கோலாலம்பூர், ஏப்ரல்.26- 1 எம்.டி.பியின் தலைமை செயல்நிலை  நிர்வாக அதிகாரியான அருள் கந்தா, தற்போது, அந்நிறுவனம் என்ன செய்து வருகிறது என்பது குறித்தும், அந்நிறுவனத்தின் மீது சுமத்தப்பட்டுள்ள குற்றச்சாட்டுகளில் உண்மை ஏதும் இல்லை என்றும் வாக்காளர்களிடம் தெளிவுப் படுத்தி வருகிறார். 

இதுவரை, சுமார் 25 பகுதிகளிலுள்ள 30,000 மக்களுக்கு அந்நிறுவனத்தின் செயல்பாடு குறித்து அவர் விவரித்து வருகிறார். 14-ஆவது பொதுத் தேர்தலை முன்னிட்டு, அரசு சாரா நிறுவனங்கள், அரசாங்கத்தை ஆதரிக்கும் நிறுவனங்களின் உதவியோடு, அருள் கந்தா அந்த விளக்கத்தை மக்களுக்கு அளித்து வருகிறார்.  

உண்மையில் நடந்தது என்ன என்ற அடிப்படையில் தான், மக்களுக்கு 1எம்.டி.பி விவகாரம் குறித்து தாம் விளக்கமளித்து வருவதாகவும், அரசியலில் நுழையும் எண்ணத்திலோ அல்லது அரசாங்கத்திற்கு நற்பெயரை சேர்ப்பதற்காக தாம் இதனைச் செய்யவில்லை என்று அருள் கந்தா சிங்கப்பூர் தொலைக்காட்சி நிறுவனத்துடனான பேட்டியின் போது தெரிவித்தார்.   

இருந்த போதிலும், வேட்பாளர்கள் மனு தாக்கல் இன்னும் இரு நாட்களில் நடைபெறவிருக்கிறது என்றும், அந்த இரு நாட்களில் என்ன வேண்டுமானாலும் நடக்கலாம் என்றும் அவர் சொன்னார். 

“இது என்னை நான் விளம்பரப் படுத்திக் கொள்ளும் செயல்..என்னுள் பல திறமைகள் உள்ளன என்பதை நான் உணர்கிறேன். மறுசீரமைக்கும் திறன், முதலீட்டு பின்னணி மற்றும் மக்களுடன் சிறப்பாக உரையாட என்னால் முடியும். இதனைக் கருத்தில் கொண்டு, என்னை அரசியலில் ஏற்றுக் கொள்வதா இல்லையா என்று அரசாங்கம் முடிவெடுக்கட்டும்” என்றார் அவர். 

 

புத்ராஜெயா, எப்ரல்.26- தேர்தல் அதிகாரிகள் குறித்து சமூக வலைத்தளங்களில் வெளியிடப்படும் போலித் தகவல்களை, வாக்காளர்கள் நம்ப வேண்டாம் என்று தேர்தல் ஆணையம் அறிவுறுத்தியுள்ளது. 

தேர்தல் ஆணையத்தின் அதிகாரிகளின் நற்பெயருக்கு களங்கம் விளைவித்து, தேர்தலின் போது பிரச்சனைகளை தூண்டும் நோக்கில் அந்தப் போலித் தகவல்கள் பகிரப் பட்டு வருவதாக தேர்தல் ஆணையத்தின் தலைவர் முகமட் ஹஷிம் அப்துல்லா கூறினார். 

குறுஞ்செய்தி, வீடியோச் செய்தியாக பகிரப் படும் இந்தப் போலித் தகவல்கள், தேர்தல் ஆணையத்தின் மீது மக்கள் நம்பிக்கையை இழக்கும் வகையில் அமைந்துள்ளதாக அவர் தெரிவித்தார். 

“போலீஸ் துறை மற்றும் மலேசிய தொலைத் தொடர்பு மற்றும் பல்லூடக அமைச்சுடன் கலந்தாலோசித்து, இந்தப் போலிச் செய்திகள் குறித்து என்ன நடவடிக்கை எடுக்கப்பட வேண்டும் என்று தேர்தல் ஆணையம் முடிவெடிக்கும்” என்று அவர் சொன்னார்.  

