Top Stories

Grid List

கோலாலம்பூர், ஏப்ரல்.26- 1 எம்.டி.பியின் தலைமை செயல்நிலை  நிர்வாக அதிகாரியான அருள் கந்தா, தற்போது, அந்நிறுவனம் என்ன செய்து வருகிறது என்பது குறித்தும், அந்நிறுவனத்தின் மீது சுமத்தப்பட்டுள்ள குற்றச்சாட்டுகளில் உண்மை ஏதும் இல்லை என்றும் வாக்காளர்களிடம் தெளிவுப் படுத்தி வருகிறார். 

இதுவரை, சுமார் 25 பகுதிகளிலுள்ள 30,000 மக்களுக்கு அந்நிறுவனத்தின் செயல்பாடு குறித்து அவர் விவரித்து வருகிறார். 14-ஆவது பொதுத் தேர்தலை முன்னிட்டு, அரசு சாரா நிறுவனங்கள், அரசாங்கத்தை ஆதரிக்கும் நிறுவனங்களின் உதவியோடு, அருள் கந்தா அந்த விளக்கத்தை மக்களுக்கு அளித்து வருகிறார்.  

உண்மையில் நடந்தது என்ன என்ற அடிப்படையில் தான், மக்களுக்கு 1எம்.டி.பி விவகாரம் குறித்து தாம் விளக்கமளித்து வருவதாகவும், அரசியலில் நுழையும் எண்ணத்திலோ அல்லது அரசாங்கத்திற்கு நற்பெயரை சேர்ப்பதற்காக தாம் இதனைச் செய்யவில்லை என்று அருள் கந்தா சிங்கப்பூர் தொலைக்காட்சி நிறுவனத்துடனான பேட்டியின் போது தெரிவித்தார்.   

இருந்த போதிலும், வேட்பாளர்கள் மனு தாக்கல் இன்னும் இரு நாட்களில் நடைபெறவிருக்கிறது என்றும், அந்த இரு நாட்களில் என்ன வேண்டுமானாலும் நடக்கலாம் என்றும் அவர் சொன்னார். 

“இது என்னை நான் விளம்பரப் படுத்திக் கொள்ளும் செயல்..என்னுள் பல திறமைகள் உள்ளன என்பதை நான் உணர்கிறேன். மறுசீரமைக்கும் திறன், முதலீட்டு பின்னணி மற்றும் மக்களுடன் சிறப்பாக உரையாட என்னால் முடியும். இதனைக் கருத்தில் கொண்டு, என்னை அரசியலில் ஏற்றுக் கொள்வதா இல்லையா என்று அரசாங்கம் முடிவெடுக்கட்டும்” என்றார் அவர். 

 

புத்ராஜெயா, எப்ரல்.26- தேர்தல் அதிகாரிகள் குறித்து சமூக வலைத்தளங்களில் வெளியிடப்படும் போலித் தகவல்களை, வாக்காளர்கள் நம்ப வேண்டாம் என்று தேர்தல் ஆணையம் அறிவுறுத்தியுள்ளது. 

தேர்தல் ஆணையத்தின் அதிகாரிகளின் நற்பெயருக்கு களங்கம் விளைவித்து, தேர்தலின் போது பிரச்சனைகளை தூண்டும் நோக்கில் அந்தப் போலித் தகவல்கள் பகிரப் பட்டு வருவதாக தேர்தல் ஆணையத்தின் தலைவர் முகமட் ஹஷிம் அப்துல்லா கூறினார். 

குறுஞ்செய்தி, வீடியோச் செய்தியாக பகிரப் படும் இந்தப் போலித் தகவல்கள், தேர்தல் ஆணையத்தின் மீது மக்கள் நம்பிக்கையை இழக்கும் வகையில் அமைந்துள்ளதாக அவர் தெரிவித்தார். 

“போலீஸ் துறை மற்றும் மலேசிய தொலைத் தொடர்பு மற்றும் பல்லூடக அமைச்சுடன் கலந்தாலோசித்து, இந்தப் போலிச் செய்திகள் குறித்து என்ன நடவடிக்கை எடுக்கப்பட வேண்டும் என்று தேர்தல் ஆணையம் முடிவெடிக்கும்” என்று அவர் சொன்னார்.  

