்தப் பயங்கர தாக்குதலுக்கு யாரும் இதுவரை பொறுப்பேற்கவில்லை.

இசை நிகழ்ச்சி முடியும் தருவாயில், உள்ளூர் நேரப்படி இரவு 10.30 மணிக்கு இந்த தாக்குதல் நடந்ததாகச் சம்பவத்தின் போது அங்கிருந்தவர்கள் கூறினர். இச்சம்பவத்தில் 19 பேர் உயிரிழந்தனர். 50க்கும் மேற்பட்டோர் படுகாயம் அடைந்தனர். 

 

 மான்செஸ்ட்டர். மே.23- இங்குள்ள இசை அரங்கத்தில் நடந்த வெடிகுண்டுத் தாக்குதலில் 19 அப்பாவிகள் பலியான அதிர்ச்சியில் உறைந்து போயிருக்கும் இங்கிலாந்து அடுத்த மாதம் நடைபெறவிருக்கும் பொதுத்தேர்தல் பிரசாரங்களை தற்காலிகமாக ரத்து செய்துள்ளது.

பிரபல பாடகி அரியனா கிரேண்ட்டின் இசைநிகழ்ச்சி நடந்து கொண்டிருந்த மான்செஸ்ட்டர் அரங்கத்தின் நுழைவாயில் அருகே குண்டுவெடித்தது. இந்த பயங்கரவாதத் தாக்குதல் இதுவரை 19 பேர் மாண்டுள்ளனர். இவர்களில் பெரும்பாலோர் இளையோர்கள் எனபது குறிப்பிடத்தக்கது. மேலும் 60க்கும் அதிகமானோர் படுகாயமடைந்தனர். 

பிரிட்டனை அதிர்ச்சிக்கும் துயரத்திற்கு உள்ளாக்கிய இந்தச் சம்பவத்தை அடுத்து தேர்தல் பிரசாரங்களை இப்போதைக்கு ரத்து செய்வது என அரசாங்கம் முடிவு செய்துள்ளது.

இதுவொரு வெறுக்கத்தக்க சம்பவம் என பிரிட்டீஷ் பிரதமர் திரேசா மே குறிப்பிட்டத்தோடு, இதில் உயிர்நீத்தவர்களின் குடும்பத்தினருக்கு தம்முடைய இரங்கலைத் தெரிவித்துக் கொண்டார்.

எதிர்க்கட்சித் தலைவரான ஜெரெமி கொர்பைன், இந்தப் பயங்கரவாதத் தாக்குதல் தம்மை பெரும் அதிர்ச்சிக்கு உள்ளாக்கி  இருப்பதாகக் கூறினார். இதனை அடுத்து,  ஜுன் மாதம் 8ஆம் தேதி நடைபெறவிருக்கும் பொதுத்தேர்தலுக்கான பிரசாரங்கள் ரத்து செய்யப்படும் என்ற அறிவிப்பை ஆளுங்கட்சியின் பேச்சாளர் அதிகாரப்பூர்வமாக விடுத்தார்.

மான்செஸ்டர், மே 23- இங்கிலாந்தின் மான்செஸ்டர் நகரில் நடைபெற்ற பிரபல அமெரிக்க பாடகர் அரீனாகிராண்டேயின் இசை நிகழ்ச்சியில் பயங்கர வெடிகுண்டு வெடித்தது. இதில் 19 பேர் உயிரிழந்தனர். 

இது தீவிரவாதிகள் நடத்திய தாக்குதலாக இருக்கலாம் என போலீசார் கூறியுள்ளனர். தாக்குதல் சம்பவத்தில் 50க்கும் மேற்பட்டோர் படுகாயம் அடைந்தவேளை அவர்கள் உடனடியான மருத்துவமனைக்கு கொண்டுச் செல்லப்பட்டனர்.

