கோலாலம்பூர், நவ.21- தனக்கு மிகவும் பிடித்த மீன் தலைக்கறியை உண்பதற்காகச் சென்ற 56 வயது ஆடவர் ஒருவர், அதற்கு ரிம.600 பணம் செலுத்தியது குறித்து புலம்பிக் கொண்டிருக்கிறார். நான்குக் கிண்ணங்களில் அந்த மீன் தலைக்கறியை சுவைத்து சாப்பிட்டப் பின்னர், அதற்கான பில்லை வாங்கிப் பார்த்த தாம் அதிர்ச்சியுற்றதாக தெரிவித்தார். 

ஃபாவுட்சி அஸ்ராபுடின் என்ற அந்த 52 வயது ஆடவர் தனது குடும்பத்தாருடன், கோலாலம்பூரில் பிரசித்திப் பெற்ற அந்த உணவகத்தில், மீன் தலைக்கறியைக் கேட்டு சாப்பிட்டதாகக் கூறினார். அதற்கான பில்லை வாங்கிப் பார்க்கையில், 1,000 ரிங்கிட்டு தாங்கள் உணவு உண்டதை அறிந்து தாம் திகைத்ததாக அவர் சொன்னார். 

மீன் தலைக்கறியை தாம் அடிக்கடி சாப்பிடும் பழக்கம் கொண்டுள்ள அவர், அந்த உணவுக்கு 50திலிருந்து 60 ரிங்கிட் வரைதான் தாம் இதுவரை செலுத்தி வந்ததாகத் தெரிவித்தார். அந்த உணவுக்கு தாம் செலுத்திய ரசீதை சமூக வலைத்தளங்களில் பகிர்ந்த அவர், அந்த உணவகத்தின் சாப்பாட்டு விலை குறித்து தாம் அறிந்திருக்கவில்லை என்று ஒப்புக் கொண்டார். 

"ஏன் இவ்வளவு விலை என்று நான் அந்த உணவக ஊழியரிடத்தில் கேள்வி எழுப்பினேன். மீன்களின் தலை அளவு பொருத்தே அதற்கான பணம் வசூலிக்கப்படும் என்று அவர் பதிலளித்தார். இச்சம்பவம் குறித்து நான் போலீசில் புகார் கொடுப்பதாக இல்லை. அதற்கான பணத்தை நான் செலுத்தி விட்டேன். இனிமேல், எங்கு சாப்பிடச் சென்றாலும், முதலில் விலைப்பட்டியலை கவனியுங்கள்" என்று அவர் தனது சமூக வலைத்தளத்தில் அறிவுறுத்தினார். 

சுங்கை பட்டாணி, நவ.21- தனது மூன்று பிள்ளைகளையும் கொன்றப் பின்னர், தானும் தூக்கில் தொங்கியதாகக் கூறப்படும் கே.சிவராவ்வின் கழுத்து இறுக்கப்பட்டிருந்ததாகவும் அதனால் தான் அவர் இறந்தார் எனவும் போலீசார் கூறினர்.

நேற்று மதியம் கே.சிவராவ் (வயது 48), அவரின் மகன்கள் எஸ்.ரகுராம் ராவ் (வயது 5), எஸ்.ஷஷ்ரீன் ராவ் (வயது 6) மற்றும் அவரின் மகள் யமூனா (வயது 8) ஆகியோர் பெர்டானா ஹைய்ட்ஸ் என்ற இடத்திலுள்ள தங்களின் வீட்டு அறையில், மதியம் 2 மணிக்கு இறந்து கிடந்தனர்.

சம்பவத்திற்கான காரணத்தைப் போலீசார் ஆராய்ந்து வரும் நிலையில், கடன் தொல்லை தாங்க முடியாமல் குடும்பமே இறந்திருக்கலாம் என போலீசார் தெரிவித்தனர்.

இதனிடையே, இறந்துப் போன சிவராவ்வின் பிரேதப் பரிசோதனையில், அவரின் கழுத்துப் பகுதி இறுக்கப்பட்டதால் அவர் இறந்திருக்கிறார் என்று தெரிய வந்துள்ளது. அவரின் குழந்தைகளின் மரணம் குறித்து அவர்களுடைய மருத்துவ பரிசோதனை கூடத்தின் முடிவுக்காக தாங்கள் காத்திருப்பதாக கோலா மூடா சிஐடி தலைவர் துணை ஆணையர் மியோர் ஃபாரிட் அலாத்ராஷ் கூறினார். 

