கோலாலம்பூர், மே.22- பிரதமர் நஜீப்பிற்கு கிடைத்த ரிம. 2.6 பில்லியன் நன்கொடைத் தொகை ஏற்படுத்திய சர்ச்சை இன்னும் தீராத நிலையில், அத்தொகையிலிருந்து டான்ஶ்ரீ மொகிதீன் யாசினுக்கும் டத்தோஶ்ரீ ஷாப்பி அப்டாலுக்கும் பங்கு கிடைத்தது என சுற்றுலா துறை அமைச்சர் டத்தோஶ்ரீ நஸ்ரி அஸீஸ் கூறினார்.

அம்னோவில் உறுப்பினர்களாக இருந்தபோது அவர்களுக்கு இப்பணம் தரப்பட்டது என்று நேற்று நடந்த கேள்வி-பதில் நிகழ்ச்சியில் அவர் தெரிவித்தார். 

“எனக்கும் அந்த பணத்திலிருந்து பங்கு கிடைத்தது. தேர்தல் நன்கொடையான அப்பணம், அம்னோ கிளைகளின் தேர்தல் பிரச்சாரத்திற்காகவும் கிளை உறுப்பினர்களின் வீடு பழுதுபார்ப்பதற்காகவும்  தரப்பட்டது. ஒவ்வொரு கிளைக்கும் ரிம 5000 கிடைத்தது. எனக்கு கீழ் இயங்கிய கிளைகளுக்கான 10 லட்சம் ரிங்கிட் என்னிடம் தரப்பட்டது” என்றார் நஸ்ரி.

நஸ்ரியை விட, மொகிதீன் யாசின் மற்றும் ஷாப்பி அப்டால் கீழ் அதிக கிளைகள் இயங்கி வந்ததால் அவர்களுக்கு அதிக பணம் கிடைத்திருக்க வாய்ப்புள்ளது என்று அவர் மேலும் கூறினார். 

ஆனால், பணம் வாங்கியபோது கேள்வி ஏதும் அவர்கள் கேட்கவில்லை. அப்பணத்தின் மூலத்தையும் அவர்கள் விசாரிக்கவில்லை. ஆனால், அவர்களின் அரசியல் ஆசை நிறைவேறாத போது பல கேள்விகளை எழுப்புகின்றனர்.

தேர்தலுக்கு நன்கொடைப் பெறுவது தவறில்லை. மேலும், தேர்தல் நன்கொடையான அப்பணம் நஜீப்பின் சொந்த வங்கி கணக்கில் இருப்பதிலும் எந்தவித தவறும் இல்லை என்றும் நஸ்ரி கூறினார். 

“அவரது சொந்த கணக்கில் இருந்தால் தான் எவ்வளவு பணம் செலவு செய்யப்படுகிறது என்று நஜீப்பிற்கு தெரியும். இல்லையேல் செலவீனங்களை கணக்கு செய்வதில் கடினம் ஏற்படும்” என்றும் நஸ்ரி சொன்னார்.

கடந்த பொதுத் தேர்தலுக்கு அந்நன்கொடை பணத்திலிருந்து அம்னோ செய்த செலவு கிட்டத்தட்ட ரிம. 60 கோடி என்றும் நஸ்ரி விவரித்தார்.

 ஹானோய், மே.22- பொதுத்தேர்தல் எந்த நேரத்திலும் நடத்தப்படலாம் என்ற சூழ்நிலையில் வாழ்க்கைச் செலவினம் தான் மிகுந்த கவலை அளிக்கக்கூடிய அம்சமாக உருவெடுத்திருக்கிறது என்று வர்த்தக அமைச்சர் டத்தோஶ்ரீ முஸ்தபா முகமட் தெரிவித்துள்ளார்.

வாழ்க்கைச் செலவினம் அதிகரித்திருப்பது தொடர்பில் மக்களிடையே அதிருப்திகளை ஏற்படுத்துவதற்கான வழிகளில் எதிர்க்கட்சிகள் கவனம் செலுத்தி வருகின்றன. ஏற்கெனவே, இடைத்தேர்தல்களின் போது மாநிலங்களின் நிதிப் பிரச்சனைகள் மற்றும் பிரதமர் தொடர்பாக நிதிமுறைகேடு புகார்கள் என்று பல பிரச்சனைகளைக் கிளப்பி அவர்கள் தோல்வி கண்டுவிட்டனர். என்று அவர் சாடினார்.

