சென்னை, நவ.17- ரசகுல்லா மேற்கு வங்காளத்திற்கு சொந்தமா அல்லது ஒடிசாவுக்கா என்ற சர்ச்சை வெடித்துள்ள சூழலில், இப்போது, தமிழகமும், கர்நாடகாவும், மைசூர் பாக் யாருக்கு சொந்தமானது என்ற மோதலில் களமிறங்கியுள்ளன. புவிசார் குறியீடுக்கு இந்த கேள்வி அவசியம் என்பதால், சோஷியல் மீடியாவில் தமிழ் மற்றும் கன்னட நெட்டிசன்கள் இதற்காக மோதிக்கொண்டுள்ளனர். 

1835ம் ஆண்டு பிரிட்டீஷ் ஆட்சியின்போது, மெக்காலே பிரபு மைசூர் பாக் குறித்து பேசியுள்ளதாக ஆதாரத்தை எடுத்து வைக்கிறார்கள் தமிழ் நெட்டிசன்கள். இந்திய நாடாளுமன்றத்தில் மெக்காலே மைசூர் பாக் குறித்து பேசியுள்ளாராம். மெட்ராஸ் மக்களால் மைசூர் பாக் கண்டுபிடிக்கப்பட்டது என்று, பெங்களூரை சேர்ந்த ஒரு நண்பர் என்னிடம் கூறினார் என்று மெக்காலே கூறியுள்ளாராம்.

மெக்காலே மேலும் கூறுகையில், பல வருடங்களாக தமிழர்கள் மைசூர் பாக் செய்து வந்தனர். ஆனால் ஒரு வழக்கறிஞர் அந்த சமையல் குறிப்பை திருடி மைசூர் ராஜாவிடம் வழங்கிவிட்டார். மைசூர் ராஜாதான் அந்த பண்டத்திற்கு மைசூர் பாக் என பெயர் சூட்டினார் என தெரிவித்துள்ளார்.

ஆனால், கன்னட நெட்டிசன்கள் வாதமோ வேறாக உள்ளது. மைசூரை ஆண்ட 4-வது கிருஷ்ணராஜ உடையார் காலத்தில், ராஜ சமையல்காரர் சர்க்கரை, நெய் சேர்த்து மைசூர் பாக் செய்ததாகவும், ராஜா அந்த பலகாரத்தின் பெயரை கேட்டபோது, எதுவுமே தோன்றவில்லை என்பதால் சமையல்காரர் மைசூர் பாக் என கூறியதாகவும் கன்னட நெட்டிசன்கள் கூறுகிறார்கள்.

பாக் என்பது பாகம் என்ற சமஸ்கிருத வார்த்தையில் இருந்து வந்ததாம். மைசூர் பகுதியில் (கன்னடத்தில் பாகா என்றால் பகுதியில்) என்ற பொருள் வரும் வகையில் மைசூர் பாக் என பெயர் சூட்டினாராம் ராஜாவின் சமையல்காரர்.   

சென்னை, நவ.17- திமுக தலைவர் கருணாநிதியை அ.தி.மு.க ஆதரவு எம்.எல்.ஏக்கள் கருணாஸ், தமிமுன் அன்சாரி, தனியரசு ஆகியோர் நேற்று திடீரென சந்தித்து நலம் விசாரித்தனர். முதுமையால் கருணாநிதி உடல்நலம் பாதிக்கப்பட்டு ஓய்வில் இருந்து வருகிறார்.

அவரை பிரதமர் நரேந்திர மோடி உள்ளிட்ட தலைவர்கள் சந்தித்து நலம் விசாரித்து வருகின்றனர். இந்நிலையில் அதிமுக ஆதரவு எம்.எல்.ஏக்களுக்கான கருணாஸ், தமிமுன் அன்சாரி மற்றும் ஆகியோர் நேற்று இரவு கருணாநிதியை சந்தித்து நலம் விசாரித்தனர். 

