பார்சிலோனா, பிப்.27- கைப்பேசி பிரியர்களின் விருப்பத் தேர்வாக இருந்த நோக்கியா 3310 ரக கைப்பேசி தற்போது மீண்டும் சந்தைக்கு வந்துள்ளது. சுமார் 12 வருடங்கள் கழித்து நோக்கியா கைப்பேசி மீண்டும் தொடர்பு உலகை ஆக்கிரமிக்க தொடங்கிய முதல் பயணமாக இது கருதப்படுகிறது.

2000-ஆம் ஆண்டுகளில் மிகவும் பிரசித்த கைப்பேசி நோக்கியா 3310 ஆகும். மலேசியாவில் பலர் இதனைக் குறிப்பிடும்போது 'எவ்வளவு அடிபட்டாலும் எத்தனை முறை கீழே விழுந்தாலும் உடையாத கைப்பேசி' என்று தான் குறிப்பிடுவர். உரத்த சத்தத்துடன் உறுதியான அமைப்புடன் வலம் வந்த இந்த நோக்கியா மீண்டும் வெளிவர துவங்கியுள்ளது ஆண்ட்ரோய்டு செயலியுடன்.

1998ம் ஆண்டு முதல் 2011ம் ஆண்டு வரை கைப்பேசி உலகை ஆண்ட நோக்கியா நிறுவனம், அதன் வைரியான சம்சுங் நிறுவனத்தால் வலுவிழந்து போனது. பின்னர், மைக்ரோசோஃப்ட் நிறுவனத்திடம் விற்கப்பட்ட அதனை, தற்போது எச்எம்டி குளோபல் நிறுவனம் வாங்கி, நோக்கியா எனும் முத்திரையைப் பயன்படுத்தும் உரிமையையும் பெற்று கொண்டது.

நேற்று அதிகாரப்பூர்வமாக இதன் வெளியீட்டு விழா நடைபெற்றது. இதனுடன், நோக்கியா 3, நோக்கியா 5, நோக்கியா 6 ஆகிய கைப்பேசி ரகங்களும் நேற்று வெளியீடு கண்டன. இதன் வழி வரும் 2019ஆம் ஆண்டுக்குள் உலக கைப்பேசி சந்தையில் 5 விழுக்காட்டினை நோக்கியா கைப்பற்றும் என அதன்  மூத்த செயல் அதிகாரி அர்தோ நும்மேலா நம்பிக்கை தெரிவித்துள்ளார்.

இன்னொரு கொசுறு தகவல், நோக்கியா 3310வின் சிறப்பான 'ஸ்னேக் கேம்' எனும் பாம்பு விளையாட்டும் இந்த கைப்பேசியில் இடம்பெற்றுள்ளது.

 நியூயார்க், பிப்.18- சுயமாக ஓட்டக்கூடிய ஆயிரக்கணக்கான தானிங்கி மின்சாரக் கார்களை ஒரே சமயத்தில் பரிட்சார்த்தமாக சாலைகளில் ஓடச் செய்வதற்கு பிரபல அமெரிக்கக் கார் நிறுவனமான ஜெனரல் மோட்டோர் (ஜிஎம்) நிறுவனம் திட்டமிட்டுள்ளது. 

2018-ஆம் ஆண்டின் தொடக்கத்தில் தானியங்கி கார்களைப் இந்த பரிசோதிக்க ஆயிரக்கணக்கில் சாலைகளை ஆக்கிரமிக்கும். ஜிஎம் நிறுவனத்தின் துணை நிறுவனமான 'லைப்ட்' நிறுவனம், பயணிகள் போக்குவரத்துச் சேவை நடத்தும் ஒரு நிறுவனமாகும். அமெரிக்காவில் உபருக்கு அடுத்து மிகப்பெரிய அளவில் வாடகைக் கார் சேவை நடத்தி வருகிறது.

எனவே, தனது சொந்தத் தயாரிப்பான தானியங்கி மின்சாரக் கார்களை சாலைகளில் பரிசோதித்துப் பார்ப்பதற்கு லைப்ட் நிறுவனத்திற்கு ஆயிரக்கணக்கில் சுயமாக ஓடக்கூடிய மின்சாரக் கார்களை சப்ளை செய்ய ஜிஎம் நிறுவனம் திட்டம் போட்டுள்ளது எனத் தகவல் வெளியாகியுள்ளது. 

அதிக அளவில் இத்தகைய கார்களைத் தயாரித்து, தனது கார் வர்த்தக ஆதிக்கத்தை நிலைநிறுத்திக் கொள்ளும் முயற்சியில் அது இறங்கியுள்ளது என்று கூறப்பட்டது. 

 

 

 

 

 

புதுடில்லி, பிப்.14- விண்வெளி ஆதிக்கத்தில் அமெரிக்காவுக்கும் ரஷ்யாவுக்கும் இடையே நிலவிய போட்டாப் போட்டிகள் என்பது ஒரு கடந்த காலமாகிவிட்டது. ஆனால், இந்தியா இப்போது புதிய அதிரடியில் இறங்கியுள்ளது. ஒரே ராக்கெட் மூலம் 104 துணைக்கோளங்களை விண்வெளிக்கு நாளை அனுப்பி அசத்தப் போகிறது இந்தியா.

இதுவொரு சாதனை முயற்சி. இது வெற்றி பெறுமானால் இந்தியா விண்வெளித் துறையில் வெற்றி முத்திரையை மிக அழுத்தமாக பதித்துவிட்டது என்று அர்த்தமாகும்.