வாக்குச் சீட்டுகளில் அடையாளம் குறிக்கும் முறைகளை, தேர்தல் ஆணையத்துடன் சம்பந்தமில்லாத சில நிறுவனங்கள் செய்து வருவதாகவும், காவல் நிலையங்களில் வைக்கப்படும் வாக்குப் பெட்டிகளை, அனுமதியின்று தேர்தல் அதிகாரிகள் தங்களின் இஷ்டத்திற்கு எடுத்துச் செல்ல முடியும் என்பதை விளக்கும் வீடியோ பதிவுகளும் சமூக வலைத்தளங்களில் பகிரப் பட்டு வருகின்றன.  

கருப்பு நிறத்தில் அடையாளக் குறிப்பு கொண்ட வாக்குச் சீட்டுகளில், மலேசியர்கள் அல்லாதவர்கள் வாக்களித்துள்ளனர் என்ற செய்தியையும் அந்த வீடியோ பதிவுகள் வாயிலாக வெளியிடப்பட்டுள்ளது. மேலும், மக்களின் தனிநபர் விவரங்கள் ‘களவுச் செய்யப்பட்டு’ அதன் வாயிலாக கள்ள வாக்குகள் போடப் படுகின்றன என்றும் அந்த வீடியோ பதிவுகள் தெரிவித்துள்ளன. 

 

ஈப்போ, ஏப்ரல்.26- மைபிபிபி கட்சியின் தலைவரான டான்ஶ்ரீ  எம்.கேவியஸ், தனது கட்சியிலிருந்து ராஜினாமா செய்ததால், இப்பொதுத் தேர்தலில் தேசிய முன்னணிக்கு எவ்வித பாதகமும் நேராது என்று மஇகா தேசியத் தலைவரான டத்தோஶ்ரீ டாக்டர் எஸ். சுப்பிரமணியம் கூறினார்.

“மைபிபிபி கட்சித் தலைவரான கேவியஸ் தனது கட்சி உறுப்பினர்களால் நீக்கப்பட்டார் என்ற செய்தியையும் நான் இன்று படித்தேன். அவர் ராஜினாமா செய்துள்ளார் என்றும் தெரிவிக்கப்பட்டுள்ளது. கட்சியினுள் உட்பூசல் ஏற்பட்டுள்ளது என்பது இதன் வாயிலாக தெரிகிறது” என்று  டாக்டர் சுப்பிரமணியம் கருத்துரைத்தார். 

“அவரின் ராஜினாமாவால் தேசிய முன்னணிக்கோ, அல்லது கூட்டணியின் இதர கட்சிகளுக்கோ எவ்வித பாதகமும் ஏற்படாது. மைபிபிபிக்குள் எழுந்த பிரச்சனை, கட்சிப் பிரச்சனையாகும்” என்றார் அவர். 

மைபிபிபி கட்சிக்கு இந்தியர்களின் ஆதரவு அதிகமாக உள்ள தொகுதிகளில், மஇகா தனது வேட்பாளர்களை நியமிக்க முயற்சிகளை எடுக்கலாம். மைபிபிபி கட்சியினருக்கு இடையிலான பிரச்சனைகள் களையும் வரை, அவர்களுக்கு மஇகா உதவக் கூடும் என்று அவர் சொன்னார். 

மைபிபிபி கட்சியின் அனைத்து பதவிகளிலிருந்தும் தாம் ஏப்ரல் மாதம் 23-ஆம் தேதியன்று ராஜினாமா செய்ததாக கேவியஸ் தனது டுவிட்டர் பக்கத்தில் தெரிவித்திருந்தார்.

கேமரன் மலைத் தொகுதியில் போட்டியிடும் வாய்ப்பு மைபிபிபிக்கு வழங்கப்பட வேண்டும் என்ற தனது கோரிக்கை மறுக்கப்பட்டதால் கேவியஸ் தனது பதவியிலிருந்து வெளியேறுவதாக தெரிவிக்கப்பட்டுள்ளது. கேமரன் மலைத் தொகுதியில் இம்முறை மஇகா இளைஞர் பிரிவுத் தலைவர் டத்தோ சி.சிவராஜ் போட்டியிடுவார் என்று தே.மு அறிவித்துள்ளது. 