இச்சந்திப்புக்குப் பின் செய்தியாளர்களிடம் பேசிய தமிமுன் அன்சாரி, முதுபெரும் அரசியல் தலைவர் என்ற அடிப்படையில் கருணாநிதியை சந்தித்தோம். எங்களை பார்த்த உடன் கையை உயர்த்தி வாழ்த்து தெரிவித்தார். இச்சந்திப்பு என்பது மரியாதை நிமித்தமானது மட்டுமே. இதில் அரசியல் எதுவுமில்லை. கருணாநிதி முழுமையாக குணமடைந்து அவரது குரல் விரைவில் ஒலிக்க வேண்டும் என்பது எங்களது விருப்பம் என்றார். 

சென்னை, நவ.16- நடிகர் கமல்ஹாசன் இன்று ரூ 20 லட்சத்தை ஹார்வர்டு பல்கலைக்கழக தமிழ் இருக்கைக்கு வழங்குவதாக அறிவித்தார்.

ஹார்வர்டு பல்கலைக்கழக தமிழ் இருக்கைக்கு தமிழ் சினிமாவிலிருந்து கிட்டத்தட்ட ரூ 55 லட்சத்துக்கும் அதிகமாக நிதி வழங்கியுள்ளனர் நடிகர்கள் மற்றும் இசையமைப்பாளர்கள். ஹார்வர்ட் பல்கலைக் கழகத்தில் தமிழுக்கென்று ஒரு துறையை உருவாக்கி, மாணவர்களின் ஆய்வுக்கு உதவ வேண்டும் என்பது உலகத் தமிழர்களின் நீண்ட நாள் கோரிக்கை.

இதற்காக கடந்த ஆண்டிலிருந்து தீவிர முயற்சி மேற்கொண்டு வருகின்றனர். பல்வேறு நிகழ்ச்சிகளை நடத்தி அதன் மூலம் திரட்டினர். 

இதுவரை தமிழ் சினிமாவிலிருந்து ஏ.ஆர்.ரஹ்மான், நா.முத்துக்குமார், சூர்யா, விஷால் மற்றும் கருணாஸ் ஆகியோரும் ரூ.55 லட்சம் வரை வழங்கியுள்ளனர்.

 சென்னை, நவ.16- ஓர் அறை முழுக்க கட்டுக் கட்டாய் 2,000 ரூபாய் நோட்டுக்கள். ஒருபுறம் வருமான வரித்துறை அதிகாரிகள் தீவிரச் சோதனை நடவடிக்கைகளில் ஈடுபட்டிருக்க, மறுபுறம் குவிந்து கிடக்கும் பணக் கட்டுக்களின் முன்னால் பதட்டத்துடன் நிற்கிறார் நடிகர் விஷால்.

"சார், விடுங்க சார்.., இதெல்லாம் என் பணம்.., போங்க சார்.., என்று விஷால் சொல்லுகிறார். ஆனால், பணக் குவியலைப் பார்த்து திகைத்துப் போன அதிகாரிகள், ''என்ன சார்.., எப்படி இவ்வளவு பணம் வந்துச்சு, கடன் வாங்கினதா சொல்றீங்க.., இவ்வளவு பணம் இருக்கே, இதுக்கு என்ன ஆதாரம்  சார்...'' என்று கேள்வி மேல் கேள்வியாக கேட்கின்றனர்.

''எல்லாம் கஷ்டப்பட்டு சம்பாதித்த பணம் சார்.., விடுங்க..'' என்கிறார் விஷால்.

இதுவரைக்கும் கூட அண்மையில் நடிகர் விஷால் அலுவலகத்தில் வருமான அதிகாரிகள் புகுந்து நடத்திய ரெய்டு பற்றி வீடியோ தான் அமபலமாகி விட்டதோ என்று நினைத்திருப்பீர்கள்.

ஆனால், திடுதிப்பென உள்ளே நுழைந்த நடிகர் அர்ஜுன், "பணமா, உள்ளே, நல்லா பாருங்கய்யா.. அதனையும் வெள்ளைப் பேப்பர்.., ரெய்டுமில்ல ஒன்னுமில்ல.. ஷூட்டிங் டைம்லா கிளம்புங்க..'' என்று குரல் கொடுக்கிறார் சிரித்தபடியே.

