Top Stories

Grid List

கோலாலம்பூர், ஜன.22-  ஆசியான் மற்றும் இந்தியாவுக்கு இடையிலான உச்சநிலை மாநாட்டில் கலந்து கொள்வதற்காக  பிரதமர் டத்தோஶ்ரீ நஜிப் துன் ரசாக்,  புதன்கிழமை புதுடில்லி செல்லவிருக்கிறார். பிரதமராக நஜிப் பதவியேற்றது முதல் அவர் இந்தியாவுக்கு அதிகாரப்பூர்வ பயணம் மேற்கொள்வது இது நான்காவது முறையாகும்.

கடந்த ஆண்டில் இந்தியாவுக்கு முக்கியத்துவம் வாய்ந்த பயணம் ஒன்றை பிரதமர் நஜிப் மேற்கொண்டார்.  அப்போது இருநாடுகளின் வர்த்தகர்கள் மற்றும் தொழிலதிபர்கள் மிகப்பெரிய வர்த்தக உடன்பாடுகளில்  கையெழுத்திட்ட வைபவத்திற்கு பிரதமர் நஜிப்பும் பிரதமர் நரேந்திர மோடியும் முன்னிலை வகித்தனர்.

மலேசியாவுக்கும் இந்தியாவுக்கும் இடையே சுமார் 158.68 பில்லியன் ரிங்கிட் மதிப்பைக் கொண்ட வர்த்தக உடன்பாடுகள் அப்போது கையெழுத்தி டப்பட்டன.  பத்து நாடுகளைக் கொண்ட ஆசியான் கூட்டமைப்புக்கும்   இந்தியாவுக்கும் இடையேயான நட்புறவு, இந்தியாவின் வெளியுறவுக் கொள்கையில்  மிக முக்கி அம்சமாக விளங்கி வருகிறது.

இந்த உச்சநிலை மாநாட்டின் பணிகளுக்கிடையே பிரதமர் மோடியை பிரதமர் நஜிப் சந்தித்து பேசவிருக்கிறார். 2030ஆம் ஆண்டுக்குள் உலகின் மூன்றாவது பெரிய வல்லமைமிக்க பொருளாதார சக்தியாக இந்தியா உருவெடுக்கும் என்று ஆரூடங்கள் கூறப்படும் நிலையில்  இந்தியாவுடனான உறவுகளை மேலும் விரிவாக்குவதில் பிரதமர் மிகுந்த ஆர்வம் கொண்டுள்ளார் என்று 'சீட்' அமைப்பின் முன்னாள்  தலைமைச் செயல் அதிகாரியான டாக்டர் ஏ.டி. குமார ராஜா தெரிவித்தார்.

இந்தியாவுடனான மலேசியாவின் உறவு என்பது சமூக ரீதியில் மிக வலுவான அடித்தளத்தைக் கொண்டதாகும். இம்முறை இருநாட்டுத் தலைவர்களும் சந்திக்கும் போது கடந்த ஆண்டில் கையெழுத்தான பல உடன்பாடுகள் குறித்த மீள்பார்வைக்கு வழி ஏற்படும் என்று எதிர்பார்க்கப்படுகிறது.

செத்தியாவங்சா, ஜன.15- எதிர்வரும் பொதுத்தேர்தலில் கோம்பாக் நாடாளுமன்றத் தொகுதியில் போட்டியிடுமாறு பிகேஆர் கட்சியின் துணைத்தலைவர் டத்தோஶ்ரீ அஸ்மின் அலி  விடுத்த கோரிக்கையை முன்னாள் பிரதமர் துன் மகாதீர் நிராகரித்தார்.

"நான் லங்காவி, குபாங்பாசு அல்லது புத்ரா ஜெயா ஆகிய தொகுதிகளில் ஏதாவது ஒன்றில் தாம் போட்டியிட முடிவு செய்திருக்கிறேன்" என்று அவர் சொன்னார். 

அஸ்மின் அலியின் வேண்டுகோளை நான் மதிக்கிறேன்.  நான் அவருக்கு நன்றி கூறிக் கொள்கிறேன். ஆனால், ஏற்கெனவே நான் மேற்கண்ட தொகுதிகளில்,  ஏதாவது ஒன்றில் போட்டியிட முடிவு செய்து விட்டேன்" என்று செத்தியா வங்சா பிரிபூமி கட்சி டிவிசனைத் தொடக்கி வைத்த போது மகாதீர் தெரிவித்தார்.

தம்முடைய தொகுதியான கோம்பாக்கில் துன் மகாதீர் போட்டியிட முன்வரவேண்டும் என்றும் அத்தொகுதியை தாம் விட்டுக் கொடுக்கத் தயாராக இருப்பதாகவும் கோம்பாக் எம்.பி.யான அஸ்மின் அலி சில தினங்களுக்கு முன்னர் தெரிவித்திருந்தார்.