சுங்கைப் பட்டாணி, நவ.21- கடன் தொல்லைக் காரணத்தால் தனது மூன்று பிள்ளைகளையும் கொன்றப் பின்னர், தானும் தூக்கில் தொங்கியதாகக் கூறப்படும் கே.சிவராவ் என்றவரின் தம்பி, தனது அண்ணன் அவ்வாறு செய்திருப்பார் என்று தன்னால் நம்ப முடியவில்லை என்று தெரிவித்தார். 

"எனது அண்ணனுக்கு எவ்வித கடன் தொல்லையும் இருந்ததாக எனக்குத் தெரியவில்லை. அவரின் வாழ்க்கை முறை சிறப்பாகவே இருந்தது. அவரின் வாடகை வீட்டின் நிலவரங்களைப் பார்க்கையில், அவர் கடன் தொல்லையால் அவதியுற்றிருப்பார் என்று என்னால் நம்ப முடியவில்லை. 

"ஒரு மாதத்திற்கு முன்பு தான் நான் அவரை நேரில் சந்தித்தேன். எவ்வித கவலையோ அல்லது பதற்றமோ அவரிடத்தில் தென்படவில்லை. அவர் இயல்பாகவே இருந்தார்" என்று 38 வயதான லோகன்ராவ் தெரிவித்துக் கொண்டார்.  

இருந்தபோதிலும், தனது அண்ணன் யாரிடமாவது கடன் பெற்றிருப்பாரா என்பது குறித்த விவரம் ஏதும் தனக்கு தெரியாது என்று அவர் சொன்னார். 

இருபது நாட்களுக்கு முன்னர், தனது மனைவி தற்கொலைச் செய்துக் கொண்ட அதே அறையில், தனது மூன்று குழந்தைகளையும் தலையணையால் அமுக்கி மூச்சுத் திணற வைத்துக் கொன்ற பின்னர், சிவராவ்வும் நேற்று தற்கொலைச் செய்துக் கொண்டார். கடன் தொல்லையால் அவர் அத்தகைய விபரீத முடிவுக்கு வந்திருக்கலாம் என்று போலீசார் கருதுகின்றனர்.

மரணமடைந்த அவர்களின் ஈமச் சடங்கில் கிட்டத்தட்ட 100 பேர் கலந்து கொண்டனர். அவர்களின் உடல்கள் ஜாலான் பட்லிஷாவில் உள்ள ஶ்ரீ சுப்ரமணிய ஆலய சுடுகாட்டிற்கு கொண்டுச் செல்லப்பட்டது.

செர்டாங், நவ.21- இங்குள்ள தாமான் லெஸ்தாரி பெர்டானா என்றப் பகுதியில் ஏற்பட்ட மண் சரிவில், கார் நிறுத்தும் இடத்தில் நிறுத்தி வைக்கப்பட்ட 11 கார்கள் கடுமையான பாதிப்புக்குள்ளாகின. இச்சம்பவத்தில், பொதுமக்கள் யாருக்கும் எவ்வித பாதிப்பும் ஏற்படவில்லை. 

அச்சம்பவம் குறித்து, சிலாங்கூர் தீயணைப்பு மற்றும் மீட்புப் படையினருக்கு உடனடியாகத் தகவல் தெரிவிக்கப்பட்டது. அதனைத் தொடர்ந்து, எட்டு தீயணைப்பு வீர்ர்கள் மற்றும் இரண்டு தீயணைப்பு வண்டிகள் சம்பவம் நிகழ்ந்த இடத்திற்கு விரைந்ததாக சிலாங்கூர் தீயணைப்பு மற்றும் மீட்புப் படை துணை இயக்குனர் முகமட் சானி ஹரூல் தகவல் தெரிவித்தார். 

"அந்த மண், பெரிய கால்வாயை நோக்கி சரிந்ததால், அதனைத் தொடர்ந்து அங்கு நிறுத்தி வைக்கப்பட்ட கார்களும் அந்தக் கால்வாயில் விழுந்தன. நல்லவேளை, இச்சம்பவத்தில் யாருக்கும் காயம் ஏற்படவில்லை. அருகிலிருந்த கட்டிடத்திற்கும் எவ்வித பாதிப்பும் நேரவில்லை" என்று அவர் கூறினார். 