'இரும்புத் திரை' படத்தின் ஷூட்டிங்கிற்கு நடுவில் திட்டமிட்டு எடுக்கப்பட்ட 'டுபாக்கூர்' வீடியோ தான் இது என்பது பின்னரே தெரிய வந்தது தன்னுடைய அலுவலகத்தில் நடந்த வருமான வரி ரெய்டை வைத்து விஷாலே எழுதிய ஸ்கிரிப்டுதான் இதுவாம். 

 

 

 

 

சென்னை, நவ,15- நந்தி விருது வழங்கிய ஆந்திர அரசுக்கு நடிகர் ரஜினிகாந்த் நன்றி தெரிவித்துள்ளார். நந்தி விருதுக்காக வாழ்த்திய கமல்ஹாசனுக்கும் ரஜினி நன்றி கூறியுள்ளார். ஒவ்வொரு ஆண்டும் தெலுங்கில் வெளியாகும் சிறந்த படங்களைத் தேர்ந்தெடுத்து ஆந்திர அரசு 'நந்தி விருதுகள்' வழங்கி வருகிறது. 

அத்துடன், 'என்.டி.ஆர். தேசிய விருது', உள்ளிட்ட சில சிறப்பு விருதுகளையும் வழங்கி வருகிறது. 2014, 2015 மற்றும் 2016-ஆம் ஆண்டுக்கான விருதுப் பட்டியல் இன்று அறிவிக்கப்பட்டது. ‘என்.டி.ஆர். தேசிய விருது’ 2014-ஆம் ஆண்டு கமல்ஹாசனுக்கும், 2016-ஆம் ஆண்டு ரஜினிகாந்துக்கும் அறிவிக்கப்பட்டுள்ளது. 

இதையொட்டி டுவிட்டரில் ரஜினிகாந்துக்கு கமல் வாழ்த்தும் தெரிவித்துள்ளார். மேலும் தனக்கு விருது வழங்கியதற்காக நன்றியும், மகிழ்ச்சியும் வெளிப்படுத்தியுள்ளார். 

சென்னை, நவ.14-  ஒருதலைக் காதலால் ஆதம்பாக்கத்தில் இளம்பெண் பெட்ரோல் ஊற்றி எரித்துக்கொலை செய்யப்பட்ட சம்பவம் அதிர்ச்சியை ஏற்படுத்தி உள்ளது. உயிரிழந்த பெண்ணின் பெயர் இந்துஜா எனக் கூறப்படுகிறது.

இவர் ஆதம்பாக்கம் ஏ.ஜி.எஸ் காலனியில் வசித்து வருகிறார். இவரை ஆகாஷ் என்பவர் காதலித்து வந்தார். இவரது காதலை இந்துஜா ஏற்க மறுத்து விட்டார் என்று கூறப்படுகிறது. இதனால் இந்துஜாவை பெட்ரோல் ஊற்றி எரித்து கொன்று விட்டு தப்பினார் ஆகாஷ். தலைமறைவாக இருந்த ஆகாஷை போலீசார் கைது செய்து விசாரித்து வருகின்றனர்.

ஆதம்பாக்கத்தில் வசித்து வரும் இந்துஜாவும், ஆகாஷ் என்பவரும் பள்ளியில் இருந்தே ஒன்றாக படித்தவர்கள். பட்டப்படிப்பு படித்து முடித்துள்ள இந்துஜாவை ஆகாஷ் காதலிப்பதாக கூறியுள்ளார். ஆகாஷ் காதலை ஏற்க இந்துஜா மறுத்து விட்டார். விரக்தியில் இருந்த ஆகாஷ் நேற்றிரவு இந்துஜா வீட்டிற்கு வந்து சண்டை போட்டுள்ளார். அப்போது இந்துஜாவின் தாயார் ரேணுகா, சகோதரி நிவேதிதாவும் வாக்குவாதம் செய்தனர்.

கையில் பெட்ரோல் கேனுடன் வந்த ஆகாஷ், நின்று கொண்டிருந்த இந்துஜா, அவரது தயார், சகோதரி மீது ஊற்றி தீ வைத்து எரித்தார். மூவருமே எரிந்தனர். இதில் இந்துஜா சம்பவ இடத்திலே உயிரிழந்தனர். இந்துஜாவின் தாயார், சகோதரி ஆகியோர் படுகாயங்களுடன் சிகிச்சை பெற்று வருகின்றனர்.