இசை நிகழ்ச்சி முடியும் தருவாயில், உள்ளூர் நேரப்படி இரவு 10.30 மணிக்கு இந்த தாக்குதல் நடந்ததாக சம்பவத்தின்போது அங்கிருந்தவர்கள் கூறினர். கதவு வழியாக வெளியாகி கொண்டிருந்தபோது அரங்கம் உள்ளே பயங்கர சத்தம் கேட்டதாகவும் மக்கள் அலறியடித்து வெளியே ஓடியதாகவும் நிகழ்ச்சியில் பங்கேற்றவர்கள் கூறினர்.

இது தற்கொலை தாக்குதலா எனும் கோணத்தில் போலீசார் விசாரணை நடத்தி வருகின்றனர்.  

வான்கூவர், மே.22- கனடாவின் வான்கூவர் நகரிலுள்ள மீன்பிடி துறை ஒன்றில் வேடிக்கை பார்த்துக் கொண்டிருந்த சிறுமியை கடல் சிங்கம் ஒன்று திடீரெனப் பாய்ந்து கவ்வி, தண்ணீருக்குள் இழுத்துச் சென்ற சம்பவம் பெரும் அதிர்ச்சியை ஏற்படுத்தியுள்ளது.

சிறுமியை நீருக்குள் கடல் சிங்கம் இழுத்துச் செல்லும் காணொளி ஒன்று சமூக ஊடகங்களில் பரவி பரபரப்பை உருவாக்கி இருக்கிறது.

##  வீடியோ: நன்றி - Fedor Larsi

வான்கூவர் மீன் துறையில் கடல் சிங்கம் ஒன்று நீந்தித் திரிந்து கொண்டிருந்தது. அங்கு பலர் அதனை வேடிக்கை பார்த்துக் கொண்டிருந்த போது அதற்கு உணவுகளையும்  தந்து கொண்டிருந்தனர்.

அப்போது மீன்பிடித் துறையின் விளிம்பில் அமர்ந்து கொண்டு வேடிக்கை பார்த்துக் கொண்டிருந்த சிறுமியை பின்புறமிருந்து அவரது உடையைக் கவ்வி தண்ணீருக்குள் இழுத்துத் சென்றது.

திடீரென நடந்த இந்தச் சம்பவத்தினால் அங்கிருந்தவர்கள் அதிர்ந்து போயினர். எனினும், அங்கிருந்த ஒருவர்  தண்ணீருக்குள் பாய்ந்து அந்தச் சிறுமியை கடல் சிங்கத்திடமிருந்து காப்பாற்றினார். இந்தச் சம்பவத்தில் அதிர்ஷ்டவசமாக அந்தச் சிறுமி காயமடையவில்லை. 

இந்தக் காட்சியை வீடியோவில் பதிவு செய்திருந்த ஒருவர், அதனை சமூக ஊடகத்தில் பதிவேற்றம் செய்தார். ஏராளமான மக்கள் இதனை பார்த்துள்ளனர்.

இது பற்றிக் கருத்துரைத்த கடல் வாழ் பாலூட்டி இனங்களின் ஆராய்ச்சி மையத்தின் தலைவர் அண்ட்ரூ டிரிட்டெஸ், இது அந்த கடல்சிங்கத்தின் தவறு அல்ல என்று சுட்டிக்காட்டினார்.

கடல்சிங்கத்திற்கு பலர் உணவு அளித்துள்ளனர். அது ஆர்வத்துடன் உணவுகளைச் சாப்பிட்டுக் கொண்டிருந்த வேளையில், கரையை ஒட்டிய சுவரின் விளம்பில் அமர்ந்து அந்தச் சிறுமி வேடிக்கை பார்த்துக் கொண்டிருந்த போது சிறுமியின் ஆடையை, ஏதோ உணவுப் பொருள் என நினைத்து அது கவ்வியுள்ளது என்பது காணொளியில் காண முடிகிறது என்று அண்ட்ரூ சொன்னார். 