அப்பகுதியில் விசாரணை நடத்தும் பொருட்டு, பொதுமக்கள் யாரும் அங்குச் செல்லக் கூடாது என்றும், அச்சம்பவம் குறித்த விவரங்களை சம்பந்தப்பட்ட அதிகாரிகளிடம் சமர்ப்பித்து விட்டதாகவும் சானி தெரிவித்துக் கொண்டார்.

குவாந்தான், நவ.21- இவ்வாரம் பெந்தோங்கில் நடைபெறவிருக்கும் மலேசிய அனைத்துலக டுரியான் கலாச்சார சுற்றுலா விழாவில் 50,000 மலேசியர்கள் மற்றும் வெளிநாட்டவர்கள் கலந்துக் கொள்வார்கள் என்று எதிர்பார்க்கப்படுகிறது. அந்த விழாவுக்கு மக்களின் தரப்பில் ஏகோபித்த ஆதரவு கிடைக்கும் பொருட்டு, அதனை வெற்றிகரமாக நடத்த வேண்டும் என்று அதன் ஏற்பாட்டாளர்கள் எண்ணம் கொண்டுள்ளனர். 

நவம்பர் 25 தொடங்கி நவம்பர் 26 வரை நடைப்பெறும் இந்த விழாவில், பழங்களின் ராஜாவாகத் திகழும் டுரியானை, பெந்தோங் பகுதியின் சுற்றுலா அம்சங்களின் ஒன்றாக வெளிநாட்டுப் பயணிகளுக்கு அறிமுகப்படுத்த தாங்கள் எண்ணம் கொண்டுள்ளதாக எம்பிரேஸ் (MBrace) என்று அழைக்கப்படும் மலேசிய பெல்ட் மற்றும் சாலை நிறுவனத்தின் தலைவர் டத்தோஶ்ரீ சுவா போ கியாங் கூறினார். 

"இந்த நிகழ்வில் பாடல்கள், இதர நடவடிக்கைகள் மற்றும் விளையாட்டு நிகழ்வுகளும் இடம் பெறும்" என்று அவர் தெரிவித்துக் கொண்டார். இந்நிகழ்வு 2 மணியளவில் அதிகாரப்பூர்வமாகத் தொடங்கப்படும் என்றும், அதனைத் தொடர்ந்து, 30 நிமிடங்களுக்கு டுரியான் பழங்களுக்கு சிறப்பு தள்ளுபடி வழங்கப்படும் என்றும் அவர் கூறினார். 

இதனிடையில், அந்த விழாவுக்கு வரும் பார்வையாளர்கள் தங்களின் வாகனங்களை ஒரு குறிப்பிட்ட இடத்தில் நிறுத்தி வைக்கும் பொருட்டு, சில முயற்சிகள் எடுக்கப்பட்டு வருவதாக பகாங் மாநில செனட்டர் ட்த்தோ ஹோ காய் மூன் சொன்னார். 

"மலேசியாவின் தலைச்சிறந்த மற்றும் சுத்தமான டுரியான்கள் மட்டுமே இங்கு விற்பனைக்கு உட்படுத்தப்படும். தாய்லாந்தில் உற்பத்தி செய்யப்படும் டுரியான்களை போல் இல்லாமல், மலேசிய டுரியான்கள் சில தினங்களுக்குப் பின்னர் கெட்டுப் போய்விடும். அதனை உடனுக்குடன் சுவைத்து சாப்பிட வேண்டும். ஆதலால், விழாவுக்கு கொண்டு வரப்படும் டுரியான் எண்ணிக்கையில், அனைவரும் கவனம் கொள்ள வேண்டும்" என்று அவர் அறிவுறுத்தினார். 

'மூசாங் கிங்' எனப்படும் டுரியான் வகைகள் கிட்டத்தட்ட 10 டன்கள் இங்கு விற்பனைக்கு உட்படுத்தப்படலாம் என்று ஹோ மற்றும் மலேசிய டுரியான் ஏற்றுமதி சங்கத் தலைமைச் செயலாளர் ஃபிரேட் லிம் ஆகியோர் தெரிவித்துக் கொண்டனர். 