செவ்வாய்க் கிரகத்திற்கு விண்கலத்தை அனுப்பும் முயற்சியில் அபார வெற்றி கண்ட இந்தியாவுக்கு, ஒரே ராக்கெட்டில் 104 செயற்கைத் துணைக் கோளங்களை அனுப்பும் முயற்சி இன்னொரு மைல்கல்லாக அமையும்.

                     ## ராஜேஸ்வரி ராஜாகோபாலன்

கடந்த 2014ஆம் ஆண்டில் ரஷ்யா ஒரே ராக்கெட் மூலம் 37 துணைக்கோளங்களை அனுப்பி சாதனையைப் பதிவு செய்தது. அதைக் காட்டிலும் மூன்று மடங்கு கூடுதலான துணைக்கோளங்களை நாளை விண்வெளிக்கு அனுப்ப இந்தியா தயாராகி விட்டது.

இது மிகப்பெரிய விஷயம். இந்திய விண்வெளித்திட்டம் எவ்வளவு நவீனமானது என்பதை இது புலப்படுத்துவதாக அமையவிருக்கிறது என அணுசக்தி மற்றும் விண்வெளி ஆய்வு மைய தலைவரான ராஜேஸ்வரி ராஜாகோபாலன் தெரிவித்துள்ளார்.

2017-ஆம் ஆண்டுக்கான விண்வெளித் திட்டங்களில் தற்போது ஆசிய நாடுகளான இந்தியா, ஜப்பான், சீனா ஆகியவை போட்டாப் போட்டியில் உள்ளன.

கடந்த 20ஆம் நூற்றாண்டில், கெடுபிடி போர்க்காலத்தில் அமெரிக்காவுக்கும் ரஷ்யாவுக்கும் இடையே நிலவிய விண்வெளிப் போட்டியைப் பிரதிபலிப்பதாக இந்த ஆசிய நாடுகளுக்கு இடையிலான விண்வெளிப் போட்டிகள் அமைந்துள்ளன என்று நிபுணர்கள் கருத்துரைத்திருக்கின்றனர். ஆசியாவில், தென்கொரியாவும் இத்தகைய போட்டிக்குள் மூக்கை நுழைக்க ஆர்வம் கொண்டுள்ளது.

1962ஆம் ஆண்டில் தொடங்கப்பட்ட இந்திய விண்வெளி ஆய்வுக் கழகத்தினால் உருவாக்கப்பட்டு செவ்வாய்க் கிரகத்திற்கு அனுப்பப்பட்ட 'மங்கள்யான்' விண்கலம் தான், உலகமே இந்தியாவை திரும்பிப் பார்க்கும்படி செய்தது. மிகக் குறைந்த செலவில் இந்தச் சாதனையை இந்தியா நிகழ்த்திக் காட்டியது என்பது குறிப்பிடத்தக்கது.

 

 

 

சியோல், ஜன.23- 'கேலக்ஸி நோட் 7' (Galaxy Note 7) கைத்தொலைபேசி அதிகமாக சூடேறி, எரிந்துப் போனதற்கான காரணத்தைக் கண்டறியும் சாரணையின் முடிவில் அது பேட்டரிகளினால் ஏற்பட்ட விபரீதமே தவிர வேறு கோளாறுகள் எதுவும் இல்லை என்று சம்சோங் நிறுவனம் அறிவித்தி ருக்கிறது.

இந்தக் கோளாறுக்கு மென்பொருளோ அல்லது வன்பொருளோ காரணமல்ல, முற்றிலும் பேட்டரிதான் காரணம் என்று சம்சோங் கூறியது. கடந்த அக்டோபர் மாதத்திலேயே கேலக்ஸி நோட் 7 கைதொலைப்பேசியை சம்சோங் மீட்டுக்கொண்டது. இதனால், சம்சோங் கிட்டத்தட்ட 530 கோடி டாலர் இழப்பை எதிர்நோக்கியது.

பேட்டரிகள் தீப்பிடிப்பது தொடர்பில் சுதந்திரமான ஒரு உள்விசாரணைக் குழுவை சம்சோங் அமைத்து முழுமையான ஆய்வை மேற்கொண்டது. அந்த பேட்டரியின் வடிவமைப்பு மற்றும் தயாரிப்பு ஆகிய இரு நிலைகளிலும் கோளாறுகள் இருப்பதாக அது தெரிவித்தது.

கைத்தொலைபேசிக்குள் அடங்காத வகையில் சற்று பருமனாக பேட்டரி வடிவமைக்கப்பட்டது மற்றும் மின் பாயாமல் காக்கும் பொருள் போதுமான அளவில் பேட்டரிக்குள் இல்லாமல் போனது ஆகியவைதான் அது சூடேறி தீப்பிடிக்க காரணமாக அமைந்து விட்டது என்று விசாரணைக் குழு விளக்கியது.

 பேட்டரி தீப்பிடிக்கும் பிரச்சனை தொடர்பில் கிட்டத்தட்ட 25 லட்சம் கேலக்ஸி நோட் 7 கைத்தொலை பேசிகளை அந்நிறுவனம் சந்தையில் இருந்து மீட்டது என்பது குறிப்பிடத்தக்கது.

அதற்கு மாற்றாக வெளிடப்பட்ட பேட்டரியில் அத்தகைய பிரச்சனை எதுவும் இல்லை என்றும் இந்தத் தவறுக்கான எல்லா பொறுப்புக்களையும் சம்சோங் நிறுவனம் ஏற்றுக்கொள்கிறது என்றும் அறிவிக்கப்பட்டது. 

 

 

 

More Articles ...