 

 

பேங்காக், மே 22- 2014ம் ஆண்டு இராணுவ புரட்சி நடந்ததை அடுத்து அதனை அனுசரித்து வரும் மூன்றாவது நாளான இன்று பேங்காக்கில் உள்ள மருத்துவமனையில் வெடிகுண்டு தாக்குதல் நடத்தப்பட்டது. இதில் நோயாளிகள் உட்பட 24 பேர் கடுமையான காயத்திற்கு ஆளாகியுள்ளனர்.

பேங்காக்கில் பணி ஓய்வு பெற்ற இராணுவ அதிகாரிகளுக்கான பிரபல மருத்துவமனை பிராமொங்குட்லோ. இங்கு இன்று வெடிகுண்டு தாக்குதல் நடத்தப்பட்டது. மருத்துவமனையில் பயங்கர சத்தம் கேட்டதை அடுத்து தாக்குதலில் காயமடைந்தவர்கள் அருகில் உள்ள வேறு மருத்துவமனைக்கு மாற்றப்பட்டுள்ளனர்.

வெடித்தது வெடிகுண்டு தான் என்பதை வெடிப்பொருள் ஆய்வு இலாகா உறுதிச் செய்துள்ளது. வெடிக்குண்டு தயாரிப்புக்கான பொருட்கள் சம்பவ இடத்தில் இருந்ததன் வழி இது உறுதிச் செய்யப்பட்டதாக போலீசார் கூறினர்.

சம்பவத்திற்கான காரணத்தையும் மருத்துவமனையில் பொருத்தப்பட்டிருந்த சிசிடிவி காணொளிகளையும் ஆராய்ந்து வருவதாக போலீசார் மேலும் கூறினர். தாக்குதல் தொடர்பில் யாரும் பொறுப்பேற்கவில்லை. 

 

 

பாரிஸ், மே.22- பிரான்சின் தலைநகரிலுள்ள ஓர்லி விமானநிலையத்தில் கைவிடப்பட்டுக் கிடந்த மர்மப் பையினால் கதிகலங்கிப் போன பாத்துகாப்புத் துறை அதிகாரிகள் விமானநிலயத்தை உடனடியாக மூடினர்.

முக்கிய விமான நிலயங்களில் ஒன்றான இந்த விமான நிலையத்தில்; பயணிகள் ஏராளமானோர் காத்திருந்த வேளையில் கேட்பாரற்ற நிலையில் மர்மப் பை ஒன்று கிடப்பதைக் கண்டனர். 

இது குறித்து பாதுகாப்புத் துறைக்கு தகவல் கொடுக்கப்பட்டது. கண்ணிமைக்கும் நேரத்தில் அங்கு பிரெஞ்சு இராணுவத்தினர் திபுதிபுவென வந்து குவிந்தனர். 

அந்த மர்மப் பை குறித்த சந்தேகம் வலுப்பெறவே, விமான நிலையத்தில் இருந்த பயணிகள் அனைவரும் வெளியேற்றப் பட்டனர். மேலும் விமானங்கள் திசைத் திருப்பி விட்டன. விமானநிலையம் தற்காலிகமாக மூடப்பட்டது.

விமான நிலையத்திற்குள் யாரும் அனுமதிக்கப்படவில்லை. இராணுவம் முழுக்க முழுக்க தனது கட்டுப்பாட்டில்  விமான நிலையத்தை வைத்துக் கொண்டது. 

பின்னர் வெடிகுண்டு நிபுணர்களால் அந்த மர்மப் பை முற்றாக பரிசோதிக்கப்பட்ட பின்னர், ஆபத்தான ஆயுதங்கள் எதுவும் இல்லை என்று உறுதிப்படுத்தப்பட்டது. பின்னர் சிறிது நேரத்தில் விமான நிலையம் மீண்டும் செயல்பட அனுமதிக்கப்பட்டது. 