வாக்குச் சீட்டுகளில் அடையாளம் குறிக்கும் முறைகளை, தேர்தல் ஆணையத்துடன் சம்பந்தமில்லாத சில நிறுவனங்கள் செய்து வருவதாகவும், காவல் நிலையங்களில் வைக்கப்படும் வாக்குப் பெட்டிகளை, அனுமதியின்று தேர்தல் அதிகாரிகள் தங்களின் இஷ்டத்திற்கு எடுத்துச் செல்ல முடியும் என்பதை விளக்கும் வீடியோ பதிவுகளும் சமூக வலைத்தளங்களில் பகிரப் பட்டு வருகின்றன.  

கருப்பு நிறத்தில் அடையாளக் குறிப்பு கொண்ட வாக்குச் சீட்டுகளில், மலேசியர்கள் அல்லாதவர்கள் வாக்களித்துள்ளனர் என்ற செய்தியையும் அந்த வீடியோ பதிவுகள் வாயிலாக வெளியிடப்பட்டுள்ளது. மேலும், மக்களின் தனிநபர் விவரங்கள் ‘களவுச் செய்யப்பட்டு’ அதன் வாயிலாக கள்ள வாக்குகள் போடப் படுகின்றன என்றும் அந்த வீடியோ பதிவுகள் தெரிவித்துள்ளன. 

 

ஈப்போ, ஏப்ரல்.26- மைபிபிபி கட்சியின் தலைவரான டான்ஶ்ரீ  எம்.கேவியஸ், தனது கட்சியிலிருந்து ராஜினாமா செய்ததால், இப்பொதுத் தேர்தலில் தேசிய முன்னணிக்கு எவ்வித பாதகமும் நேராது என்று மஇகா தேசியத் தலைவரான டத்தோஶ்ரீ டாக்டர் எஸ். சாமிவேலு கூறினார்.

“மைபிபிபி கட்சித் தலைவரான கேவியஸ் தனது கட்சி உறுப்பினர்களால் நீக்கப்பட்டார் என்ற செய்தியையும் நான் இன்று படித்தேன். அவர் ராஜினாமா செய்துள்ளார் என்றும் தெரிவிக்கப்பட்டுள்ளது. கட்சியினுள் உட்பூசல் ஏற்பட்டுள்ளது என்பது இதன் வாயிலாக தெரிகிறது” என்று சுப்ரா கருத்துரைத்தார். 

“அவரின் ராஜினாமாவால் தேசிய முன்னணிக்கோ, அல்லது கூட்டணியின் இதர கட்சிகளுக்கோ எவ்வித பாதகமும் ஏற்படாது. மைபிபிபிக்குள் எழுந்த பிரச்சனை, கட்சிப் பிரச்சனையாகும்” என்றார் அவர். 

மைபிபிபி கட்சிக்கு இந்தியர்களின் ஆதரவு அதிகமாக உள்ள தொகுதிகளில், மஇகா தனது வேட்பாளர்களை நியமிக்க முயற்சிகளை எடுக்கலாம். மைபிபிபி கட்சியினருக்கு இடையிலான பிரச்சனைகள் களையும் வரை, அவர்களுக்கு மஇகா உதவக் கூடும் என்று அவர் சொன்னார். 

மைபிபிபி கட்சியின் அனைத்து பதவிகளிலிருந்தும் தாம் ஏப்ரல் மாதம் 23-ஆம் தேதியன்று ராஜினாமா செய்ததாக கேவியஸ் தனது டுவிட்டர் பக்கத்தில் தெரிவித்திருந்தார்.

கேமரன் மலைத் தொகுதியில் போட்டியிடும் வாய்ப்பு மைபிபிபிக்கு வழங்கப்பட வேண்டும் என்ற தனது கோரிக்கை மறுக்கப்பட்டதால் கேவியஸ் தனது பதவியிலிருந்து வெளியேறுவதாக தெரிவிக்கப்பட்டுள்ளது. கேமரன் மலைத் தொகுதியில் இம்முறை மஇகா இளைஞர் பிரிவுத் தலைவர் டத்தோ சி.சிவராஜ் போட்டியிடுவார் என்று தே.மு அறிவித்துள்ளது. 