 

கோலாலம்பூர், ஜன.10- விரைவில் எதிர்பார்க்கப்படும் 14 ஆவது பொதுத்தேர்தலில், தீபகற்ப மலேசியாவில் துன் மகாதீர் தலைமையிலான பிரிபூமி மலேசியா கட்சி அதிகமான நாடாளுமன்றத் தொகுதிகளில், அதாவது 52 தொகுதிகளில் போட்டியிட உள்ளதாக தகவல் வெளியாகியுள்ளது.

இக்கட்சியை அடுத்து, 51 தொகுதிகளில் பிகேஆர் கட்சியும் 35 தொகுதிகளில் ஜசெகவும் 27 தொகுதிகளில் அமானா நெகாரா கட்சியும் போட்டியிட உள்ளன.  கடந்த பொதுத் தேர்தலில் போட்டியிட்ட தொகுதிகளில் 14 இடங்களை பிகேஆர் கட்சி,  பிரிபூமிக்கு விட்டுக் கொடுத்திருக்கிறது. பக்காத்தான்  கூட்டணியிலுள்ள எதிர்க்கட்சிகள் தங்களுக்கு இடையேயான தொகுதிப் பங்கீட்டை அறிவித்துள்ளன.

பிரதமர் டத்தோஶ்ரீ நஜிப்பின் தொகுதியான பெக்கானில் அவரை எதிர்த்து கடந்த முறை போட்டியிட்ட பிகேஆர், இம்முறை அந்தத் தொகுதியை பிரிபூமி கட்சிக்கு விட்டுக் கொடுத்துள்ளது.  எனவே, பிரதமர் நஜிப்பை எதிர்த்து துன் மகாதீரின் பிரிபூமி கட்சியின் வேட்பாளர் போட்டிடுவார்.

கடந்த தேர்தலின் போது எதிர்க்கட்சிகளின் கூட்டணியில் இருந்த பாஸ் கட்சி தற்போது அந்தக் கூட்டணியில் இல்லாததால், பாஸ் போட்டியிட்ட தொகுதிளில் பெரும்பாலானவை பிரிபூமிக்கும்  அமானாவுக்கும் பகிர்ந்தளிக்கப் பட்டுள்ளன.

மேலும், இம்முறை கிளந்தான் மாநிலத்தில் அதிகமான தொகுதிகளில் அதாவது 7 இடங்களில் பிரிபூமி கட்சியும் 5 இடங்களில் அமானா கட்சியும் 2 இடங்களில் பிகேஆர் கட்சியும் போட்டியிடுகின்றன.

அதேவேளையில், அம்னோவின் கோட்டையாக விளங்கும் ஜொகூர் மாநிலத்தில் பிரிபூமி 10 தொகுதிகளில் போட்டியிடவிருக்கிறது. ஶ்ரீகாடிங், பெங்கெராங், பொந்தியான்  மற்றும் மூவார் ஆகிய தொகுதிகளை பிரிபூமிக்கு பிகேஆர் விட்டுக் கொடுத்துள்ளது. 

மேலும் பேராவில் 8 நாடாளுமன்றத் தொகுதிகலில் பிரிபூமி போட்டியிடுகிறது. குறிப்பாக, தாப்பா தொகுதி பிரிபூமி கட்சிக்கு ஒதுக்கப் பட்டுள்ளது. அடுத்து தம்புன், பகான் சிராய், பாசீர் சாலாக் ஆகியவற்றிலும் அக்கட்சியே போட்டியிடுகிறது.

சிங்கை சிப்புட் தொகுதியில்  பிகேஆர் போட்டியிடுகிறது. இந்தத் தொகுதியில் கடந்த முறை பிகேஆர் சின்னத்தில் போட்டியிட்டு டாக்டர் சேவியர் ஜெயக்குமார் வென்றார். இவர் மலேசிய சோஸலிசக் கட்சியின் தலைவர் என்பது குறிப்பிடத்தக்கது. கெடாவில் 6 இடங்களிலும், பகாங்கில் 6 இடங்களிலும் பிரிபூமி போட்டியிடத் தயாராக இருக்கிறது.

 

 

 

 

 

 

 

 

 சுங்கைப் பட்டாணி, ஜன.22- கடந்த ஞாயிறு முதல் வலைத் தளங்களில் பரவலாக பகிரப்பட்ட காணொளி ஒன்றில், அப்பாவிச் சிறுமியை மடியில் உட்கார வைத்துக் கொண்டு காமச் சேட்டையில்  ஈடுபட்ட ஆசாமிக்கு எதிராக தீவிர வேட்டையில் இறங்கிய  போலீசார்  இன்று மாலையில் அவனை வளைத்துப் பிடித்தனர். 

அந்த 7 வயதுச் சிறுமியை மானபங்கம் செய்த அந்தக் காமுகன், சம்பந்தப்பட்ட சிறுமியின் குடும்பத்திற்கு மிகவும் வேண்டியவன் எனத்தெரிய வந்துள்ளது. இன்று காலையில் அந்தச் சிறுமியின் தாயாரிடமிருந்து புகாரைப் பெற்ற போலீசார், மாலையில் 40 வயதுடைய நபரைக் கைது செய்தனர்.