உறவினர்கள் அளித்த புகாரின் பேரில் தலைமறைவான ஆகாஷ் என்பவரை போலீசார் தேடி வந்த நிலையில் அவர் பிடிபட்டார். அவரிடம் போலீசார் விசாரணை மேற்கொண்டுள்ளனர். ஒருதலைக் காதல் விரக்தியால் காதலிக்கும் பெண்ணின் வீட்டை பெட்ரோல் ஊற்றி காதலன் தீ வைத்த சம்பவம் சென்னையையே அதிர்ச்சியில் மூழ்கவைத்துள்ளது. 

சென்னை, நவ.13- கோயம்புத்தூர் மாவட்டத்தில் காதலியை அவரது காதலன் எரித்துக்கொலை குற்றத்திற்காக கைது செய்யப்பட்டுள்ளார். ஜான்சிபிரியா (வயது 17) என்ற பள்ளி மாணவியும், செல்வகுமார் (வயது 22) என்ற விசைத்தறி தொழிலாளியும் கடந்த 4 வருடங்களாக காதலித்து வந்துள்ளனர்.

இவர்கள் இருவரும் வெவ்வேறு சாதியை சேர்ந்தவர்கள் என்பதால் இரு வீட்டார் பெற்றோரும் இருவரையும் கண்டித்துள்ளனர். இந்நிலையில் வீட்டில் ஜான்சிபிரியா மட்டும் தனியாக இருந்தார். அப்போது அங்கு வந்த காதலன் செல்வகுமார், நாம் இருவரும் தூக்குப்போட்டு தற்கொலை செய்துகொள்வோம் என்று வீட்டில் தூக்கு கயிற்றை கட்டினார்.

அவரிடம், தூக்குப்போட்டால் கழுத்து இறுகி செத்து விடுவது பயமாக இருக்கிறது என்று ஜான்சிபிரியா கூறி இருக்கிறார். இதைதொடர்ந்து மண்எண்ணெய் ஊற்றி தீ வைத்து இருவரும் தற்கொலை செய்து கொள்ளலாம் என்று செல்வகுமார் கூறி உள்ளார். முதலில் மண்எண்ணெயை ஊற்றி ஜான்சிபிரியா மீது தீவைப்பது என்றும், எரியும் தீயில் இருவரும் கட்டிப்பிடித்துக் கொள்ளலாம் எனவும் செல்வகுமார் கூறியுள்ளார். இதை ஜான்சிபிரியா ஏற்றுக்கொண்டார்.

இதைத்தொடர்ந்து ஜான்சிபிரியா மீது செல்வகுமார் மண்எண்ணெயை ஊற்றினார். பின்னர் தீக்குச்சியை பற்ற வைத்து அவர் மீது வீசினார். இதில் கண் இமைக்கும் நேரத்தில் ஜான்சிபிரியாவின் உடலில் தீப்பற்றி மளமளவென்று பரவி எரிந்தது. இதனால் வலியால் அலறித்துடித்தபடி அவர் காதலனை நோக்கி ஓடிவந்தார். அதைப் பார்த்து பதறிப்போன செல்வகுமார் அங்கிருந்து தப்பியோடி விட்டார்.

இதற்கிடையே தீ உடலில் பற்றியதால் ஜான்சிபிரியா அலறியுள்ளார். அவரின் அலறல் சத்தம் கேட்டு அக்கம்பக்கத்தினர் விரைந்துவந்து தீயை அணைத்தனர். பின்னர் அவரை மீட்டு ஆம்புலன்ஸ் மூலம் கோவை அரசு ஆஸ்பத்திரிக்கு அனுப்பி வைத்தனர். அங்கு அவசர சிகிச்சை பிரிவில் அனுமதித்து மருத்துவர்கள் சிகிச்சை அளித்தனர்.

இருப்பினும் சிகிச்சை பலனின்றி அவர் பரிதாபமாக உயிரிழந்தார். காதலியை உயிருடன் எரித்துக் கொன்ற செல்வகுமாரை போலீசார் கைது செய்துள்ளனர்.