அடுத்து வரவிருக்கும் பொதுத்தேர்தலின் போது வாழ்க்கைச் செலவினப் பிரச்சனை தான் மலேசிய வாக்காளர்களிடையே மிக முக்கிய பிரச்சனையாக இருக்கும். இதுதான் தேர்தல் பிரசாரங்களின் போது அதிகம் பேசப்படலாம் என்றார் அவர்.

எப்போது பொதுத்தேர்தல் என்பதை பிரதமரே முடிவு செய்வார். சரியான தருணம் பார்த்து அந்த அதிரடி அறிவிப்பு வரலாம். எதிர்க்கட்சியினர் பிளவுபட்டிருப்பது ஒருவகையில் ஆளுங்கட்சிக்கு சாதகமாக இருக்கும் நிலையில், வாக்காளர்களுடனான தொடர்பை மேம்படுத்துவதில் ஆளுங்கூட்டணி தீவிரம் காட்டி வருகிறது என்று வியட்னாமிற்கு வருகை புரிந்திருக்கும் அமைச்சர் முஸ்தபா முகமட் செய்தியாளர்களிடம் பேசும் போது குறிப்பிட்டார். 

 

 

கோலாலம்பூர், மே.22- தனது கடந்த கால பாவங்களைச் சரி செய்யவே அன்வாரை விடுவிக்கும் மகஜரில் மகாதீர் கையெழுதிட்டார் என துணைப் பிரதமர் டத்தோஶ்ரீ ஸாஹிட் ஹமிடி சாடியுள்ளார்.

பிரதமராக இருந்த காலத்தில் அன்வார் மீது பழி சுமத்தி மகாதீரே சிறையிலிட்டார். பதவியில் இருந்த போது அதிகாரத்தை துஷ்பிரயோகம் செய்ததற்காக இப்போது பாவத்தைக் கழுவ அதற்கான பரிகாரத்தை அவர் செய்கிறார் என்றார் ஸாஹிட்.

“மகாதீரைப் போல தனிமனித விரோதத்தினால் அன்வாரை நாங்கள் (அரசாங்கம்) சிறைக்கு அனுப்பவில்லை. அவர் செய்த ஓரினப் புணர்ச்சி குற்றத்திற்காகவே சட்டப்படி அவர் தண்டனை பெற்றார்” என்றும் ஸாஹிட் கூறினார்.

இதனிடையே அன்வாரை விடுவிக்கக் கோரி தேசிய மன்னிப்பு வாரியத்திற்கு அவருடைய மனைவி டத்தின்ஶ்ரீ வான் அஸிசா முறையீட்டு கடிதம் ஒன்றைச் சமர்ப்பித்துள்ளார். இந்த வாரியம் மாமன்னர் அதிகாரத்திற்கு உட்பட்டு இருப்பதால் அரசாங்கம் இதில் தலையிட முடியாது என்று வான் அஸிசா அறிக்கை விடுத்தார்.

நேற்று நடந்த பிகேஆர் கட்சியின் தேசிய மாநாட்டில் எதிர்க்கட்சி தலைவர்கள் கலந்து கொண்டு அன்வாரை விடுதலை செய்ய வேண்டும் என்ற மகஜரில் கையெழுத்திட்டனர். அதில் மகாதீரும் அவர் மனைவி சித்தி ஹஸ்மாவும் உட்பட கையெழுத்திட்டனர்.

எதிர்க்கட்சி கூட்டணி ஆட்சியைப் பிடித்தால் அன்வாரே அடுத்த பிரதமர் என்றும் இந்த மாநாட்டில் மகாதீர் முன்னிலையில் பிரகடனப்படுத்தப்பட்டது குறிப்பிடத்தக்கது.

ஷாஆலம், மே.21- பிகேஆர் கட்சியின் 12ஆவது தேசிய மாநாட்டில், எதிர்க்கட்சி கூட்டணி ஆட்சியைப் பிடித்தால், நாட்டின் 7ஆவது பிரதமராக அன்வாரே பொறுப்பேற்பார் என்று அறிவிக்கப்பட்டது.