“ஈப்போ பாராட் மஇகா கிளைத் தலைவர் டான்ஶ்ரீ டி.ராஜு மற்றும் தங்கராணி ஆகிய இருவரும், மைபிபிபி கட்சியின் கிளைத் தலைவர்களுடன் கலந்து பேசி, அங்கு இந்தியர்களின் தேவை குறித்து அறிந்துக் கொள்ளும் முயற்சியில் ஈடுபடுவர்” என்று டாக்டர் சுப்பிரமணியம் சொன்னார். 

மஇகா மைபிபிபிக்கு எதிரி அல்ல. தேசிய முன்னணி கூட்டணியின் கூட்டு கட்சியான மைபிபிபிக்கு எங்களின் ஆதரவு என்றும் உண்டு. இரு கட்சிகளுக்கும் இடையிலான பேச்சு வார்த்தை கால தாமதமாக தொடங்கப்பட்டது. அதனால்தான், எங்களால் இரு கட்சிக்கும் ஏற்ற நல்ல முடிவினை எடுக்க முடியவில்லை” என்று அவர் கூறினார்.

 

கோலாலம்பூர், ஏப்ரல்.26- கடந்த 2013-ஆம் ஆண்டின் பொதுத் தேர்தலில், மிகக் குறைந்த வாக்குகள் பெரும்பான்மையில் மட்டுமே தேசிய முன்னணி வெற்றிப் பெற்றது. அந்த நிலை இம்முறை நிகழாது என்றும், அதிக வாக்குகள் பெரும்பான்மையில் தே.மு வெற்றி வாகை சூடும் என்று பிரதமர் டத்தோஶ்ரீ நஜிப் ரசாக் நம்பிக்கை தெரிவித்துள்ளார்.

கடந்த 2009-ஆம் ஆண்டு, நஜிப் பிரதமராக பொறுப்பேற்க வழி வகுத்த முன்னாள் பிரதமர் துன் மகாதீர், இம்முறை எதிர்கட்சியின் தலைவராக நியமிக்கப்பட்டுள்ளார். 

இப்பொதுத் தேர்தலில் தேசிய முன்னணி வெற்றிப் பெற்று, தாம் மீண்டும் பிரதமராக பொறுப்பேற்றால், மலேசிய பொருளாதாரத்தில் தலைக்கும் என்றும், வணிக வரிகள் குறைக்கப்படும் என்றும் நஜிப் தெரிவித்துள்ளார். 

“கடந்த பொதுத் தேர்தலைக் காட்டிலும், இம்முறை நாங்கள் வெற்றிப் பெறும் வாய்ப்பு பிரகாசமாக இருப்பதாகவே நாங்கள் நம்புகிறோம். 13-ஆவது பொதுத் தேர்தலில், குறைந்த வாக்குகள் பெரும்பான்மையில் தான் நாங்கள் வெற்றி பெற்றோம். அந்த நிலை இம்முறை தொடராது. அரசாங்க மாற்றம் ஏற்படுவதற்கான வாய்ப்புகளும் குறைவாகவே உள்ளன” என்று அவர் கருத்து தெரிவித்தார். 

மகாதீர் மலாய்க்காரர்களின் நன்மைக்காகவே பல ஆண்டுகளாக பாடு பட்டவர். அவருடன் கூட்டணி அமைத்திருக்கும் ஜசெக சீனர்களின் நன்மைக்காக பாடுபடும் கட்சியாகும். இவர்கள் ஒன்றாக செயல்பட முடியாது. அவர்களுக்குள் கருத்து வேறுபாடு கண்டிப்பாக ஏற்படும் என்று நஜிப் கூறினார். 

கடந்த மூன்று ஆண்டுகளாக 1 எம்.டி.பி சர்ச்சையில் மாட்டிக் கொண்டிருக்கும் பிரதமர் நஜிப்பிற்கும் மகாதீருக்கும் ஏற்பட்ட கருத்து வேறு பாட்டினால் தான் மகாதீர் எதிர்கட்சியுடன் இணைந்தார் என்பது குறிப்பிடத்தக்கது. 