மேற்கொண்டு தடுத்த வைத்து விசாரிப்பதற்காக நாளைக் காலையில் அந்தக் காமுகனுக்கு எதிராக நீதிமன்ற அனுமதியைத் தாங்கள் பெறவிருப்பதாக கோலமூடா போலீஸ் படைத்தலைவர் சாய்ஃபி அப்துல் ஹமிட் தெரிவித்தார்.

கடந்த சனிக்கிழமை இரவு 11 மணியளவில் தாமான் ரியாவில் நடந்த கேளிக்கைச் சந்தை நிகழ்ச்சியின் போது அந்த சிறுமியை இந்த நபர் மடியில் உட்காரவைத்துக் கொண்டு மானபங்கம் செய்து கொண்டிருந்த போது அதனைக் காணொளியில் பதிவு செய்த ஒருவர், அதனை முகநூலில் பகிர்ந்ததைத் தொடர்ந்து நாடு தழுவிய அளவில் மக்கள் ஆத்திரம் அடைந்தனர்.

 

கோலாலம்பூர், ஜன.22- புத்த பிக்குகளைக் கொல்வதற்காக கத்தியுடன் கோலாலம்பூர் நகரைச் சுற்றிக் கொண்டிருந்த ஐஎஸ் தீவிரவாதத் தொடர்புடைய நபர் ஒருவர் உள்பட இருவர் கைது செய்யப்பட்டனர் என்று போலீசார் தெரிவித்தனர்.

பயங்கரவாதத் தாக்குதலில் ஈடுபடவும் ஐஎஸ் சித்தாந்ததைப் பரப்பவும் திட்டம் தீட்டி செயல்பட்டுக் கொண்டிருந்ததாக கருதப்படும் இவர்கள் இருவரையும் இருவேறு தருணங்களில் போலீசார் கைது செய்துள்ளனர்.

இவர்களில் ஒருவர் ஓர் இந்தோனிசியர் ஆவார்.  புலனம் மூலமாக மூத்த ஐஎஸ் தலைவர் ஒருவருடன் தொடர்பு கொண்டு  இதர பல இந்தோனிசியர்களையும்  திரட்டுவதற்கு  இந்த நபர் பேசி வந்தது கண்டு பிடிக்கப்பட்டது.

மியன்மாரில் ரோஹின்யா முஸ்லிம்களுக்கு எதிராக நடக்கும் அநீதிகளுக்கு பழிவாங்கும் நோக்கில் கோலாலம்பூரில் புத்த பிக்குகளைத் தாக்குவதற்கு இந்த நபர்  திட்டமிட்டிருந்தான்.

கைதான இன்னொரு நபர் தனியார் சமயப் பள்ளியைச் சேர்ந்த ஆசிரியரான  ஒரு மலேசியர் ஆவர். கேளிக்கை மையங்களைத் தாக்கவும்  கொள்ளையடிக்கவும் முஸ்லிம் அல்லாதோரைக் கடத்திக் கொலை செய்யவும் இந்த நபர் திட்டம் தீட்டியதாக ஐஜிபி டான்ஶ்ரீ முகம்மட் ஃபுஸி தெரிவித்தார். இந்த நபர் பயங்கரவாதச் சட்டத்தின் கீழ் தண்டிக்கப்பட்டு ஏற்கனவே பல மாதங்கள் சிறையில் இருந்தவர் என்பது குறிப்பிடத்தக்கது. 

 

கோலாலம்பூர், ஜன.22- தைப்பூச விழாவை முன்னிட்டு  போலீசார் தங்களின் பாதுகாப்பு நடவடிக்கைகளைத் தீவிரப்படுத்த உள்ளனர்.  தைப்பூசத்தின்  போது எத்தகைய விரும்பத்தகாத சம்பவங்களும் நடக்காமல் இருக்க, நாட்டிலுள்ள அனைத்து இடங்களிலும்  பாதுகாப்பு அதிகரிக்கப்படும் என்று போலீஸ் படைத்தலைவர் டான்ஶ்ரீ முகம்மட்  ஃபுஸி தெரிவித்தார்.

திருவிழா சுமூகமான முறையில் நடந்தேற  விழாவுக்கு வரும் அனைத்துத் தரப்பினரும் அதிகாரிகளுக்கு ஒத்துழைப்பு நல்க வேண்டும் என்று அவர் வலியுறுத்தினார். 

மேலும் தைப்பூசத்தின் போது  நிகழ்வுக்கு குந்தகம் விளைவிக்கும் வகையில் எதுவும் நடக்கக்கூடிய  சாத்தியங்கள் குறித்து தகவல் ஏதேனும் தெரிந்தி ருந்தால் அவர்கள் அருகிலுள்ள போலீஸ் நிலையங்களில் புகார் செய்ய முன்வர வேண்டும் என்று அவர் கேட்டுக்கொண்டார்.

 

 

 

 

 

 

 

 

 

 

Advertisement