கோலாலம்பூர், நவ.21- நாளுக்கு நாள் மணலின் தேவை அதிகரித்து வருவதைத் தொடர்ந்து, சட்டவிரோதமாக அது ஏற்றுமதி செய்யப்படாத வண்ணம் மலேசியாவில் சில பாதுகாப்பு நடவடிக்கைகள் அமல்படுத்தப்பட்டன என்பது அனைவரும் அறிந்ததே. ஆனால், இப்போது, அந்தப் பாதுகாப்பு செயல்முறையை உடைத்து, அதனைக் கள்ளச் சந்தையில் விற்பனைக்கு உட்படுத்தும் முறையை சில கும்பல்கள் கண்டறிந்துள்ளன என்று என்.எஸ்.டி எனப்படும் மலேசிய நாளிதழ் பரபரப்பு செய்தியை வெளியிட்டுள்ளது. 

மலேசியாவின் மேற்கு கடற்கரை பகுதியிலிருந்து கிட்டத்தட்ட 55 ஆயிரம் டன் மணல், இந்தியாவிற்கு ஏற்றுமதி செய்யப்பட்டிருக்கின்றது என்ற தகவல் பலரை அதிர்ச்சிக்கு உள்ளாக்கியுள்ளது. பகாங் மற்றும் கிளந்தான் மாநிலங்களில் உள்ள ஆறுகளிலிருந்து மணலை பிரித்தெடுத்து, இந்தியாவிற்கு ஏற்றுமதி செய்யும் உரிமம் இரண்டு நிறுவனங்களுக்கு வழங்கப்பட்டுள்ளதாக இயற்கை வளங்கள் மற்றும் சுற்றுச்சூழல் அமைச்சர் டத்தோஶ்ரீ டாக்டர் வான் ஜுனாய்டி துவான்கு ஜஃபார் கூறினார். சிங்கப்பூருக்கு மணலை ஏற்றுமதி செய்யும் உரிமம் ஒரு நிறுவனத்திற்கு வழங்கப்பட்டுள்ளது. 

இதனிடையே, இந்தியாவுக்கு சட்டவிரோதமாக ஏற்றுமதி செய்யப்பட்டுள்ள மணலின் விலை, சந்தை விலையைக் காட்டிலும் 50 விழுக்காடு குறைவாக உள்ளது என்பது குறித்து மணல் தொழில் நிறுவனங்கள் கவலைக் கொண்டுள்ளன. இந்தியாவுக்கு ஏற்றுமதி செய்யப்பட்ட அந்த மணல், இயற்கை வளங்கள் மற்றும் சுற்றுச்சூழல் அமைச்சின் உரிமம் பெற்ற நிறுவனங்களால் ஏற்றுமதி செய்யப்படவில்லை என்றும் கூறப்பட்டுள்ளது. 

இதனிடையில், பகாங், கிளந்தான் மற்றும் பேராக் மாநிலங்களின் ஆறுகளிலிருந்து எடுக்கப்படும் மணலை, எங்கு வேண்டுமானாலும் எங்களால் ஏற்றுமதி செய்ய முடியும் என்று கூறிய மணல் தொழில் நிறுவனங்களை என்.எஸ்.டியின் நிருபர்கள் சிலர், கடந்த சில வாரங்களாக தொடர்புக் கொள்ள முயற்சித்தனர் என்பது குறிப்பிடத்தக்கது. 

அந்த நிறுவனங்களில் ஒன்று, தங்களின் ஏற்பாட்டில்தான் இந்தியாவுக்கு மணல் ஏற்றுமதி செய்யப்பட்டதாகவும், அது சட்டவிரோத ஏற்றுமதி அல்ல என்றும் தெரிவித்துக் கொண்டுள்ளது. ஆனால், அந்த நிறுவனம், மேலே கூறப்பட்ட நிறுவனங்களுடன் தொடர்புடையதல்ல என்பது உறுதிப்படுத்தப்பட்டுள்ளது.

இதனிடையில், பேராக் ஆறுகளிலிருந்து மணலை பிரித்தெடுக்கும் உரிமம் எந்த நிறுவனத்திற்கும் வழங்கப்படவில்லை என்று பேராக் மந்திரி பெசார் இணை நிறுவனத்தின் தலைமை நிர்வாக அதிகாரி டத்தோ அமினூடின் ஹஷிம் தகவல் தெரிவித்துள்ளார். அம்மாநிலத்திலிருந்து மணல் கடத்தலில் ஈடுபட்ட சிலரை சம்பந்தப்பட்ட அதிகாரிகள் கையும் களவுமாக பிடித்ததாகவும் அவர் தெரிவித்துக் கொண்டார். 