கடந்த இரண்டு மாதங்களுக்கு முன்னர் இதே விமான நிலையத்தில்தான் பெண் போலீஸ் அதிகாரி ஒருவரிடமிருந்து துப்பாக்கியைப் பிடுங்க முயன்ற தீவிரவாதி ஒருவனை மற்ற போலீஸ்காரர்கள் தக்க தருணத்தில் சுட்டுவீழ்த்தினர் என்பது குறிப்பிடத்தக்கது.

 

காட்மண்டு, மே.22- எவரெஸ்ட் மலையை ஏறும் முயற்சியில் மூன்று பேர் உயிரிழந்ததோடு ஒருவர் காணாமல் போய்விட்டார். இரண்டு வருடங்களுக்கு முன்னர் பனிச்சரிவு ஏற்பட்டு 18 பேர் இறந்ததை அடுத்து, இதுவே மலை உச்சி பகுதியில் நிகழ்ந்த கோர சம்பவங்களாகும்.

அதுமட்டுமின்றி, கடந்த மூன்று தினங்களாக மலை உச்சியில் மாட்டிகொண்ட 12 பேரை தாங்கள் வான்மார்க்கமாகக் காப்பற்றியுள்ளதாக ஹெலிகாப்டர் மீட்புப் பணியினர் தெரிவித்தனர். 

எதிர்பாராத வானிலை மாற்றம், கடும் குளிர், பலத்த காற்று வீசும் காரணங்களால் இந்த முறை எவரெஸ்ட் மலை ஏறுவதற்கு பலர் கடும் சவால்களை எதிர் நோக்குகின்றனர்.

சுலோவாக்கியாவைச் சேர்ந்த விலாடிமீர் ஸ்ட்ராபா மற்றும் அமெரிக்காவைச் சேர்ந்த ரோலண்ட் யேர்வூட் இருவரும் மலையின் “மரண மண்டலம் (death zone)” எனப்படும் மலை உச்சியின் தெற்குப் பகுதியில் மூச்சு திணறல் ஏற்பட்டு உயிரிழந்தனர்.

எவரெஸ்ட் மலையின் திபெத் நாட்டுப் பகுதியில் ஆஸ்திரேலியாவைச் சேர்ந்த பிரான்செஸ்கோ மார்செத்தி கடும் குளிர் காரணமாக இறந்தார். மலை உச்சியை அடைந்த இவர், மலையிலிருந்து இறங்கும் போதே உயிரிழந்தார் என திபெத் மலையேறுபவர்கள் சங்கம் அறிவித்தது.

இந்தியாவின் உத்தர பிரதேசத்தைச் சேர்ந்த ஒருவர் மலையின் நாங்காவது முகாம் அருகே காணாமல் போனாதாகவும் அவரின் நேபாள வழிகாட்டி அதே முகாமில் மயக்க நிலையில் இருந்ததாகவும் கண்டுப்பிடிக்கப்பட்டுள்ளது. தொலை தொடர்பு சாதனங்கள் பழுதடைந்துள்ள நிலையில் அவரை தேடும் பணி மிகவும் கடினமாக இருப்பதாக மீட்புப் பணியினர் கூறினர்.

இந்த முறை எவெரெஸ்ட் மலை ஏறும் முயற்சியில் இதுவரை 200 பேர் மலை சிகரத்தை அடைந்துள்ளனர். ஜூன் இறுதிவரை மலை ஏறும் பருவமாக இருப்பதால் நூற்றுக்கணக்கான மலையேறுபவர்கள் எவரெஸ்ட் மலைக்கு வந்த வண்ணமாக உள்ளனர். இனியும் எந்தவித அசம்பாவிதங்கள் நடக்காமல் இருக்க மீட்புக் குழுவினர் எந்நேரமும் விழிப்போடு இருக்கின்றனர்.

