Top Stories

Grid List

ஜொகூர் பாரு, ஏப்ரல் 25- பொதுத் தேர்தலில் வெற்றி பெற்றால் ஜி.எஸ்.டியை ஒழிக்காமல் நிலைநிறுத்த பக்காத்தான் ஹரப்பான் முடிவு செய்திருப்பது, அந்த வரி ஒரு நியாயமான வரி என்றும் மக்களுக்கு அது சுமையளிக்கவில்லை என்றும் நிரூபணமாகிறது என்று ஜொகூர் மந்திரி புசார்  டத்தோஶ்ரீ முகமட் காலிட் நோர்டின் கூறினார்.

ஜி.எஸ்.டி நாட்டின் பொருளாதாரத்தை உயர்த்த மிகவும் உதவியாக இருக்கிறது. உலகில் பல நாடுகளில் அமலில் இருக்கும் ஜி.எஸ்.டி மக்களுக்கு சுமையளிக்காமல் அரசாங்கம் வரி வசூலிக்கும் முறையாகும்.

“அடிக்கடி மாற்றிப் பேசும் பக்காத்தான் எதிர்க் கட்சிக் கூட்டணியைச் சேர்ந்த நூருல் இஷா, ஜி.எஸ்.டிக்கு ஆதரவாக பேசியது எனக்கு அதிர்ச்சியளிக்கவில்லை. காரணம் அவர்கள் எப்போதும் தங்கள் கருத்துகளில் நிலையற்றவர்களே” என்றும் முகமட் காலிட் விமர்சித்துள்ளார்.

கோலாலம்பூர், ஏப்ரல் 25- அரசாங்கத்தினால் அறிவிக்கப்பட்ட இந்தியர் வளர்ச்சி பெருந்திட்ட வரைவில் (மலேசியன் இந்தியன் புளுபிரிண்ட்) இந்தியப் பெண்களுக்காக என்ன திட்டம் இருக்கிறது என்று பத்து கவான் நாடாளுமன்ற உறுப்பினர் கஸ்தூரி பட்டூ கேள்வி எழுப்பியுள்ளார்.

இந்த புதிய வரைவு திட்டத்தில், தனித்து வாழும் தாய்மார் மற்றும் குறைந்த வருமானம் பெறும் பெண்களுக்கு தெளிவான ஒரு திட்டம் இல்லாதது வருத்தமளிக்கிறது என்றார் அவர்.

மலேசிய இந்திய சமுதாயத்தில் ஆண்களைவிட பெண்களே குறைந்த வருமானம் பெறுபவர்களாக உள்ளனர், அதிலும் தனித்து வாழும் தாய்மார்களே அதிகம். வேலையில்லா திண்டாட்டத்திலும் ஆண்களைவிட பெண்களே அதிகமாக பாதிக்கப்பட்டுள்ளனர். இதற்கு தீர்வு காண அந்த புளுபிரிண்டில் ஒரு திட்டமும் இல்லை என்பது பெண்களுக்கு எதிராக இழைக்கப்படும் அநியாயம் என்றார் கஸ்தூரி.

அதுமட்டுமின்றி, இந்திய பெண்களுக்கு எதிரான குடும்பத்தில் நடக்கும் வன்முறைகளுக்கு எதிராக நடவடிக்கை எடுக்க அரசாங்கம் திட்டம் தீட்ட வேண்டும். தனித்து வாழும் தாய்மார்கள் தங்கள் வருமானத்தைப் பெருக்கிக் கொள்ள உதவும் வகையில் குடும்ப நல மேம்பாட்டு அமைச்சு நடவடிக்கை எடுக்க வேண்டும் என்றும் கஸ்தூரி பட்டு கோரினார்.

10 ஆண்டு கால திட்டமான இந்திய புளுபிரிண்டை கடந்த ஞாயிற்றுக்கிழமை பிரதமர் நஜீப் அறிவித்தார். இத்திட்டத்தில் இந்திய சமுதாய முன்னேற்றத்திற்காக சுமார் ரிம. 500 மில்லியன் ஒதுக்கப்பட்டுள்ளது.

