Top Stories

கோலாலம்பூர், ஏப்ரல்.15- ஆஸ்திரேலியாவின் கோல்டு கோஸ்ட் நகரில் நடந்து வரும் காமன்வெல்த் விளையாட்டில் பேட்மிண்டன் ஒற்றையர் ஆட்டத்தில் மலேசியாவின் மூத்த வீரர் டத்தோ லீ சோங் வெய்  தங்கப் பதக்கத்தை வென்று சாதனைப் படைத்தார்.  இறுதியாட்டத்தில் உலகின் முதல்நிலை ஆட்டக்காரராக விளங்கும் இந்தியாவின் ஶ்ரீகாந்தை 19-21, 21-14, 21-14 என்ற புள்ளிகளில்  லீ சோங் வெய் வீழ்த்தினார்.

36 வயதுடைய லீ சோங் வெய்க்கு இது 3ஆவது காமன்வெல்த் தங்கம் பதக்கம் என்பது குறிப்பிடத்தக்கது. 25 வயதுடைய ஶ்ரீகாந்திடம் முதல் செட்டில் 19-21 என்ற புள்ளிகளில் கடும் போராட்டத்திற்குப் பின்னர் லீ சோங்  வெய் வீழ்ச்சி கண்டாலும், அடுத்தடுத்த செட்டுகளில் அவர் அபாரமாக விளையாடி வெற்றியை நிலைநாட்டினார். 

இந்தக் காமன்வெல்த் போட்டியின் தொடக்கத்தில், குழு ரீதியிலான ஆட்டத்தின் போது ஶ்ரீகாந்திடம்  லீ சோங் வெய்  தோல்வி கண்டார் என்பதால், மலேசிய ரசிகர்கள் மத்தியில் இன்றைய ஆட்டத்தின் போது பதட்டமான சூழ்நிலையே நிலவி வந்தது. முதல் செட்டில் லீ சோங் வெய் தோல்வி கண்ட போது தங்கம் கைநழுவி விட்டதைப் போல ரசிகர்கள் உணர்ந்தனர்.

ஆனால், அசுர வேகத்தில் அந்தத் தோல்வியிலிருந்து மீண்டு, தம்முடைய அனுபவங்களை முன்நிறுத்தி இந்த அபாரமான வெற்றி லீ சோங் வெய் நிலைநிறுத்தி மலேசியாவின் 'தங்க மகன்' என்பதை நிருபித்தார்.

இதனிடையே பெண்களுக்கான ஒற்றையர் போட்டியின் இறுதியாட்டத்திற்கு இந்தியாவின் இரு வீராங்கனைகள் தேர்வு பெற்றிருந்த நிலையில், மூத்த வீராங்கனையான சாய்னா நேவால் 21-18, 23-21 என்ற புள்ளிகளில் சக வீராங்கனையான பி.வி. சிந்துவை வீழ்த்தி தங்கப்பதக்கத்தை வென்றார்.

 

 

 

 

 

 

 

 

 

 

 

 

 

 

 

 

 

கோல்டு கோஸ்ட், ஏப்ரல்.13-இங்கு நடந்து வரும் காமன்வெல்த் விளையாட்டில் இசை நடன ஜிம்னாஸ்டிக் போட்டியில் மலேசிய வீராங்கனையான 23 வயதுடைய அமி குவான் டிக் வெங் தங்கப் பதக்கத்தை வென்றார்.

ரிப்பன் வகை இசை நடன  ஜிம்னாஸ்டிக்  போட்டியில் அமி மொத்தம் 13.200 புள்ளிகளைப் பெற்று முதலிடத்தைப் பிடித்து மலேசியாவுக்கு தங்கத்தை பெற்றுத்தந்தார். 

அதேவேளையில்,  சைப்ரஸ் வீராங்கனை டியாமண்டோ  வெள்ளிப் பதக்கத்தையும் மற்றொரு  மலேசிய வீராங்கனையான கோய் சி யான் வெண்கலப் பதக்கத்தையும் வென்றனர். 

 ஜிம்னாஸ்டிக்  போட்டிகளில் ஒரு தங்கம், 3 வெள்ளி  மற்றும் 3 வெண்கலப் பதக்கங்களை மலேசியக்குழு வென்றது என்பது குறிப்பிடத்தக்கது.

இதனிடையே லான் போவ்ல்ஸ் எனப்படும்' பந்து உருட்டும்' போட்டியில் மலேசியாவின் எம்மா ஃபீயானா மற்றும் சித்தி ஷலினா ஜோடி தங்கப் பதக்கத்தை வென்றது. 

இறுதியாட்டத்தில் பலம் பொருந்திய தென் ஆப்பிரிக்க ஜோடியான நிக்கோல்னி மற்றும் கோலின் பிக்கெட் ஜோடியை வென்று மலேசிய வீராங்கனைகள் தங்கத்தை தட்டிச் சென்றனர்.