நான்ஜிங், மே.22- சீனாவிலேயே மிகப் பழமையான நான்ஜிங் பல்கலைக்கழகம் தனது 115ஆவது ஆண்டு நிறைவை வித்தியாசமாகக் கொண்டாடியது. அந்தப் பல்கலைக்கழகத்தில் படித்த, படிக்கின்ற 115 ஜோடிகளுக்கு இலவசமாகத் திருமணம் செய்துவைத்தது. படிப்பும் தந்து, கல்யாணமும் செய்துவைத்த பல்கலைக் கழகத்தை மணமக்கள் பலர் மனதாரப் பாராட்டினர்.

1902ஆம் ஆண்டில் தொடங்கப்பட்ட இந்தப் பல்கலைக்கழகம் 115 ஆவது ஆண்டு நிறைவைக் கொண்டாடுவதற்கு ஒரு வித்தியாசமான வழியை ஆலோசித்தபோது 115 பல்கலைக்கழக மாணவ ஜோடிகளுக்கு திருமணம் செய்து வைக்கும் யோசனை பிறந்தது.

அதேவேளையில் இங்கு படித்த முன்னாள் மாணவர்கள் சிலர் தங்களுக்கும் ஒரு வாய்ப்புத் தரப்படவேண்டும் என்று கோரினார். அதேவேளையில் நான்ஜிங் பல்கலைக்கழகத்தில் பணிபுரியும் ஊழியர்கள் சிலரும் இதற்கு விண்ணப்பித்தனர்.

இந்த விண்ணப்பங்களில் இருந்து 115 ஜோடிகள் தேர்ந்தெடுக்கப்பட்டனர். இவர்களில் 57 ஜோடிகள் தற்போது பல்கலைக்கழகத்தில் படித்துக் கொண்டிருக்கும் மாணவ- மாணவிகள், 52 ஜோடி முன்னாள் மாணவ- மாணவிகள். எஞ்சிய 6 ஜோடி பல்கலைக்கழகத்தில் பணிபுரியும் ஊழியர்கள்.

கறுப்புநிற கோட்டுகள் அணிந்து மணமகன்களும் வெள்ளைநிற திருமண ஆடை அணிந்து தேவதைகளாக அணிவகுத்த மாணவிகளும் மோதிரங்கள் மாற்றிக்கொண்டு முத்தங்களை பகிர்ந்து கொண்ட காட்சி, சமூக ஊடகங்களில் அரங்கேறி சீனாவையே ஒரு கலக்கு கலக்கியிருக்கிறது.

காத்மாண்டு, மே 22- எவரெஸ்ட் சிகரத்தின் உச்சியை அடைவதற்கு முன்பு அமைந்திருக்கும் முக்கியமான, ஆபத்தான பகுதியாக கருதப்படும் ஹிலாரி முனை (Hillary Step) உடைந்து சரிந்துவிட்டதாக பிரிட்டிஸ் மலையேறி உறுதிப்படுத்தியுள்ளார். இதனால், எவரெஸ்ட் உச்சியை ஏறுவது ஆபத்தாகிவிட்டதாக கூறப்படுகிறது.

இமயமலையின் மிக உயரமான சிகரம் எவரெஸ்ட். உலகளவில் மலையேறிகளின் முதன்மை ஆசை இந்த எவரெஸ்ட் சிகரத்தை அடையவேண்டும் என்பது தான். இதற்காக ஆண்டுத்தோறும் நூற்றுக்கணக்கான மலையேறிகள் இமயமலைக்கு வருகின்றனர்.

இந்நிலையில், கடந்த 2015ம் ஆண்டு நேபாளத்தில் நடந்த நிலநடுக்கத்தில் முக்கிய முனையான ஹிலாரி முனை சரிந்து விட்டதாக கூறப்பட்டது. இருப்பினும், அடர்ந்த பனியால் அதனை உறுதிப்படுத்துவது இயலாத காரியமாக இருந்தது. 