கோலாலம்பூர், ஏப்ரல் 25- பக்காத்தான் கூட்டணியில் தங்களுடைய நிலை என்னவென்பதை இந்த வாரம் நடக்கும் பாஸ் கட்சியின் கூட்டத்தில் முடிவு செய்யப்படும் என்று பாஸ் துணைத் தலைவர் டத்தோ துவான் இப்ராஹிம் கூறினார். முக்கியமாக கெஅடிலான் கட்சியுடன் இருக்கும் அரசியல் உறவை நிலைத்துக் கொள்வதா அல்லது முறித்துக் கொள்வதா என்ற முடிவு எடுக்கப்படும் என்றார் அவர்.

ஏற்கனவே கிளந்தான், கெடா, திரங்கானு, மற்றும் பினாங்கு பாஸ் கிளைகள் கெஅடிலானுடன் தங்கள் அரசியல் உறவை முறித்துக் கொள்ள வேண்டும் என்று தீர்மானம் செய்தது குறிப்பிடத்தக்கது.

எதிர்வரும் 14ஆம் பொதுத் தேர்தலில் அம்னோவை எதிர்த்து 80 இடங்களில் போட்டியிட வேண்டும் என்பது பாஸ்ஸின் கடமை. இதற்காக பக்காத்தானில் இருக்கும் கட்சிகள் எங்களுக்கு வழிவிட வேண்டும். 

ஆனால், அப்படி பக்காத்தான் எதிர்க்கட்சி கூட்டணி இந்த 80 இடங்களில் போட்டியிட எங்களுக்கு வாய்ப்பளிக்க மறுத்தால், பாஸ் அவர்களையும் எதிர்த்து போட்டியிடும் என்றும் அவர் எச்சரித்தார்.

 ஈப்போ, ஏப்ரல்.25- அடுத்து வரவிருக்கும் பொதுத்தேர்தலுக்கும் மலேசிய இந்தியர்களுக்கான பெருந்திட்ட வரைவுக்கும் (புளூ பிரிண்ட்) சம்பந்தமில்லை என்று பிரதமர் டத்தோஶ்ரீ நஜிப் அறிவித்துள்ள போதிலும், தேசிய முன்னணிக்கு ஆதரவாக இந்திய வாக்காளர்களைக் கவர்வதே இதன் நோக்கம் என்று ஈப்போ பாராட் எம்.பி.யான குலசேகரன் விமர்சித்தார்.

அடுத்த தேர்தலில் தேசிய முன்னணி மிக மோசமான தோல்வியை எதிர்நோக்கக்கூடும் என்பதும் இதற்குக் காரணமாக இருக்கலாம். பொதுத்தேர்தல் நெருங்கும் போதெல்லாம் பாரிசான் அரசாங்கம் இத்தகைய திட்ட அறிவிப்புக்களைச் செய்வது கேட்பதற்கு நன்றாகதான் இருக்கிறது என்றார் அவர்.

மலேசியாவாழ் இந்தியர்களின் வாழ்க்கைநிலையை மேம்படுத்துவற்காகவே இந்த பெருந்திட்ட வரைவு அறிவிக்கப்பட்டிருக்கிறது. இது வெறும் வெட்டிப் பேச்சல்ல என்று கூட்டரசு அரசின் சார்பில் இந்தத் திட்டத்தை தொடக்கிவைத்த போது நஜிப் கூறியிருக்கிறார்.

எனினும், இந்தத் திட்டத்தை இன்னொரு அரசியல் கண்துடைப்பு என்று இந்தியர்கள் சந்தேகப்படுவதற்கு ஏகப்பட்ட காரணங்கள் உள்ளன என்று ஜசெகவின் உதவித் தலைவருமான வழக்கறிஞர் குலசேகரன் கூறினார்.