கோலாலம்பூர், ஏப்ரல்.12- ஆஸ்திரேலியாவின்  கோல்டு கோஸ்ட் நகரில் நடந்து வரும் காமன்வெல்த் போட்டியில் மலேசியாவுக்கு மூன்றாவது தங்கத்தைப் பெற்றுத் தந்த 'டைவிங்' நீச்சல் வீராங்கனைகளான  சியோங் ஜுன் ஹுங் மற்றும் பண்டேலா ரினோங் ஜோடிக்கு பிரதமர் டத்தோஶ்ரீ நஜிப் தனது பாராட்டுக்களைத் தெரிவித்துக் கொண்டார்.

தமது டுவிட்டர் பக்கத்தில் பிரதமர் இந்தப் பராட்டுக்களை தெரிவித்ததோடு தம்முடைய வாழ்த்துகளையும் கூறியுள்ளார். ஏற்கெனவே, மலேசியா எடை தூக்கும் போட்டிகளில் இரண்டு தங்கப் பதக்கங்களை வென்றுள்ளது என்பது குறிப்பிடத்தக்கது.

டைவிங் நீச்சலில் 10 மீட்டர் பிளாட்பார்ம் போட்டியில் மலேசிய ஜோடி 328.08 புள்ளிகளைக் குவித்து தங்கத்தை வென்றது.  அதேவேளையில், கனடாவின் மியேகன் - கேய்லி மக்காய் ஜோடி 312. 12  புள்ளிகளைப் பெற்று வெள்ளிப் பதக்கத்தையும் மலேசியாவின் லியோங் முன் நூர்- டபிதா சப்ரி  ஜோடி 308.16 புள்ளைகளைப் பெற்று வெண்கலப்பதக்கத்தை வென்றுள்ளனர் என்பாது குறிப்பிடத்தக்கது.

 

லிவர்புல், ஏப்ரல் 25 – ஐரோப்பிய சாம்பியன்ஸ் லீக் கால்பந்து போட்டியின் முதல் கட்ட அரையிறுதி ஆட்டத்தில் லிவர்புல் குழு 5-2 என்ற கோல் கணக்கில் இத்தாலியின் ரோமா குழுவை நொறுக்கி எடுத்தது.

முற்பகுதி ஆட்டத்தில் லிவர்புல் 2-0 என்ற கோல் கணக்கில் முன்னணி வகித்தது. ஆட்டத்தின் 35 ஆவது மற்றும் 45 ஆவது நிமிடங்களில் லிவர்புல்லின் அதிரடி கோல் மன்னன் முகம்மட் சாலா இரு கோல்களைப் போட்டு தனது ரசிகர்களை பெரிதும் உற்சாகத்தில் ஆழ்த்தினார்.

எனினும், வலுவான தற்காப்பை கொண்ட ரோமா குழுவை பிற்பகுதியில் லிவர்புல் இஷ்டத்திற்குப் போட்டுத் தாக்கியது. 56 ஆவது நிமிடத்தில் சாடியோ மனேயும் தொடர்ந்து  61 ஆவது நிமிடத்திலும் 68 நிமிடத்திலும் ரோபெர்ட்டோ பிர்மினோவும் கோல்களைப் போட்டு 5-0 என்ற கோல் கணக்கில் லிவர்புல் குழுவை முன்னிலைக்குக் கொண்டு வந்தனர்.

இந்நிலையில் லிவர்புல்லின் பிடி சற்றுத் தளரத் தொடங்கிய வேளையில் ரோமா கடைசி நேரத்தில் இரு கோல்களை அடித்தது. எனினும் 5-2 என்ற கோல் கணக்கில் முதல் கட்ட அரையிறுதி ஆட்டத்தில் லிவர்புல் வென்றது.

இரண்டாவது கட்ட ஆட்டம், ரோமா குழுவின் அரங்கில் நடத்தப்படவிருப்பதால் தாங்கள் பதிலடி கொடுக்கப் போவதாக ரோமா தெரிவித்தது.

 

கோலாலம்பூர், ஏப்ரல்.23- ஸ்தாப்பாக்கில் அதிகாலை தொழுகைக்காக நடந்து சென்று கொண்டிருந்த பாலஸ்தீன இமாம் ஒருவர் சுட்டுக் கொல்லப்பட்ட பரபரப்பான சம்பவத்தில் தொடர்புடைய நபர்கள் எனக் கருதப்படும் இரு நபர்களின் வரைபடங்களை மலேசியப் போலீசார் வெளியிட்டுள்ளனர்.

சம்பவத்தை நேரில் பார்த்த சிலர் தந்த தகவல்களின் அடிப்படையில் இந்த வரைபடங்கள் உருவாக்கப்பட்டுள்ளன என்றும் மலேசியாவை விட்டு வெளியேறும் அனைத்து எல்லை நிலையங்களுக்கும் இந்தப் படங்கள் அனுப்பட்டுள்ளன என்று போலீஸ் படைத் தலைவர் டான்ஶ்ரீ முகம்மட் ஃபுஷி ஹருண் தெரிவித்தார்.