“ஒருவரை திருடன் என்று கூறுவதால் அவன் திருடன் ஆகி விட முடியாது. அவன் திருடினான் என்பதற்கு தகுந்த ஆதாரம் வேண்டும். 1 எம்.டி.பியில் ஊழல் நிகழ்ந்த்து என்றும், அந்த பணத்தை நான் எடுத்தேன் என்று சுமத்தப்பட்டுள்ள குற்றச்சாட்டும் அதே போன்றுதான்” என்று நஜிப் சொன்னார்.

மலாய்க்காரர்களின் நலனில் தேசிய முன்னணி அதிக கவனம் செலுத்துவதால், கடந்த பொதுத் தேர்தலில், சீனர்கள் அக்கூட்டணியை ஒரேடியாக புறக்கணித்தனர். எதிர்கட்சி ஆட்சியைப் பிடித்தால், மலாய்க்காரர்கள் ‘பிச்சைக்கார்ர்களாக’ மாறும் நாட்கள் வெகுத் தொலைவில் இல்லை என்று நஜிப் கடந்த 2016-ஆம் ஆண்டு தெரிவித்தார். 

 

கோலாலம்பூர், ஏப்ரல்.24- வெளிநாட்டில் வசிக்கும் மலேசியர்கள் தங்களின் வாக்குகளை பதிவுச் செய்யும் பொருட்டு, அவர்களுக்கான வாக்குச் சீட்டுகளை தேர்தல் ஆணையம் எவ்வாறு அனுப்பி வைக்கும்? என்பது குறித்து விவரங்கள் வழங்கப்பட வேண்டும் என்று 'பெர்சே' இயக்கம் வலியுறுத்தியுள்ளது. 

மலேசியாவிலிருந்து அனுப்பி வைக்கப்படும் வாக்குச் சீட்டுகளில் தங்களின் வாக்குகளை பதிவு செய்து, மே மாதம் 9-ஆம் தேதிக்குள், அங்கிருந்து நாடு திரும்பும் தேர்தல் அதிகாரிகளிடம் வாக்காளர்கள்  தங்களின் வாக்குகளை திருப்பி அனுப்பி வைக்க முடியுமா என்ற சந்தேகத்தின் அடிப்படையில், தேர்தல் ஆணையம் அது குறித்து விவரிக்க வேண்டும் என்று பெர்சே கேட்டுக் கொண்டுள்ளது. 

வேட்புமனு தாக்கல் செய்யப்பட்ட பின்னரே, தேர்தல் ஆணையம் வெளிநாடுகளில் வசிக்கும் மலேசியர்களுக்கு வாக்குச் சீட்டுகளை அனுப்பி வைக்க விருப்பதாக பெர்சே அமைப்பின் இடைக்கால தலைவரான ஷாரூல் அமான் முகமட் சாரி கூறினார்.

“சனிக்கிழமை மற்றும் ஞாயிற்றுக்கிழமை வேலை நாட்கள் அல்ல. அதன் பின்னர், தொழிலாளர் தின விடுமுறை வழங்கப்படும். குறிப்பிட்ட கால அவகாசத்திற்குள், உலகின் பல்வேறு நாடுகளில் உள்ள மலேசியர்களிடம் இந்த வாக்குச் சீட்டுகள் அனுப்பி வைக்கப் பட்டு, மே மாதம் 9-ஆம் தேதிக்குள், திரும்ப மலேசியாவிற்கு கொண்டு வரப்பட்டு விடுமா?” என்று அவர் கேள்வி எழுப்பினார். 

இவ்வாண்டு, வழக்கத்திற்கு மாறாக, தேர்தல் ஆணையம், வாக்குச் சீட்டுகளை, வெளிநாட்டில் வசிக்கும் மலேசியர்களின் முகவரிகளுக்கு நேரிடையாக அனுப்பி 

‘போஸ் லாஜூ’ எனப்படும் அஞ்சல் சேவையை உபயோகித்து, அவர்களுக்கு வாக்குச் சீட்டுகள் அனுப்பி வைக்கப்படும் என்று தேர்தல் ஆணையத்தின் தலைவர் முகமட் ஹஷீம் அப்துல்லா கூறியுள்ளார்.