இதற்கிடையில், ஆறாவது முறையாக எவரெஸ்ட் சிகரம் ஏறிய பிரிட்டிஸ் மலையேறி மோசடெல், ஹிலாரி முனை சரிந்து விட்டதைக் கண்டுப்பிடித்து உறுதிப்படுத்தினார். கடந்த சில ஆண்டுகளுக்கு முன் எடுத்த புகைப்படத்திற்கு அண்மையில் ஏறியபோது எடுத்த புகைப்படத்திற்கு இடையிலான வித்தியாசத்தைப் பார்த்து இதனை உறுதிச் செய்ததாக அவர் கூறினார். 

சிகரம் ஏறுவதற்கு முன் செங்குத்தாக இருக்கும் இந்த முனை ஆபத்தான பகுதி. கடைசி தடைக்கல்லாக கருதப்படும் இதனைத் தாண்டி விட்டால் சிகரத்தின் உச்சியை அடைந்து விடலாம். 1953ம் ஆண்டு எவரெஸ்ட் உச்சியை முதலில் வென்ற சர் எட்மண்ட் ஹிலாரியின் நினைவாக இந்த முனைக்கு அவரின் பெயர் இடப்பட்டது. 

வரலாற்று பெயர் கொண்ட இந்த முனை சரிந்ததைக் கண்டு தான் பெரும் வருத்தம் கொண்டதாக மோசடெல் கூறினார். வருத்தம் ஒருபக்கம் இருக்க, அம்முனை தற்போது ஆபத்தான இடமாக மாறிவிட்டதாக அவர் தெரிவித்தார். தற்போதுள்ள நிலையில், ஒருவர் பின் ஒருவராக மட்டுமே மேலே ஏறும் நிலை உள்ளதாகவும் ஒருவர் மேலே முழுமையாக ஏறிய பின்னரே மற்றவர் பின் செல்ல முடியும் எனவும் அவர் கூறினார். இதனால், அதிக குளிர்பகுதியில் வெகுநேரம் காத்திருக்கவேண்டிய சூழல் ஏற்படும். இது மலையேறிகளின் உயிருக்கு ஆபத்தாக கூட மாறும்.

 காட்மண்டு, மே.22- ஒரே வாரத்திற்குள் இரண்டுமுறை உலகின் உச்ச சிகரமான எவரெஸ்ட் சிகரத்தில் ஏறிச் சாதனை படைத்துள்ளார் இந்தியாவைச் சேர்ந்த 37 வயதுடைய அஞ்சு ஜாம்சென்பா.

கடந்த மே மதம் 16ஆம் தேதிதான் இவர் எரெஸ்ட்டை அடைந்து விட்டு தளத்திற்குத் திரும்பினார் குறுகிய நேர ஓய்வுக்குப் பின்னர் அவர் மீண்டும் எவரெஸ்ட்டை எட்டும் முயற்சியில் இறங்கினார்.

இன்று காலை 8 மணியளவில் 8,848 மீட்டர் உயரம் கொண்ட சிகரத்தை அவர் மீண்டும் அடைந்து புதிய சாதனையை ஏற்படுத்தினார்.

இரண்டு குழந்தைகளுக்கு தாயான ஜாம்சென்பா மலையேற்றத்தை தொடங்குவதற்கு முன்னர் திபெத்தின் ஆன்மீகத் தலைவரான தலாய் லாமாவிடம் ஆசிபெற்றார் என்பது குறிப்பிடத்தக்கது. 

ஏற்கெனவே ஐந்து முறை எவரெஸ்ட்டில் ஏறியுள்ள இவர், 2014 ஆம் ஆண்டு மற்றும் அதற்கு அடுத்த ஆண்டுகளில் இந்த சாதனையைப் படைக்கத் திட்டமிட்டிருந்தார். எனினும் அந்தக் காலக் கட்டத்தில் ஏற்பட்ட பனிச் சரிவு மற்றும் நிலநடுக்கம் காரணாமாக எவரெஸ்ட் ஏறுவது தடை செய்யப்பட்டிருந்தது.

 

 

 

Advertisement