பெங்களூர், நவ.13- நடிகர்கள் அரசியலுக்கு வருவது நாட்டுக்கு பேரழிவு என நடிகர் பிரகாஷ்ராஜ் கடுமையாக விமர்சித்துள்ளார்.நடிகர்கள் கமல், ரஜினி ஆகியோர் அரசியலுக்கு வருவதற்கான பணிகளை செய்து வருகின்றனர். 

இவர்களின் இந்த முடிவுக்கு பெரும்பாலான நடிகர்கள் வரவேற்பு அளித்துள்ளனர். ஆனால் நடிகர் பிரகாஷ் ராஜ் இதற்கு எதிர்ப்பு தெரிவித்துள்ளார். பெங்களூரில் இன்று செய்தியாளர்களிடம் பிரகாஷ்ராஜ் கூறியதாவது: 

நடிகர்கள் அரசியலுக்கு வர கூடாது. திரைப்பட நடிகர்கள் கட்சித் தலைவர்களாவது நாட்டுக்கு மிகப் பெரிய பேரழிவு ஏற்படும். நடிகர்கள் அரசியல் கட்சியில் சேருவதையும் விரும்பவில்லை. கமல்ஹாசன் தொடங்கும் கட்சியில் நான் ஒருபோதும் சேரப்போவதில்லை. நடிகர்கள் தங்களது பொறுப்பை உணர்ந்து செயல்பட வேண்டும். நடிகர்கள் என்ற ஒரே காரணத்துக்காக அரசியலுக்கு வரக்கூடாது. இவ்வாறு பிரகாஷ்ராஜ் கூறியுள்ளார். 

விவசாயிகள் பிரச்சினை, பெங்களூர் பத்திரிகையாளர் கௌரி லங்கேஷ் கொலை வழக்கு, தாஜ்மகால் புராதன சின்னங்களிலிருந்து நீக்கம் உள்ளிட்ட விவகாரங்களில் மத்திய அரசுக்கு எதிராக பல்வேறு கருத்துகளை தெரிவித்து வந்தார் பிரகாஷ் ராஜ் என்பது குறிப்பிடத்தக்கது.. 

சென்னை, நவ.12- தமிழகம் மற்றும் புதுச்சேரியில் 5 நாட்களுக்கு தொடர்ந்து கனமழை பெய்ய வாய்ப்பு இருப்பதாக இந்திய வானிலை ஆய்வு மையம் தெரிவித்துள்ளது.

தென்மேற்கு வங்கக்கடல் பகுதியில் நிலவி வந்த குறைந்த காற்றழுத்த தாழ்வு மைய பகுதி அதே இடத்தில் நிலவி வருவதால் தமிழகத்தின் உள்மாவட்டங்களில் ஒரு சில இடங்களில் மிதமான மழைக்கு வாய்ப்புள்ளதாகவும், வட கடலோர மாவட்டங்களில் ஒரு சில இடங்களில் கன மழைக்கு வாய்ப்புள்ளதாகவும் சென்னை வானிலை மையம் தெரிவித்திருந்தது.

இந்நிலையில், தமிழகம் மற்றும் புதுச்சேரியில் கனமழைக்கு வாய்ப்பு உள்ளதாக இந்திய வானிலை மையம் எச்சரித்துள்ளது. தெற்கு சுந்திரா கடலோரப் பகுதிகளில் இடியுடன் கூடிய மழைக்கு வாய்ப்பு இருப்பதாகவும் இந்திய வானிலை ஆய்வு மையம் தெரிவித்துள்ளது.

 

சென்னை, நவ.9- பிரபல நடிகை அனுயாவின் ஆபாசப் படம் என குறிப்புடன் ஒரு படத்தை டுவிட்டரில் பரவ விட்டுள்ளனர். இதனை நீக்கக் கோரி அனுயா சைபர் குற்றத் துறையிடம் புகார் செய்துள்ளார்.

 நடிகைகளின் ஆபாச, நிர்வாணப் படங்கள் அடிக்கடி இணையத்தில் வெளியாகி பரபரப்பு கிளப்புவது வழக்கம். இவற்றில் சில உண்மையாக இருக்கும். பல வெட்டி ஒட்டி செய்யப்பட்டவையாக இருக்கும்.

