கோலாலம்பூர், ஜன.22-  ஆசியான் மற்றும் இந்தியாவுக்கு இடையிலான உச்சநிலை மாநாட்டில் கலந்து கொள்வதற்காக  பிரதமர் டத்தோஶ்ரீ நஜிப் துன் ரசாக்,  புதன்கிழமை புதுடில்லி செல்லவிருக்கிறார். பிரதமராக நஜிப் பதவியேற்றது முதல் அவர் இந்தியாவுக்கு அதிகாரப்பூர்வ பயணம் மேற்கொள்வது இது நான்காவது முறையாகும்.

கடந்த ஆண்டில் இந்தியாவுக்கு முக்கியத்துவம் வாய்ந்த பயணம் ஒன்றை பிரதமர் நஜிப் மேற்கொண்டார்.  அப்போது இருநாடுகளின் வர்த்தகர்கள் மற்றும் தொழிலதிபர்கள் மிகப்பெரிய வர்த்தக உடன்பாடுகளில்  கையெழுத்திட்ட வைபவத்திற்கு பிரதமர் நஜிப்பும் பிரதமர் நரேந்திர மோடியும் முன்னிலை வகித்தனர்.

மலேசியாவுக்கும் இந்தியாவுக்கும் இடையே சுமார் 158.68 பில்லியன் ரிங்கிட் மதிப்பைக் கொண்ட வர்த்தக உடன்பாடுகள் அப்போது கையெழுத்தி டப்பட்டன.  பத்து நாடுகளைக் கொண்ட ஆசியான் கூட்டமைப்புக்கும்   இந்தியாவுக்கும் இடையேயான நட்புறவு, இந்தியாவின் வெளியுறவுக் கொள்கையில்  மிக முக்கி அம்சமாக விளங்கி வருகிறது.

இந்த உச்சநிலை மாநாட்டின் பணிகளுக்கிடையே பிரதமர் மோடியை பிரதமர் நஜிப் சந்தித்து பேசவிருக்கிறார். 2030ஆம் ஆண்டுக்குள் உலகின் மூன்றாவது பெரிய வல்லமைமிக்க பொருளாதார சக்தியாக இந்தியா உருவெடுக்கும் என்று ஆரூடங்கள் கூறப்படும் நிலையில்  இந்தியாவுடனான உறவுகளை மேலும் விரிவாக்குவதில் பிரதமர் மிகுந்த ஆர்வம் கொண்டுள்ளார் என்று 'சீட்' அமைப்பின் முன்னாள்  தலைமைச் செயல் அதிகாரியான டாக்டர் ஏ.டி. குமார ராஜா தெரிவித்தார்.

இந்தியாவுடனான மலேசியாவின் உறவு என்பது சமூக ரீதியில் மிக வலுவான அடித்தளத்தைக் கொண்டதாகும். இம்முறை இருநாட்டுத் தலைவர்களும் சந்திக்கும் போது கடந்த ஆண்டில் கையெழுத்தான பல உடன்பாடுகள் குறித்த மீள்பார்வைக்கு வழி ஏற்படும் என்று எதிர்பார்க்கப்படுகிறது.

செத்தியாவங்சா, ஜன.15- எதிர்வரும் பொதுத்தேர்தலில் கோம்பாக் நாடாளுமன்றத் தொகுதியில் போட்டியிடுமாறு பிகேஆர் கட்சியின் துணைத்தலைவர் டத்தோஶ்ரீ அஸ்மின் அலி  விடுத்த கோரிக்கையை முன்னாள் பிரதமர் துன் மகாதீர் நிராகரித்தார்.

"நான் லங்காவி, குபாங்பாசு அல்லது புத்ரா ஜெயா ஆகிய தொகுதிகளில் ஏதாவது ஒன்றில் தாம் போட்டியிட முடிவு செய்திருக்கிறேன்" என்று அவர் சொன்னார். 

அஸ்மின் அலியின் வேண்டுகோளை நான் மதிக்கிறேன்.  நான் அவருக்கு நன்றி கூறிக் கொள்கிறேன். ஆனால், ஏற்கெனவே நான் மேற்கண்ட தொகுதிகளில்,  ஏதாவது ஒன்றில் போட்டியிட முடிவு செய்து விட்டேன்" என்று செத்தியா வங்சா பிரிபூமி கட்சி டிவிசனைத் தொடக்கி வைத்த போது மகாதீர் தெரிவித்தார்.

தம்முடைய தொகுதியான கோம்பாக்கில் துன் மகாதீர் போட்டியிட முன்வரவேண்டும் என்றும் அத்தொகுதியை தாம் விட்டுக் கொடுக்கத் தயாராக இருப்பதாகவும் கோம்பாக் எம்.பி.யான அஸ்மின் அலி சில தினங்களுக்கு முன்னர் தெரிவித்திருந்தார்.