இந்த மணல் கொள்ளையால் மாநில அரசாங்கங்களுக்கு பல ரிங்கிட் நஷ்டம் ஏற்படுவதாகவும், மாநிலங்களின் எல்லைகளை அந்த மணல் லோரிகள் கடந்து விட்டதால், அதனைக் கட்டுப்படுத்தும் உரிமை, மாநில அரசாங்கங்களுக்கு இல்லை என்பதையும் அவர் சுட்டிக் காட்டினார். 

கோத்தா கினபாலு, நவ.21- பதின்மூன்று வயதே நிரம்பிய தனது பக்கத்து வீட்டுச் சிறுமியை பாலியல் வன்முறைக்கு உட்படுத்தி, அவருக்குக் குழந்தைப் பிறக்க காரணமாக இருந்த 52 வயது ஆசாமிக்கு 20 வருடச் சிறைத் தண்டனையும், பத்து பிரம்படிகளும் விதிக்கப்பட்டன. 

கடந்த 2002-ஆம் ஆண்டில், இதே குற்றத்திற்காக ஜிகாவ் கானி என்ற அந்த ஆடவனுக்கு 10 வருடங்கள் சிறைத் தண்டனை விதிக்கப்பட்டது குறிப்பிடத்தக்கது. 

செஷன்ஸ் நீதிமன்ற நீதிபதி அஸ் ரீனா அஸிஸ் முன்னிலையின் அவன் அக்குற்றத்தை ஒப்புக் கொண்டான். இப்போது 14 வயதாகிய அச்சிறுமிக்கு, 10,000 ரிங்கிட் இழப்பீடு தொகையைக் கொடுக்குமாறு அஸ் ரீனா அவனுக்கு உத்தரவிட்டார். அந்தத் தொகையை அவன் செலுத்தத் தவறினால், அவனுக்கு மேலும் 6 மாதச் சிறைத் தண்டனை விதிக்கப்படும் என்று அவர் தெரிவித்துக் கொண்டார். 

அவனின் தண்டனைக் காலம் முடிவடைந்தப் பின்னர், அவன் இதேப் போன்ற குற்றச்செயல்களில் ஈடுபடுவதை தடுக்கும் வண்ணம், போலீசாரின் கண்காணிப்பின் கீழ் இரு ஆண்டுகளுக்கு வைக்கப்படுவான் என்றும் அவர் தீர்ப்பளித்தார். 

கோலா பென்யூ (Kuala Penyu) என்ற இடத்திலுள்ள ஒரு வீட்டில், கடந்த வருடம் மே மாதத்தின் போது, மதியம் 12.30 மணிக்கு அந்த ஆடவன் அச்சிறுமியை கற்பழித்தான். உதவிக் கேட்டு அந்தச் சிறுமி அலறிய போதும், அருகில் யாரும் இல்லாததால், அவரை அந்த ஆசாமிடமிருந்து காப்பற்ற முடியவில்லை. 

கடந்தாண்டு செப்டம்பர் மாதம் 6-ஆம் தேதியன்று தனக்கு வயிறு வலிக்கின்றது என்று அந்தச் சிறுமி தனது பெற்றோரிடம் தெரிவித்ததும், அவர்கள் அவளை மருத்துவப் பரிசோதனைக்காக கொண்டுச் சென்றனர். அங்கு அச்சிறுமி கர்ப்பமுற்றுள்ளார் என்பது தெரிய வந்தது. அதன் பின்னரே, அந்தச் சிறுமி அவரின் பக்கத்து வீட்டு ஆசாமியினால் தாம் கற்பழிக்கப்பட்ட உண்மையை அவளின் பெற்றோருக்கு தெரியப் படுத்தினாள்.

கடந்த 24-ஆம் தேதியன்று அச்சிறுமிக்கு குழந்தைப் பிறந்தது. மரபணு பரிசோதனை வாயிலாக அக்குழந்தைக்கு ஜிகாவ் தான் தந்தை என்று உறுதிப்படுத்தப்பட்டது. 

More Articles ...