புத்ராஜெயா, ஏப்ரல்.26 –பிரதமரின் துணைவியார் டத்தின்ஶ்ரீ ரோஸ்மா மன்சோரின் பிறந்த நாள் 'கேக்' அரசாங்கப் பணத்தில் வாங்கப் பட்டிருப்பதாகவும், அவருடைய புத்ராஜெயா அலுவலகத்திற்கு உள் கண்காணிப்பு காமிராக்கள் பொருத்தப்பட்டது அரசாங்க செலவில்தான் என்றும் வெளியான தகவல்கள் போலியானவை.

பிரதமரின் அலுவலகம், முகநூலில் வெளியிட்டுள்ள அறிக்கை ஒன்றில் இதனைத் தெரிவித்துள்ளது. தனிநபர் ஒருவர், தனது குரல் பதிவை 'வாட்ஸ்- அப்' பில் பதிவேற்றியுள்ளார். அதில் மேற்கண்டவாறு குற்றஞ்சாட்டியுள்ளார்.

இந்தத் தனிநபரின் குற்றச்சாட்டு முற்றிலும் அரசியல் உள்நோக்கத்துடன் மக்களைத் தூண்டி விடுவதாக அமைந்துள்ளது என்று பிரதமர் அலுவலக அறிக்கை கூறியது.

அண்மைய காலமாக இது போன்ற போலித் தகவல்கள் சமூக ஊடகங்களில் கடுமையாக பரவி வருகின்றன. குறிப்பாக வாட்ஸ்- ஆப், டெலிகிராம் போன்றவற்றில், அடுத்து வரும் பொதுத் தேர்தலை முன்னிட்டு இத்தகைய போலிச் செய்திகள் பரப்பப்படுகின்றன.

மேலும் ஜிஎஸ்டி மூலம் வசூலிக்கப்பட்ட வரியில் 70.1 மில்லியன் ரிங்கிட் நிதியமைச்சில் இருந்து காணாமல் போய் விட்டதாகவும், போலிச் செய்திகள் பரப்பப்படுவதை பிரதமர் அலுவலகம் கண்டித்துள்ளது.

கோலாலம்பூர், ஏப்ரல்.25- மஇகாவின் முன்னாள் மத்திய செயலவை உறுப்பினரான டத்தோ ரகு மூர்த்தி என்ற காயத்ரி மூர்த்தி மஇகாவிலிருந்து விலகுவதாக அறிவித்துள்ளார்.

தம்முடைய விலகலை அறிவிக்கும் கடிதத்தை மஇகா தலைமையகத்திற்கு அவர் அனுப்பியுள்ளார். அக்கடிதத்தில் அவர் கீழ் கண்டவாறு கூறியுள்ளார்.

மஇகாவில்,  இங்கே குறிப்பிட்டுள்ள பொறுப்புகளில் இருந்து நான் விலகிக் கொள்கிறேன் என்பதை இதன் வழி தெரிவித்துக் கொள்கிறேன்.

## மஇகாவின் உறுப்பினராக இருப்பதில் இருந்து நான் விலகிக் கொள்கிறேன்.

##  கிள்ளான், ஜாலான் துங்கு கிளானா கிளைத் தலைவர் பொறுப்பில் இருந்தும் விலகிக் கொள்கிறேன்.

கட்சியில் இருந்து சேவையாற்றுவதற்கு இதுவரை எனக்களித்த வாய்ப்புக்கு நன்றி கூறிக் கொள்கிறேன். கட்சியின் எதிர்கால நலன்களுக்கு வாழ்த்துக்களைக் கூறிக்கொள்கிறேன் -இவ்வாறு தம்முடைய ராஜினாமா கடிதத்தில் காயத்திரி ரகு மூர்த்தி கூறியுள்ளார். 

பொதுவாக, அவர் தமது ராஜினாமா கடிதத்தில் தம்முடைய விலகலுக்கான காரணம் எதனையும் கூறவில்லை என்றாலும் அண்மைய  பொதுத்தேர்தலுக்கான மஇகாவின் வேட்பாளர் தேர்வுகளில் அவர் அதிருப்தி அடைந்திருப்பதாக அரசியல் வட்டாரங்கள் கூறின.

 

More Articles ...