நிபுணர்களைக் கொண்டு இந்தப் படங்கள் தயாரிக்கப்பட்டன. இந்த சந்தேகப் பேர்வழிகள் ஐரோப்பிய அல்லது மத்திய கிழக்கு வம்சாவளியினராக இருக்கக் கூடும் என்று நம்பப்படுவதாக அவர் சொன்னார்.

37  வயதுடைய மின் பொறியியல் துறை விரிவுரையாளரும் விஞ்ஞானியுமான பாலஸ்தீனத்தைச் சேர்ந்த டாக்டர் ஃபாடி அல்பாத்ஷ் என்பவர் கடந்த சனிக்கிழமை அதிகாலையில் ஸ்தாப்பாக, இடாமான் புத்ரி அடுக்குமாடி குடியிருப்புப் பகுதியில் இரு மர்ம நபர்களால் சுட்டுக்கொல்லப்பட்டார்.

அதிக சக்திவாய்ந்த மோட்டார் சைக்கிள்களில் வந்த அந்த இருவரும் 14 முறை அவரை நோக்கிச் சுட்டதாக தெரிகிறது.  ஃபாடி அல்லபாத்ஷை கொல்லவேண்டும் என்ற முழு நோக்கத்துடன் இந்த ஆசாமிகள் தாக்குதல்களை நடத்தியுள்ளனர் என போலீசார் நம்புகின்றனர்.

இவரது படுகொலைப் பின்னணியில் இஸ்ரேலின் உளவுத்துறை சம்பந்தப்பட்டிருப்பதாக அவருடைய குடும்பத்தினர் குற்றஞ்சாட்டினர்.  பாலஸ்தீனத்தின் காஸா பகுதியை ஆட்சி செய்து வரும் ஹம்மாஸ் தீவிவாத இயக்கத்தில் ஃபாடி அல்பாத்ஷ் இடம்பெற்றுள்ளார் எனக் கூறப்பட்டது.

லண்டன். ஏப்ரல்.20- "நீண்ட ஆலோசனைக்குப் பிறகு இந்த முடிவை எடுத்துள்ளேன். இவ்வாண்டுக்கான இங்கிலீஷ் பிரிமியர் லீக் போட்டி முடிவுக்கு வந்த கையோடு நான் விடைபெறுகிறேன்" என்று அர்சனல் கால்பந்து குழுவின் 22 ஆண்டுகால நிர்வாகியான அர்செனி வெங்கர் ஓர் அதிர்ச்சியான அறிவிப்பைச் செய்துள்ளார்.

இந்த சீசன் முடிந்த கையோடு நான் அர்சனல் குழுவை விட்டு வெளியேற உள்ளேன். கிளப் நிர்வாகத்துடன் இது குறித்து மிக விரிவாகக் கலந்து பேசி  இந்த முடிவை எடுத்துள்ளேன் என்றார் அவர்.

இந்தப் பிரிமியர் லீக் போட்டியில் முடிந்த வரை சிறந்த இடத்தைப் பிடிக்க அரசனலுக்கு ரசிகர்கள் பக்கபலமாக இருக்க வேண்டும். அர்சனலை நேசிப்பவர்கள் அந்தக் கிளப்பின் மதிப்பை போற்றிப் பாதுகாக்கவேண்டும். ஆதரிக்க வேண்டும் என்று   அர்செனி வெங்கர் கேட்டுக் கொண்டார்.

இதனிடையே அர்சனல் குழுவுக்காக 22 ஆண்டுகாலம் சேவையாற்றிய வெங்கர் போற்றுதலுக்கு உரியவர் என்று குறிப்பிட்ட கிளப்பின் தலைவர் கிரோயென்கே, அவருக்கு மாற்றாக சிறந்த நிர்வாகி ஒருவரை அர்சனல் விரைவில் கண்டறியும் என்று சொன்னார்.

அடுத்த சீசனில் ஐரோப்பிய சாம்பியன்ஸ் லீக் போட்டிக்கு அர்சனல் தேர்வு பெறவேண்டுமானால்,  தற்போது நடந்து வரும் ஐரோப்பா லீக் போட்டியில் அது சாம்பியன் பட்ட்டத்தை வென்றால் மட்டுமே அது சாத்தியமாகும். அடுத்த வாரம் நடை பெறவிருக்கும் ஐரோப்பிய லீக் அரையிறுதி ஆட்டத்தில் அத்லெட்டிக்கோ மாட்ரிட் குழுவை அர்சனல் வீழ்த்தி,  இறுதியாட்டத்திற்கு தகுதி பெறவேண்டிய கட்டாயத்தில் இருக்கிறது என்பது குறிப்பிடத்தக்கது.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Advertisement