 

கோலாலம்பூர், ஜன.10- விரைவில் எதிர்பார்க்கப்படும் 14 ஆவது பொதுத்தேர்தலில், தீபகற்ப மலேசியாவில் துன் மகாதீர் தலைமையிலான பிரிபூமி மலேசியா கட்சி அதிகமான நாடாளுமன்றத் தொகுதிகளில், அதாவது 52 தொகுதிகளில் போட்டியிட உள்ளதாக தகவல் வெளியாகியுள்ளது.

இக்கட்சியை அடுத்து, 51 தொகுதிகளில் பிகேஆர் கட்சியும் 35 தொகுதிகளில் ஜசெகவும் 27 தொகுதிகளில் அமானா நெகாரா கட்சியும் போட்டியிட உள்ளன.  கடந்த பொதுத் தேர்தலில் போட்டியிட்ட தொகுதிகளில் 14 இடங்களை பிகேஆர் கட்சி,  பிரிபூமிக்கு விட்டுக் கொடுத்திருக்கிறது. பக்காத்தான்  கூட்டணியிலுள்ள எதிர்க்கட்சிகள் தங்களுக்கு இடையேயான தொகுதிப் பங்கீட்டை அறிவித்துள்ளன.

பிரதமர் டத்தோஶ்ரீ நஜிப்பின் தொகுதியான பெக்கானில் அவரை எதிர்த்து கடந்த முறை போட்டியிட்ட பிகேஆர், இம்முறை அந்தத் தொகுதியை பிரிபூமி கட்சிக்கு விட்டுக் கொடுத்துள்ளது.  எனவே, பிரதமர் நஜிப்பை எதிர்த்து துன் மகாதீரின் பிரிபூமி கட்சியின் வேட்பாளர் போட்டிடுவார்.

கடந்த தேர்தலின் போது எதிர்க்கட்சிகளின் கூட்டணியில் இருந்த பாஸ் கட்சி தற்போது அந்தக் கூட்டணியில் இல்லாததால், பாஸ் போட்டியிட்ட தொகுதிளில் பெரும்பாலானவை பிரிபூமிக்கும்  அமானாவுக்கும் பகிர்ந்தளிக்கப் பட்டுள்ளன.

மேலும், இம்முறை கிளந்தான் மாநிலத்தில் அதிகமான தொகுதிகளில் அதாவது 7 இடங்களில் பிரிபூமி கட்சியும் 5 இடங்களில் அமானா கட்சியும் 2 இடங்களில் பிகேஆர் கட்சியும் போட்டியிடுகின்றன.

அதேவேளையில், அம்னோவின் கோட்டையாக விளங்கும் ஜொகூர் மாநிலத்தில் பிரிபூமி 10 தொகுதிகளில் போட்டியிடவிருக்கிறது. ஶ்ரீகாடிங், பெங்கெராங், பொந்தியான்  மற்றும் மூவார் ஆகிய தொகுதிகளை பிரிபூமிக்கு பிகேஆர் விட்டுக் கொடுத்துள்ளது. 

மேலும் பேராவில் 8 நாடாளுமன்றத் தொகுதிகலில் பிரிபூமி போட்டியிடுகிறது. குறிப்பாக, தாப்பா தொகுதி பிரிபூமி கட்சிக்கு ஒதுக்கப் பட்டுள்ளது. அடுத்து தம்புன், பகான் சிராய், பாசீர் சாலாக் ஆகியவற்றிலும் அக்கட்சியே போட்டியிடுகிறது.

சிங்கை சிப்புட் தொகுதியில்  பிகேஆர் போட்டியிடுகிறது. இந்தத் தொகுதியில் கடந்த முறை பிகேஆர் சின்னத்தில் போட்டியிட்டு டாக்டர் சேவியர் ஜெயக்குமார் வென்றார். இவர் மலேசிய சோஸலிசக் கட்சியின் தலைவர் என்பது குறிப்பிடத்தக்கது. கெடாவில் 6 இடங்களிலும், பகாங்கில் 6 இடங்களிலும் பிரிபூமி போட்டியிடத் தயாராக இருக்கிறது.

 

 

 

 

 

 

 

 

கோலாலம்பூர், ஜன.7- பிகேஆர் ஆலோசகர்  டத்தோஸ்ரீ அன்வார் இப்ராகிம் ஜூன்-8 ஆம் தேதியன்று சிறையில் இருந்து விடுவிக்கப்படுவார் என்று சிறைச்சாலை தலைமை இயக்குநர் ஜூல்கிப்ளி ஓமார் தெரிவித்தார். 

1995 ஆம் ஆண்டில் சிறைச்சாலை சட்டத்தின் 44 ஆவது பிரிவின்படி விதிக்கப்பட்ட தண்டனையின் கீழ் அவர் சிறையில் கழித்த நாள்களைக் கணக்கெடுக்கப்பட்டி ருப்பதாக அவர் சொன்னார். 

