சென்னை, ஜன.23- இலங்கையின் பிரபல பாப் இசைப் பாடகரான சிலோன் மனோகர் என்ற ஏ.இ. மனோகரன் (வயது 73) நேற்று இங்கு காலமானார். பல மொழிகளில் பாடும் திறன் கொண்ட மனோகர்,  கோடிக்கணக்கான இசை நெஞ்சங்களைக் கவர்ந்தவர். 

இவர் பாடிய 'சிராங்கனி.., சுராங்கனி..,' என்ற இலங்கைப் பாடல் இந்திய ரசிகர்களிடையேயும் பிரபலமான ஒன்றாகும்.  சிலோன் மனோகர் என்ற பெயரில் தென்னிந்திய திரைப்படங்களில் பாடியும் நடித்தும் வந்த இவர் சில காலமாக உடல் நலம் குன்றியிருந்ததாகத் தெரிகிறது.

தமிழ் மற்றும் இந்திப் படங்களில் நடித்திருக்கும் மனோகர் தொடர்ந்து தொலைக்காட்சி தொடர்களிலும் நடித்து வந்தார். 

சென்னை, ஜன.17- சூப்பர் ஸ்டார் ரஜினிகாந்த் தனிக்கட்சி தொடங்கி சட்டசபை தேர்தலில் போட்டியிட்டால் அவரால் 33 இடங்களில் தான் வெல்ல முடியும். ஆட்சி அமைக்க முடியாது என்று 'இந்தியா டுடே' கருத்து கணிப்பு ஒன்றை வெளியிட்டுள்ளது. 

தமிழகத்தில் தேர்தல் நடைபெற்றால் தி.மு.க 130 இடங்களில் வென்று ஆட்சியைக் கைப்பற்றும். கடந்த 2016 ஆண்டு தேர்தலை விட தி.மு.கவுக்கு 32 இடங்கள் கூடுதலாக கிடைக்கும் என்று இந்தியா டுடே- கார்வி நிறுவனம் இணைந்து தமிழக அரசியல் நிலவரம் குறித்து நடத்திய கருத்து கணிப்பு முடிவு தெரிவித்துள்ளது. 

தற்போது ஆளும்கட்சியான அ.தி.மு.க எதிர்வரும் தேர்தலில், படுதோல்வியைச் சந்திக்கும். அக்கட்சிக்கு 68 இடங்கள் மட்டும்தான் கிடைக்கும். 2016 ஆண்டுத் தேர்தலில் வென்ற 68 தொகுதிகளை அ.தி.மு.க இழக்கும் என்று அந்த ஆய்வு கூறியுள்ளது. 

இதனிடையில், ரஜினிகாந்தின் கட்சி 33 தொகுதிகளில் வெல்லும். இதர கட்சிகள் 3 இடங்களில் வெற்றி பெறும் என்று அக்கருத்து கணிப்பில் தெரிவிக்கப்பட்டுள்ளது. 

நடிகர் ரஜினிகாந்த் கட்சி தொடங்கினாலும், அவரால் ஆட்சி அமைக்க முடியாது என்று இந்தியா டுடேவின்  கருத்து கணிப்பு கூறியுள்ளது. 

அரசியலில் ரஜினி வெல்வாரா என்ற கேள்விக்கு 53 விழுக்காட்டினார், கண்டிப்பாக ரஜினி வெல்வார் என்று கூறியுள்ளனர். 34 விழுக்காட்டினர், அவரால் அரசியலில் வெல்ல முடியாது என்று தெரிவித்தனர். ரஜினியின் அரசியல் எதிர்காலம் குறித்து இப்போது எவ்வித கருத்து தெரிவிக்க முடியாது என 13 விழுக்காட்டினர் கூறியுள்ளனர்.

 

 

 

ஜன.17- எதிர்வரும் பிப்ரவரி மாதம் 21-ஆம் தேதியன்று, தனது கட்சியின் பெயரை அதிகாரப்பூர்வமாக அறிவித்து, அதன் பின்னர், தமிழகம் முழுவதும் தாம் சுற்றுப்பயணம் ஒன்றை மேற்கொள்ளவிருப்பதாக நடிகர் கமல்ஹாசன் அறிக்கை ஒன்றின் வாயிலாக தகவல் வெளியிட்டுள்ளார்.  

தமிழக அரசியலில் களமிறங்க திட்டமிட்டுள்ள கமல்ஹாசன், தமது கட்சி தொடர்பான அறிவிப்பை வெளியிடாமல் இருந்தார். இதனிடையில், சூப்பர் ஸ்டார் ரஜினிகாந்த, கடந்த இரண்டு வாரங்களுக்கு முன்னர், தாம் கட்சியைத் தொடங்க விருப்பதாக தனது ரசிகர்களுடனான கூட்டத்தில் அறிவித்திருந்தார். அதனைத் தொடர்ந்து, கமல்ஹாசனும் புதியக் கட்சி தொடர்பான அறிக்கை விடுத்திருப்பது, தமிழக மக்கள் மத்தியில் பெரும் பரபரப்பை ஏற்படுத்தியுள்ளது. 