“ஈப்போ பாராட் மஇகா கிளைத் தலைவர் டான்ஶ்ரீ டி.ராஜு மற்றும் தங்கராணி ஆகிய இருவரும், மைபிபிபி கட்சியின் கிளைத் தலைவர்களுடன் கலந்து பேசி, அங்கு இந்தியர்களின் தேவை குறித்து அறிந்துக் கொள்ளும் முயற்சியில் ஈடுபடுவர்” என்று டாக்டர் சுப்ரா சொன்னார். 

மஇகா மைபிபிபிக்கு எதிரி அல்ல. தேசிய முன்னணி கூட்டணியின் கூட்டு கட்சியான மைபிபிபிக்கு எங்களின் ஆதரவு என்றும் உண்டு. இரு கட்சிகளுக்கும் இடையிலான பேச்சு வார்த்தை கால தாமதமாக தொடங்கப்பட்டது. அதனால்தான், எங்களால் இரு கட்சிக்கும் ஏற்ற நல்ல முடிவினை எடுக்க முடியவில்லை” என்று அவர் கூறினார்.

 

கோலாலம்பூர், ஏப்ரல் 26 – நாடு தழுவிய அளவில் நடத்தப்படும் மலையாளப் பாடல் திறன் போட்டியில், ஆர்வமும் திறமையும் கொண்ட தமிழ்ப் பாடகர்கள் பலரும் கலந்து கொள்ளலாம் என்று போட்டி ஏற்பாட்டாளரான அனைத்து மலேசிய மலையாளின் சங்கம் (அம்மா) அழைப்பு விடுத்துள்ளது.

இது மலையாளம் மொழியிலான பாடல் திறன் போட்டி என்றாலும், பிற மொழிகளை தாய் மொழிகளாகக் கொண்டவர்களும் கலந்து கொள்ளலாம். பாடும் திறன் கொண்ட அனைத்துலக பாடகர்களுக்கும் போட்டி திறந்து விடப்பட்டுள்ளது என்று மலையாளிகள் சங்கத் தலைவரும் நாடறிந்த பிரபல பாடகியுமான டத்தோ சுசிலா மேனன் குறிப்பிட்டார்.

மலேசியாவில் நிறையப் பாடகர்கள் இருக்கிறார்கள். திறமை கொண்டவர்களாக விளங்குகிறார்கள். எனவே, தயக்கமின்றி, இந்தப் போட்டியில் பங்கேற்கலாம். மலையாளத்தை தாய்மொழியாக கொள்ளாவிட்டாலும், உச்சரிப்பு பிழை வருமோ என்ற அச்சம் தேவையில்லை.

தேர்வு சுற்றுகளின் போது சில வரிகளே ஆனாலும் சுதி சுத்தமாக தாளகதியுடன் தங்களின் பாடல் திறனைக் காட்டுபவர்கள் அடுத்த சுற்றுக்கு செல்லும் போது உச்சரிப்பு பயிற்சியும் அவர்களுக்கு வழங்கப்படும் என்றார் அவர்.

மிகச்சிறந்த பரிசுகள் வழங்கப்படுகின்றன. முதல் பரிசாக டோயோட்டா வியோஸ் கார் வழங்கப்படும்.   இந்தக் காரை பரிசாக   PS Otomobill (Bukit Tinggi Sdn. bhd) நிறுவனம் வழங்குகிறது. இறுதிச் சுற்றுக்கு தேர்வாகும் அனைவருக்கும் கவர்ச்சிகரமான பரிசுகள் உள்ளன.

எனவே, தற்போது நடைபெற்று வரும் தேர்வுகளில் அனைவரும் பங்கேற்க முன் வர வேண்டும். தமிழ் பேசும் மக்களுடன் அனைத்து மலேசியர்களுக்கு தங்களது திறமைகளைக் காட்ட இதுவொரு வாய்ப்பாக அமையும் என்று டத்தோ சுசிலா மேனன் கூறினார். 

மேல் விபரங்களுக்கு; www.amma.org.my 

-Amma facebook page மற்றும் 019-4611735 என்ற தொலைபேசி எண்களிலும் தொடர்பு கொள்ளலாம்.

 

கோலாலம்பூர், ஏப்ரல் 26- கோலாலம்பூர் –கெந்திங் சாலையின் 10 ஆவது கிலோ மீட்டர் பேருந்து ஒன்று திடீரென தீப்பிடித்து எரிந்தது.  இந்தப் பேருந்தின் ஓட்டுனர் அதிர்ஷ்டவசமாக உயிர் தப்பினார்.