சில மாதங்களுக்கு முன்பு 'சுசி லீக்ஸ்' என்ற பெயரில் நடிகை சஞ்சிதா ஷெட்டி உள்ளிட்ட பலரது ஆபாசப் படங்கள் வெளியாகி, பின் நீக்கப்பட்டன. 

'சிவா மனசுல சக்தி', 'நண்பன்' உள்ளிட்ட தமிழ்ப் படங்கள், மற்றும் அண்மையில் பிக்பாஸில் இடம்பெற்ற நடிகை அனுயாவின் வெட்டி ஒட்டும் கணினி தொழில் நுட்பத்தில் உருவான ஆபாச படமும் பரவியது. இந்தப் படத்தை டுவிட்டரில் இருந்து நீக்குமாறு சைபர் குற்றபத் தடுப்புப் போலீசில் அனுயா புகார் மனு அளித்துள்ளார். 

இது குறித்து நடிகை அனுயா, "சமூகவலை தளத்தில் வெட்டி ஒட்டப்பட்ட  எனது ஆபாசப் படம் பரவி வருகிறது. இது எனது புகழுக்கு களங்கத்தை ஏற்படுத்தி வருகிறது. எனவே, அந்தப் ஆபாச படத்தை டுவிட்டர் உள்ளிட்ட சமூக வலைதளங்களில் இருந்து அகற்ற நடவடிக்கை எடுக்க வேண்டும்," என அந்தப் புகாரில் வலியுறுத்தியுள்ளார்.

 

 

 

சென்னை, நவ.9- சசிகலாவின் உறவினர்களான விவேக், திவாகரன் ஆகியோர் வீடுகள் உள்பட 190 இடங்களில் வருமான வரித் துறையினர் அதிரடிச் சோதனை நடத்தி வருகின்றனர். ஜெயா டி.வி முதல், ஜெயலலிதாவின் கொடநாடு பங்கள வரையில் ஒரே சமயத்தில் இந்தச் சோதனைகள் நடப்பது தமிழகத்தில் பெரும் அதிர்ச்சி அலையை ஏற்படுத்தி இருக்கிறது.

வரி ஏய்ப்பு புகாரைத் தொடர்ந்து வருமான வரித் துறை அதிகாரிகள் குழுவினர் சென்னை மகாலிங்கபுரத்தில் உள்ள ஜெயா டிவி சி.இ.ஓ விவேக் ஜெயராமன், தி.நகரில் உள்ள இளவரசி மகள் கிருஷ்ணப்ரியா வீடு, ஜாஸ் சினிமாஸ், 'நமது எம்.ஜி.ஆர்' பத்திரிகை அலுவலகம் ஆகியவற்றில் சோதனை நடத்தி வருகின்றனர். 

இதேபோல் திருவாரூர் மாவட்டம் மன்னார்குடியில் உள்ள சசிகலாவின் சகோதரர் திவாகரன் வீட்டிலும் சோதனை நடைபெறுகிறது. மன்னார்குடி அருகே சுந்தரகோட்டையில் திவாகரனுக்கு சொந்தமான செங்கமலத்தாயார் கல்லூரியிலும், அதன் ஊழியர்கள் வீடுகளிலும் சோதனை நடைபெறுகிறது.

தஞ்சாவூரில் சசிகலா அண்ணன் மகன் டாக்டர் வெங்கடேசன் வீட்டிலும் வருமான வரி சோதனை நடைபெறுகிறது. சசிகலாவின் தம்பி வினோதகனின் மகன் மகாதேவன் வீட்டில் ஐடி சோதனை நடைபெறுகிறது. மகாதேவன் உடல்நலக் குறைவால் கடந்த சில மாதங்களுக்கு முன்பு காலமானார்.

கூடலூரில் உள்ள சசிகலாவின் ஆதரவாளர் சஜீவன் வீட்டிலும் அவரது மர மில்களிலும் சோதனை நடைபெறுகிறது. சசிகலா உறவினர்கள், ஆதரவாளர்களுக்கு சொந்தமான சென்னை, பெங்களூர், தஞ்சாவூர், மன்னார்குடி, கோடநாடு, கூடலூர் உள்பட 190 இடங்களில் சோதனை நடைபெறுகிறது.  

 

More Articles ...