"என்னை வளர்த்தெடுத்த சமூகத்துக்கு எனது நன்றியை இங்கு தெரிவிக்கிறேன். சொல்லில் சொன்ன நன்றியைத் தாண்டிய கடமைகள் நிறைய இருக்கின்றன. அக்கடமைகளின் துவக்கமாக என் மக்களை நேரில் சந்திக்க, நான் பயணம் ஒன்றை மேற்கொள்ளவிருக்கிறேன். நான் பிறந்த ராமநாதபுரத்தில் இருந்து எதிர்வரும் பிப்ரவரி மாதம் 21-ஆம் தேதியன்று நான் இந்த பயணத்தை துவக்க இருக்கிறேன்" என்று கமல்ஹாசன் தனது அறிக்கையில் தெரிவித்துள்ளார். 

"முதற்கட்டமாக மதுரை, ராமநாதபுரம், திண்டுக்கல், சிவகங்கை மாவட்ட மக்களை சந்திக்க நான் திட்டமிட்டுள்ளேன். மக்களுடனான இந்தச் சந்திப்பு புரட்சி முழக்கமோ, கவர்ச்சிக் கழகமோ அல்ல. இது என் புரிதல். எனக்கான கல்வி" 

"இது என் நாடு, இதை நான் காப்பாற்ற வேண்டும் என்கிற எண்ணம் எனக்கு மட்டும் இருந்தால் போதாது. இங்கு தலைவன் என்பவன் வழி நடத்த மட்டுமின்றி பின்பற்றவும் தயாராக இருக்க வேண்டும். தலைவனிடத்தில் ஒரு தலைமைப் பொறுப்பு இருக்க வேண்டும், நாமெல்லாம் சேர்ந்து இந்தத் தேரை இழுக்கிறோம் என்ற எண்ணம் வேண்டும். அதுவே ஜனநாயகம் அந்த நாயகர்களைச் சந்திக்கத்தான் நான் சென்றுகொண்டிருக்கிறேன்." 

"இது ஆட்சியைப் பிடிக்கும் திட்டமா என்று சிலர் கேட்பார்கள். ஆட்சியை ஒரு தனி ஆள் பிடிக்க முடியுமா? யாரின் ஆட்சி, யாரின் அரசு? இது குடியின் அரசு. முதலில் அவர்களை உயர்த்த வேண்டும். அதற்கான கடமைகளை நினைவுபடுத்த வேண்டும். அதை நோக்கிய பயணம்தான் இது. உங்களின் ஆதரவோடு இந்தப் பயணத்தை தொடங்குகிறேன். கரம் கோர்த்திடுங்கள். களத்தில் சந்திப்போம்." என்று நடிகர் கமல்ஹாசன் அந்த அறிக்கையில் தெரிவித்திருந்தார். 

சென்னை, ஜன.15- மூத்த பத்திரிகையாளரும் எழுத்தாளருமான ஞாநி சங்கரன் (வயது 63) உடல்நலக் குறைவால் சென்னையில் இன்று காலமானார். எழுத்தாளர், பத்திரிகையாளர், நாடக ஆசிரியர் என்ற பன்முகதன்மை கொண்டவாரான இவரின் மறைவு, பலரை சோகத்தில் ஆழ்த்தியுள்ளது. 

கடந்த சில மாதங்களாக சிறுநீரக நோயால் அவதியுற்று வந்த ஞாநி, வாரத்திற்கு 3 முறை 'டயாலீசிஸ்' சிகிச்சையைப் பெற்று வந்தார். இன்று அதிகாலை வீட்டில் இருந்த ஞாநிக்கு, திடீரென மூச்சுத்திணறல் ஏற்பட்டு, சற்று நேரத்தில் அவரின் உயிர் பிரிந்தது. 

அவரது உடல் கே.கே.நகரில் உள்ள அவரது வீட்டில் வைக்கப்பட்டுள்ளது. அவரது உடலுக்கு அரசியல் தலைவர்களும், கட்சி பிரமுகர்களும், பத்திரிகையாளர்களும் அஞ்சலி செலுத்தி வருகிறார்கள். 

1980-களின் இறுதியில் போபர்ஸ் பீரங்கி ஊழல் நாட்டையே உலுக்கிய போது முரசொலியில் புதையல் எனும் பகுதியில் அது தொடர்பான தகவல்களை ஞாநி விரிவாக எழுதி, பிரபலமடைந்தார். அதனைத் தொடர்ந்து, தொலைக்காட்சி விவாதங்களிலும் அவர் பங்கேற்றார். 