பேருந்தின் டயருக்கு அருகில் இருந்து இந்தத் தீ பரவியிருக்கலாம் என்று கெந்திங் தீயணைப்புத்துறை கூறியது. இந்தப் பேருந்து முற்றாக எரிந்து போய்விட்டது. தங்களுக்கு மாலை 6.50 மணி அளவில் தகவல் கிடைத்ததாக தீயணைப்புத்துறை அதிகாரி யுஸ்ரி அப்துல்லா சானி தெரிவித்தார்.

சுமார் 20 நிமிட இடைவெளிக்குள் தாங்கள் சம்பவ இடத்திற்கு விரைந்ததாகவும் ஆனால், அதற்குள் தீ முற்றாக பேருந்து முழுவதும் பரவி விட்டது. எனினும், இந்தத் தீயை அணைப்பதற்கு கிட்டத்தட்ட 30 நிமிடங்கள் தீயணைப்பு வீரர்கள் போராடினர்.

அதிர்ஷ்டவசமாக அந்தப் பேருந்தில் பயணிகள் யாரும் இல்லை. கெந்திங்கிலிருந்து பயணிகளை ஏற்றி வருவதற்காக இந்தப் பேருந்து சென்று கொண்டிருந்த போது இந்தச் சம்பவம் நடந்தது.

 

கோலாலம்பூர், ஏப்ரல்.25- கடந்த 2016-ஆம் ஆண்டு நவம்பர் 2-ஆம் தேதியன்று ‘மை வாட்ச்’ எனப்படும் சமூக இயக்கத்தின் முன்னாள் தலைவரான ஆர்.ஶ்ரீசஞ்சீவனின் வீட்டில் நடத்தப்பட்ட போலீஸ் சோதனையின் போது, அவரின் வீட்டின் கார் நிறுத்தும் இடத்தை சேதம் செய்ததற்கு நஷ்ட ஈடாக போலீஸ் துறை அவருக்கு ரிம.5,000-யை வழங்க வேண்டும் நீதிமன்றம் போலீசாருக்கு உத்தரவிட்டுள்ளது.

போலீஸ் நடத்திய சோதனையின் போது, தனது வீட்டின் கார் நிறுத்தும் இடத்தின் கூரையை சேதம் செய்த இரு போலீஸ் அதிகாரிகள் மற்றும் போலீஸ் படைத் தலைவர் தனக்கு ரிம.19,000 ரொக்கத்தை நஷ்ட ஈடாக வழங்க வேண்டும் என்று சஞ்சீவன், ஷா ஆலாம் மாஜிஸ்திரேட் நீதிமன்றத்தில் வழக்குத் தொடர்ந்தார்.  

“நாங்கள் ரிம.19,000-யை நஷ்ட ஈடாக கேட்டிருந்தோம். ஆனால், நீதிமன்றம் 5,000 ரிங்கிட்டை தான் நஷ்ட ஈடாக வழங்க வேண்டும் என்று உத்தரவிட்டுள்ளது” என்று சஞ்சீவனின் வழக்கறிஞர் வி.சச்சிதானந்தம் கூறினார். 

போலீஸ் அதிகாரிகளுக்கு ‘பாடம் புகட்ட வேண்டும்’என்ற அடிப்படையில் தான் தாம் அவர்கள் மீது வழக்கு தொடர்ந்ததாக சஞ்சீவன் தெரிவித்தார்.

“அந்தக் கூரையை சேதம் செய்ததற்கு அவர்கள் என்னிடம் மன்னிப்பு கேட்கவில்லை. அவர்கள் செயதது தவறு என்பதை அவர்களுக்கு உணர்த்தவே நான் இந்த வழக்கை தொடர்ந்தேன். பணத்திற்காக அல்ல” என்று சஞ்சீவன் சொன்னார்.

தனது மோட்டார் சைக்கிளை பறிமுதல் செய்ததற்காகவும் சஞ்சீவன் போலீசாரின் மீது வழக்கு தொடர்ந்தார். ஆனால், அவரின் மோட்டார் சைக்கிளைப் போலீசார் திரும்பித் தந்ததைத் தொடர்ந்து, அவர் அந்த வழக்கை ‘வாபஸ்’பெற்றுக் கொண்டார்.

Advertisement