அன்வாரின் தண்டனை ஜூன் 10ஆம் தேதி முடிவிற்குக் வருகிறது. என்றாலும் அந்த நாள் ஞாயிற்றுக்கிழமை என்பதால் அதற்கு 2 நாள்களுக்கு முன்பாக வேலை 

நாளான வெள்ளிக்கிழமையன்றே அவர் விடுவிக்கப்படுவார் என சிறைச்சாலை தலைமை இயக்குனர் ஜூல்கிப்ளி கூறினார். 

இந்தத் தேதி மாற்றுவதற்கான எந்தவொரு உத்தரவையும் அரசாங்கத்திடமிருந்து சிறைச்சாலைத்துறை இதுவரை பெறவில்லை என்று அவர் சொன்னார். 

    

ஷா ஆலாம், ஜன.7- அடுத்த பொதுத் தேர்தலில் பக்காத்தான் ஹராப்பான் வெற்றிபெறுமேயானால் துன் மகாதீர் பிரதமர் பொறுப்பை ஏற்பார். எதிர்க்கட்சி களின் பிரதமர் வேட்பாளராக அவர் இன்று ஏகமனதாக தேர்ந்தெடுக்கப்பட்டார்.

அதேவேளையில் துணைப்பிரதமர் வேட்பாளராக டத்தோஸ்ரீ டாக்டர் வான் அஜீஸா  வான் இஸ்மாயில் நியமிக்கப்பட்டுள்ளார் என்று பக்காத்தான் தலைமைச் செயலாளர் டத்தோ சைபுடின் அப்துல்லா கூறினார்.

பாரிசானிடமிருந்து புத்ராஜெயா ஆட்சியை பக்காத்தான் கூட்டணி வெல்லுமேயானால், பிகேஆர் கட்சியின் ஆலோசகராக டத்தோஸ்ரீ அன்வார் இப்ராகிமிற்கு அரச பொது மன்னிப்பு வழங்குவதற்கு எதிர்க்கட்சி கூட்டணி விண்ணப்பம் செய்ய ஏகமனதாக முடிவு செய்திருக்கிறது. 

பிரிபூமிசெர்சத்து கட்சி, பிகேஆர், ஜசெகா மற்றும் அமானா நெகாரா ஆகிய நான்கு கட்சிகள் இந்த முடிவை ஏகமனதாக எடுத்தன.

கோலாலம்பூர், ஜன.5- எதிர்வரும் 14-ஆவது பொதுத் தேர்தலில் இந்திய வாக்காளர்களின் வாக்குகளை வெல்லும் பொருட்டு, தேசிய முன்னணியின் இதர இந்திய பங்காளிக் கட்சிகளுடன் மஇகா ஒன்றிணைந்து பேரணி நடத்த வேண்டிய அவசியம் இல்லை என்று அதன் தேசியத் தலைவர் டத்தோஶ்ரீ டாக்டர் எஸ்.சுப்ரமணியம் கூறினார்.  

"இந்தியர்களின் வாக்குகளை தேசிய முன்னணியின் பக்கம் திருப்புவதற்கு மஇகா வேறு வழிமுறையை பின்பற்றும். ஒன்றிணைந்து பேரணி நடத்துவதன் மூலமாக இந்தியர்கள் வாக்குகளை நாம் வென்று விடமுடியாது. தேசிய முன்னணியின் இதர பங்காளிக் கட்சிகளில், குறிப்பாக கெராக்கான் கட்சியில் பல்வேறு இனத்தவர்கள் உள்ளனர். அதனால் ஒன்றிணைந்து பேரணி நடத்துவது என்பது அவர்களுக்கு பொருத்தமான அணுகுமுறையாக இருக்கலாம்" என்று சிம்பாங் லீமா தேசிய வகை தமிழ் ஆரம்ப்ப்பள்ளியில் நடைப்பெற்ற நிகழ்ச்சி ஒன்றில் கலந்து கொண்ட போது டாக்டர் சுப்ரா அவ்வாறு சொன்னார்.  

அந்நிகழ்ச்சியில் கல்வி அமைச்சின் துணை அமைச்சர் டத்தோ பி.கமலநாதனும் கலந்து கொண்டார்.  

தேசிய முன்னணிக்கு ஆதரவாக செயல்பட்டு வரும் இதர இந்திய பங்காளி கட்சிகளுடன் மஇகா நல்லுறவை பேணி வருகிறது. இந்திய மக்களின் ஆதரவுகளை எவ்வாறு தேசிய முன்னணியின் பக்கம் திருப்புவது என்பது குறித்து அக்கட்சிகளுடன் மஇகா கலந்தாலோசித்து வருகின்ற போதிலும், ஒன்று கூடும் பேரணிக்கு அவசியம் ஏதும் இல்லை என்று சுப்ரா தெரிவித்தார்.