அவர் இன்று பத்திரிகளுக்கு விடுத்திருக்கும் அறிக்கையில் மேலும் கூறியிருப்பதாவது:

உண்மையிலேயே பாரிசான் அரசாங்கம் இந்திய சமுதாயத்திற்கு உதவவேண்டும் என்ற நேர்மையுடனும் உறுதிப்பாடுடனும் இருக்கிறதா? அப்படி இருந்திருக்குமேயானால், பொருளாதாரம், சமூகம், வீடைப்பு, வேலைவாய்ப்பு ஆகிய துறைகளில் நிலவும் பிரச்சனைகளுக்கும் அடையாள ஆவணமில்லாத நாடற்ற இந்தியர்கள் பிரச்சனைகளும் தீர்க்கப்படாமல் இவ்வளவு காலத்திற்கு இழுத்தடிக்கப் பட்டிருக்காது.

கடந்த 2000-ஆம் ஆண்டில் உலகப் பிரசித்திபெற்ற 'டைம்ஸ்' சஞ்சிகை தனது ஆய்வுக் கட்டுரையில், மலேசிய இந்தியர்களில் பலர் அதிருப்தி நிறைந்தவர்களாக, மூன்றாம் தர பிரஜைகளாகவே தங்களை உணர்கின்றனர் என்றும் 1970ஆம் ஆண்டில் புதிய பொருளாதாரக் கொள்கை உருவாக்கப்பட்டது முதல் உண்மையிலேயே இந்திய சமுதாயம் தோல்விக்குள் தள்ளப்பட்டு விட்டது என்றும் கூறியுள்ளது.

இப்படியொரு ஆய்வு வெளிவந்து 17 ஆண்டுகள் ஆகிவிட்ட பின்னரும் இந்திய சமுதாயம் ஒரு நல்ல நிலையை அடைந்து விட்டதா? அரசாங்கம் அவர்களுக்குச் செய்தது என்ன?

இந்திய சமுதாயத்தின் ஆதரவு அரசாங்கத்திற்கு வேண்டுமென்றால், கடந்த பொதுத்தேர்தலுக்குப் பின்னர் இதுவரையில் இந்திய சமுதாயத்திற்கு அரசு செய்த மேம்பாடுகளின் பயன்கள் என்ன? சாதனைகள் என்ன? அது ஒருபுறம் இருக்கட்டும்.

இப்போது அறிவிக்கப்பட்டுள்ள இந்தியர்களின் நன்மைக்கான  பெருந்திட்ட வரைவை எந்த வகையில் மிக ஆக்ககரமாக பிரதமர் நஜிப் அமல்படுத்தப் போகிறார்? 

நாடாளுமன்ற தேர்வுக் குழுவின் ஆய்வுக்குப் பின்னர் வெளியிடப்பட்டதாக இந்த பெருந்திட்டம் இருந்திருக்கவேண்டும். இந்திய சமுதாயத்தின் பலதரப்பட்ட தரப்புக்களின் பரவலான கருத்துக்கள் திரட்டப்பட்டு முழுமையானதாக- விரிவானதாக இது அமைந்திருக்க வேண்டும்.

இந்தத் திட்டத்தின் மேம்பாடு, அடைவுநிலை ஆகியவை குறித்து ஆண்டுதோறும் நாடாளுமன்றத்தில் அறிக்கை தாக்கல் செய்யப்பட வகை செய்திருக்கவேண்டும். இதன்வழி என்ன அடையப்பட்டிருக்கிறது, என்னென்ன அடையப்படவேண்டும் என்பனவற்றை பரிசீலிக்க வழி பிறந்திருக்கும்.

இந்தத் திட்டத்தின் அமலாக்கக் கண்காணிப்பு பொறுப்பு மஇகா தலைவர் டாக்டர் சுப்பிரமணியத்திடம் ஒப்படைக்கப்பட்டிருப்பதாக பிரதமர் நஜிப் அறிவித்திருக்கிறார். இந்த அறிவிப்பு உற்சாகம் தருவதாக இல்லை. ஏற்கெனவே சிறப்பு அமலாக்கப் பணி பிரிவான 'SITF' அவருக்கு கீழ்தான் கடந்த 4 ஆண்டுகளாக செயல்பட்டு வருகிறது. இதன் பயன் என்ன? இவற்றில் ஏதாவது சமுதாயத்தின் கீழ்மட்டம் வரை பயனாக அமைந்துள்ளதா?