மாநாட்டில் தொடக்கத்தில் அக்கட்சியின் தலைவரான வான் அஸீசா மிக உணர்ச்சிப்பூர்வமான உரை ஒன்றை பேராளர்களுக்காக நிகழ்த்தினார்.

அன்வாரின் கடந்த காலப் போராட்டங்களை அவர் நினவு கூர்ந்தார். அதேவேளையில் ஏராளமான பேராளர்கள் 'அன்வாரே அடுத்த பிரதமர்' எனப் பிரகடனம் செய்யும் சுலோக அட்டைகளை ஏந்தி நின்றனர். இத்தகைய சுலோக அட்டைகளை ஏந்தி நின்றவர்களில் ஜசெகவின் மூத்த தலைவர் லிம் கிட் சியாங்கும் ஒருவராவார்.

இந்த மாநாட்டில், முன்னாள் பிரதமரும் பார்ட்டி பெர்சத்து கட்சியின் அவைத் தலைவருமான துன் மகாதீரும் இந்த மாநாட்டில் கலந்து கொண்டார்.

அடுத்த பிரதமராக அன்வார் பொறுப்பேற்பதை நீங்கள் ஆதரிப்பீர்களா? என மகாதீரிடம் நிருபர்கள் கேட்ட போது அக்கேள்விக்கு பதிலளிப்பதை அவர் தவிர்த்தார்.

அன்வாரை விடுதலை செய்யவேண்டும் என்ற மகஜரில் மகாதீரும் கையெழுத்திட்டார்.

"அன்வாரை நான் ஜெயிலில் போடவில்லை. அது பழைய கதை. கட்சியாக அன்வாரைச் ஜெயிலில் போட்டது நஜிப் தன் என்று மகாதீர் நிருபர்களிடம் சொன்னார்.

அதேவேளையில், அடுத்து வரும் பொதுத்தேர்தலில் எதிர்க்கட்சிகளின் கூட்டணி வெற்றிபெற கடுமையாகப் போராடவேண்டும் என்று கட்சி உறுப்பினர்களை வான் அஸீசா கேட்டுக்கொண்டார்.

 

 

கோலாலம்பூர், மே.20- அடுத்த பொதுத்தேர்தலில் கண்டிப்பாக தேசிய முன்னணி வெற்றி பெறும் அபாயம் இருப்பதாக துன் டாக்டர் மகாதீர் தம் இணைய பதிவேற்றத்தில் எச்சரித்துள்ளார். அரசியல் மீது நாளுக்கு நாள் மக்கள் வெறுப்படைந்து வருவதால், அடுத்த பொதுத்தேர்தலில் பலர் வாக்களிக்க மறுப்பர். அதனால் தேசிய முன்னணியின் வெற்றி உறுதியாகிவிடும் என்றார் மகாதீர்.

40 லட்சம் இளம் மலேசியர்கள் வாக்களிக்கும் உரிமை பெற்றிருக்கும் நிலையில், அவர்களில் பெரும்பான்மையோர் வாக்களிக்க முன்வரமாட்டார்கள். தங்களின் வாக்குகளால் எந்தவொரு மாற்றமும் ஏற்பட போவதில்லை என்ற தவறான எண்ணம் அவர்களிடம் இருக்கும் வரையில் இந்த நிலைதான் இருக்கும் என்று அவர் தம் பதிவேற்றத்தில் எழுதியுள்ளார்.

அரசியல் பணம் சம்பாதிப்பவர்கள் மட்டுமே இருக்கும் இடம் என்றும் பதவி மோகத்தைத் தவிர அரசியல்வாதிகளுக்கு வேறு நோக்கம் இல்லை என்றும் இந்த இளம் சமுதாயம் கருதி வருகிறது. தேசிய முன்னணியோ அல்லது ‘பக்காத்தான்’ எதிர்க் கட்சிக் கூட்டணியோ வேறுபாடு இல்லாமல் அனைவரும் இப்படிதான் இருக்கிறார்கள் என்றும் பலர் நினைத்து வரும் வரை இந்த நிலையை மாற்ற முடியாது என்றும் மகாதீர் கருத்து தெரிவித்தார்.