எதிர்வரும் பொதுத் தேர்தலில், மக்கள் தங்களின் ஆதரவுகளை தேசிய முன்னணிக்கு வழங்குவதை உறுதி செய்யும் பொருட்டு மசீச மற்றும் கெராக்கான் கட்சிகள் நாளை ஒன்றிணைந்து ஜாலான் அம்பாங்கிலுள்ள மசீச கட்டிடத்தில் பேரணி ஒன்றை நடத்தவிருக்கின்றன என்பது குறிப்பிடத்தக்கது. 

அவ்விரு கட்சிகளுக்கு இடையிலான நல்லிணக்கத்தை மெருகூட்டும் வகையிலும் தாங்கள் ஒன்றாக இணைந்து செயல்படவிருப்பதாக மசீச பொதுச் செயலாளர் டத்தோஶ்ரீ ஒங் கா சுவான் மற்றும் கெராக்கான் கட்சியின் பொதுச் செயலாளர் டத்தோ லியாங் தெக் மெங் ஆகிய இருவரும் தகவல் தெரிவித்துள்ளனர்.  

இதனிடையில், எதிர்வரும் பொதுத் தேர்தலில் மஇகா சார்பில் போட்டியிடவிருக்கும் வேட்பாளர்களின் பட்டியலை பிரதமர் டத்தோஶ்ரீ நஜிப் ரசாக்கிடம் மஇகா சமர்ப்பித்து விட்டதாகவும், அது குறித்த இறுதி முடிவை பிரதமரே முடிவு செய்வார் என்றும் டாக்டர் சுப்ரா கூறினார். 

ஷா ஆலாம், ஜன.4- சிலாங்கூர் மந்திரி புசார் டத்தோஶ்ரீ அஸ்மின் அலி மற்றும் பிகேஆர் மகளிர் தலைவி ஸுரைய்டா கமாரூடின் ஆகிய இருவரும் எதிர்வரும் பொதுத் தேர்தலின் போது, ஷா ஆலாம் மற்றும் உலு லங்காட் நாடாளுமன்றத் தொகுதிகளில் போட்டியிடவிருப்பதாக தகவல்கள் வெளியாகியுள்ளன. 

அவ்விருவரின் பெயர்கள் மற்றும் அவர்கள் போட்டியிடக்கூடும் நாடாளுமன்றத் தொகுதிகள் குறித்த தகவல்கள் சிலாங்கூர் பக்காத்தான் ஹராப்பான் தேர்தல் குழுவிடம் சமர்ப்பிக்கப்பட்டுள்ளது என்று கூறப்பட்டுள்ளது. 

கடந்த 2013-ஆம் ஆண்டின் 13-ஆவது பொதுத் தேர்தலின் போது அவ்விரு தொகுதிகளிலும், பாஸ் கட்சி போட்டியிட்டு வெற்றிப் பெற்றது என்பது குறிப்பிடத்தக்கது. 

ஆவ்விரு தொகுதிகளிலும் பிகேஆர் போட்டியிடலாம். ஆனால், இது குறித்து பேச்சு வார்த்தைதான் நிகழ்த்தப்பட்டு வருகின்றன. பக்காத்தான் ஹராப்பானின் அனைத்து பங்காளி கட்சிகளும் ஒப்புக் கொண்டால் மட்டுமே இது சாத்தியப்படும்" எனத் தகவல் வெளியாகியுள்ளது.

ஜசெக, பிரிபூமி கட்சி, பெர்சாத்து மலேசியா மற்றும் அமானா ஆகிய கட்சிகள், பக்காத்தான் ஹராப்பானின் பங்காளி கட்சிகளாகும். 

பிகேஆர் கட்சியின் துணைத் தலைவரான அஸ்மின் அலி, கோம்பாக் நாடாளுமன்ற உறுப்பினராவார். புக்கிட் அந்தாராபங்சாவின் சட்டமன்ற உறுப்பினர் பதவியையும் அவர் வகித்து வருகிறார். இதனிடையில், ஸுரைய்டா அம்பாங் நாடாளுமன்றத் தொகுதி உறுப்பினராவார்.  

சிலாங்கூர் மாநிலத்தில் 56 நாடாளுமன்றத் தொகுதிகள் உள்ளன. அவற்றில் 16 தொகுதிகளை கடந்த பொதுத் தேர்தலில் ஜசெக கட்சி வென்றது. பிகேஆர் மற்றும் பாஸ் கட்சிகள் அம்மாநிலத்தின் தலா 13 தொகுதிகளை வென்றன. தேசிய முன்னணி 12 தொகுதிகளையும் சுயேட்சை வேட்பாளர்கள் 2 தொகுதிகளையும் வென்றனர். 

More Articles ...