எனவேதான் இந்தத் திட்டம் இன்னொரு தேர்தல் கால கண்துடைப்பு வேலையோ என சந்தேகிக்க இந்திய சமுதாயத்திற்கு நிறைய காரணங்கள் உள்ளன என்று நான் கருதுகிறேன்.

இவ்வாறு ஈப்போ பாராட் தொகுதி நாடாளுமன்ற உறுப்பினர் குலசேகரன் தம்முடைய அறிக்கையில் கூறியுள்ளார்.

 

ஜோர்ஜ் டவுன், ஏப்ரல் 25- பினாங்கில் உள்ள ஜாலான் பாயா தெருபோங் பகுதியில் நிலச்சரிவு ஏற்பட்டதாக கூறி காணொளி ஒன்று சமூக வலைத்தளங்களில் பரவி வருகிறது. அந்த காணொளி உண்மை இல்லை என்பது தெரிய வந்துள்ளது.

பாயா தெருபோங்கில் நிலச்சரிவு நடந்ததாக கூறி இன்று மதியம் முதல் காணொளி ஒன்று புலனத்தில் வலம் வந்து கொண்டிருக்கிறது. ஆனால், இம்மாதிரியான சம்பவங்கள் நடக்கவில்லை என்றும் தங்களுக்கு இது தொடர்பாக எந்த தகவலும் வரவில்லை என தீயணைப்பு மற்றும் மீட்பு படையினர் கூறினர்.

சமூக தளத்தில் பரவும் அந்த காணொளி முன்பு சீனாவில் நடந்த நிலச்சரிவு என கூறப்படுகிறது. 

கோலாலம்பூர், ஏப்ரல் 25- மூங்கில் வழி பார்த்து மாயமான எம்எச்370 விமானத்தைக் கண்டுப்பிடிப்பேன் என்று கூறி இஸ்லாம் மதத்தை அவமதித்ததாக குற்றம் சுமத்தப்பட்ட ராஜா போமோ, தன் செயல்கள் அனைத்தும் பொய்யானவை என ஒப்புக் கொண்டு மன்னிப்பு கோரினார். 

மாயமான விமானம் மற்றும் அண்மையின் நாட்டில் பெரும் சர்ச்சை உண்டாக்கிய கிம் ஜோங் நாம் கொலை உட்பட பல சந்தர்ப்பங்களில் தனது மந்திர சக்தியினால் நம்மை செய்வதாக கூறி காணொளிகளை வெளியிட்டார் இப்ராஹிம் மாட் ஜின் எனும் ராஜா போமோ. இது பலரது கண்டனத்திற்கு ஆளானவேளை, இஸ்லாம் மதத்தை கொச்சைப்படுத்தி விட்டதாக அவர் மீது புகார் செய்யப்பட்டது. 

இந்நிலையில், இன்று மாலை கூட்டரசு பிரதேச இஸ்லாம் சமய இலாகாவில் தான் செய்த தவறுகளுக்காக ராஜா போமோ மன்னிப்பு கோரினார். அப்போது, மூங்கில் குழாய் வழி பார்ப்பது, மற்றும் இளநீர் வைத்துக் கொண்டு மந்திரம் செய்வது என தான் செய்த செயல்கள் அனைத்தும் பொய்யானவை என அவர் வாக்குமூலம் தந்தார். 

"நாட்டிற்கும் சமயத்திற்கும் அவமதிப்பை தரும் வகையில் நடந்து கொண்டதற்காக நாட்டில் உள்ள முஸ்லீம்களிடமும் முஸ்லீம் அல்லாதவர்களிடமும் நான் மன்னிப்பு கேட்டுக் கொள்கிறேன்" என அவர் கூறினார்.

மேலும், தனிநபர் ஒருவரின் உத்தரவினால்தான் தாம் அவ்வாறான காரியங்களில் ஈடுப்பட்டதாகவும் ஆனால் யார் அந்த நபர் என்பதைக் கூற முடியாது எனவும் அவர் கூறினார். 

 

Advertisement