விம்பிள்டன் அதிர்ச்சி: வீனஸை வீழ்த்தி முகுருசா சாம்பியன் ஆனார்!

உலக அரங்கம்
Typography

லண்டன், ஜூலை.17- விம்பிள்டன் மகளிர் டென்னிஸ் இறுதிப்போட்டியில் ஸ்பெயின் வீராங்கனை கர்பைன் முகுருசா சாம்பியன் பட்டம் வென்றுள்ளார்.

லண்டனில் நடந்து வந்த விம்பிள்டன் டென்னிஸ் பெண்களுக்கான ஒற்றையர் இறுதிப் போட்டியில் ஸ்பெயின் வீராங்கனை முகுருசாவும் அமெரிக்க வீராங்கனை வீனஸ் வில்லியம்சும் பலப்பரீட்சை நடத்தினர். முதல் செட்டில் இருவரும் சமநிலை வகித்தனர். 2 ஆவது செட்டில் அதிரடி தாக்குதலை நடத்திய முகுருசா அந்தச் செட்டை அபாரமாக கைப்பற்றினார்.

இறுதியில் 7-5, 6-0 என்ற நேர் செட்டுகளில் வீனஸை முகுருசா வீழ்த்தினார்.23 வயதாகும் முகுருசா இதற்கு முன் கடந்த ஆண்டு பிரெஞ்சு பொது டென்னிஸ் சாம்பியன் போட்டியில் பட்டத்தை கைப்பற்றியவராவார் கிராண்ட் ஸ்லாம் டென்னிஸ் போட்டிகளில் முகுருசாவின் 2 ஆவது வெற்றி இதுவாகும்.

முகுருசாவுடன் இதுவரை நேருக்கு நேர் மோதிய 4 ஆட்டங்களில், வீனஸ் வில்லியம்ஸ் மூன்றில் வெற்றி பெற்றுள்ளது குறிப்பிடத்தக்கது. எனவே, இந்த இறுதியாட்டத்தில் டென்னிஸ் உலகின் மூத்த வீராங்கனைகளில் ஒருவரான வீனஸ் எளிதாக வாகைசூடுவார் என்ற எதிர்பார்ப்பைத் தகர்த்து அதிர்ச்சியை ஏற்படுத்தினார் முகுருசா.
BLOG COMMENTS POWERED BY DISQUS