அடுத்த பொதுத் தேர்தலில் வெற்றி பெற ‘பக்காத்தான் ஹராப்பான்’ கூட்டணி கட்சிகள் கண்டிப்பாக மக்களை சந்தித்து பிரச்சாரம் செய்ய வேண்டும். மக்கள் நம்பும் வகையில் தங்களின் நேர்மையை நிரூபிக்க வேண்டும் என்றும் மகாதீர் வலியுறுத்தினார்.

 

கோலாலம்பூர், மே.20- சிலாங்கூர் ஆட்சிக் குழுவில் இருக்கும் பாஸ் கட்சி உறுப்பினர்களின் நிலையைப் பற்றி பிகேஆர் கட்சியின் அடுத்த கூட்டத்தில் விவாதித்து முடிவெடுக்கப்படும் என்று சிலாங்கூர் மந்திரி புசார் அஸ்மின் அலி அறிக்கை விடுத்துள்ளார்.

ஜெர்மனியிலிருந்து அலுவல் பயணத்தை முடித்து நேற்று மலேசியா திரும்பிய அவர், இதுபற்றி முதலில் டத்தோஶ்ரீ அன்வார் இப்ராஹிமுடன் தொலைப்பேசியில் கலந்துரையாடினார். ஒரு நல்ல முடிவு எடுக்கப்படும் வரை பாஸ் கட்சியுடன் தொடர்ந்து கலந்தாலொசிக்கும்படி அன்வார் கூறியதாக அஸ்மின் தெரிவித்தார்.

பாஸ் கட்சி பிகேஆருடனான அரசியல் உறவை முறித்து கொண்டதிலிருந்து இந்த குழப்பம் தொடர்கிறது. இதனைப் பற்றி பேசி முடிவெடுக்க அஸ்மினை நேரில் சந்திக்க வேண்டும் என்று பாஸின் துணைத் தலைவர் துவான் இப்ராஹிம் கேட்டுக் கொண்டுள்ளார்.

“சில பிகேஆர் சட்டமன்ற உறுப்பினர்கள் பாஸ் கட்சியுடன் இணைந்து சிலாங்கூர் சட்டமன்றத்தில் பிகேஆரின் பெரும்பான்மையை இழக்க செய்து ஆட்சியை கலைக்க திட்டம் கொண்டுள்ளனர் எனும் வதந்தியை யாரும் நம்ப வேண்டாம். எங்களின் ஆட்சி மிகவும் வலுவாக உள்ளது. சிலாங்கூரில் அரசியல் நெருக்கடிகள் எதுவும் ஏற்படவில்லை” என்று அஸ்மின் அலி செய்தியாளர் கூட்டத்தில் தெரிவித்தார்.

புத்ராஜெயா, மே.19- சரவா சட்டமன்றத்தின் புஜுட் தொகுதியின்  இடைத் தேர்தலுக்கான வாக்குப்பதிவு ஜூலை மாதம் 4-ஆம் தேதி நடைபெறும் என தேர்தல் ஆணை அறிவித்துள்ளது. 

இந்த இடைத் தேர்தலுக்கான வேட்புமனுத் தாக்கல் ஜூன் 20-ஆம் தேதி இடம்பெறும் என்றும் தேர்தல் ஆணை இயக்குனர் டத்தோஶ்ரீ முகமது ஹஷிம் அப்துல்லா இன்று அறிவித்தார். 

சரவா சட்டமன்றத்தின் புஜுட் தொகுதி உறுப்பினரான டாக்டர் திங் தியோங் சூன், ஒரே சமயத்தில் இரு நாடுகளின் குடியுரிமையை வைத்திருந்ததாக சட்டமன்றத்திலிருந்து அவரை நீக்குவதற்கான தீர்மானம் கொண்டு வரப்பட்டு நிறைவேற்றப்பட்டது

அவருக்கு எதிராக தேசிய முன்னணியைச் சேர்ந்த 70 சட்டமன்ற உறுப்பினர்கள் வாகளித்ட்னர் அவர நீக்குவதற்கு எதிராக 10 எதிர்க்கட்சி உறுப்பினர்கள் வாக்களித்தனர். 

கடந்த முறை நடைபெற்ற தேர்தலில் டாக்டர் திங் 1,759 வாக்குகள் வித்தியாசத்தில் புஜூட் தொகுதியில் வெற்றிப் பெற்றுள்ளார் என்பது குறிப்பிடத்தக்கது.

 

More Articles ...