கடந்த 2014-ம் ஆண்டு அவர் அரவிந்த் கெஜ்ரிவாலால் ஈர்க்கப்பட்டு ஆம்-ஆத்மி கட்சியில் சேர்ந்தார். அந்த கட்சி சார்பில் 2014-ம் ஆண்டு ஆலந்தூர் சட்டசபை தொகுதியில் போட்டியிட்டு தோல்வியுற்றதைத் தொடர்ந்து, அவர் அரசியலை விட்டு அவர் விலகினார். 

இச்சமயத்தில்தான் அவருக்கு சிறுநீரக நோயால் பாதிக்கப்பட்டார். ஞாநிக்கு பத்மா என்ற மனைவியும், மனுஷ் நந்தன் என்ற மகனும் உள்ளனர்.  

மறைந்த ஞாநியின் உடலுக்கு இன்று இறுதி சடங்கு நடைபெறுகிறது. அதன் பின்னர், அவரின் உடல் சென்னை மருத்துவக் கல்லூரிக்கு தானமாக வழங்கப்படுகிறது. 

மறைந்த எழுத்தாளர் ஞாநி உடலுக்கு நடிகர் ரஜினிகாந்த் இறுதி அஞ்சலி செலுத்தினார்.  தி.மு.க. செயல் தலைவர் மு.க.ஸ்டாலின் இரங்கல் செய்தி வெளியிட்டுள்ளார்.

 

சென்னை, ஜன.13- பொங்கலுக்கு முதல் நாளான இன்று சென்னையில் போகி கொண்டாடிய மக்களால் எரிக்கப்பட்ட பொருள்களில் இருந்து கிளம்பிய புகையுடன் பனி மூட்டமும் சேர்ந்து கொண்டதால், சென்னை விமானநிலையத்தில் தரையிறங்க வேண்டிய 12 விமானங்கள் திருப்பிவிடப்பட்டன.

தமிழகம் முழுவதும் பொங்கல் அமோகமாக களைகட்டி விட்டது இந்நிலையில் இன்று போகி என்பதால்  பழையன கழிதல் என்பதற்கொப்ப பழைய பொருள்களை எரிப்பதை அதிகாலையிலேயே மக்கள் தொடங்கி விட்டனர். சென்னையைச் சுற்றிலும் இதனால் கரும் புகை வானத்தை சூழ்ந்தது.

மார்கழி கடைசி என்பதால் பனி மூட்டமும் கடுமையாக இருந்தது.  இந்தப் புகை மூட்டமும் சேர்ந்து விமானங்கள் தறையிறங்குவதற்கு பாதகமாக அமைந்து விட்டன. அதேவேளையில் சாலைகளிலும் இந்தப் புகை மூட்டத்தினால் போக்குவரத்துகள் பெரிதும் பாதிப்படைந்தன.

சென்னை விமான நிலையத்தில் ஓடுபாதைகளை  புகை மூட்டம் மறைத்தால் அதிகாலையில் விமானங்கள் தறையிறங்க அனுமதிக்கப்படவில்லை. அதே போன்று காலையில் விமானங்கள் எதுவும் புறப்படவும் அனுமதிக்கப்படவில்லை.

சென்னையில் தரையிறங்க வேண்டிய 12 விமானங்கள் ஹைதராபாத்திற்கு திசை திருப்பி விடப்பட்டன.  அதேவேளையில் சென்னயில் இருந்து புறப்படவிருந்த 30 விமானங்களின் பயணமும்  தாமதமானது.

 

 

 

 

 

 

 

சென்னை, ஜன.4- அண்மையில் நடைபெற்ற ஆ.கே நகர் இடைத்தேர்தலில் தினகரன் வெற்றி பெற்ற நிலையில் அவரை ஓட்டுப் போட்டு வெற்றியடைய வைத்த மக்களை நடிகர் கமல்ஹாசன் விளாசி எடுத்தார்.

சில காலமாக தன் பட வேலையில் பிஸியாக இருந்த கமல் டிவிட்டரிலும் பத்திரிகைகளிலும் அதிகம் தலைக்காட்டாமல் இருந்தார். இந்நிலையில், வார இதழ் ஒன்றுக்கு பேட்டியளித்த கமல்ஹாசன், ஆர்.கே நகர் மக்கள் பணம் வாங்கி ஓட்டுப் போட்டதாக கூறி அவர்களைக் கடுமையாக விமர்சித்துள்ளார்.

கமல் தன் பேட்டியில், "ஆர்.கே. நகர் இடைத்தேர்தல் தமிழகத்திற்கு மட்டுமல்ல இந்திய ஜனநாயகத்திற்கே ஏற்பட்டுள்ள மிகப் பெரிய களங்கம். இது ஊரறிய நடந்த குற்றம். இந்த குற்றத்திற்கு மக்களும் உடந்தையாக இருக்கிறார்கள் என்பது தான் மிக பெரிய சோகம். இது ஜனநாயகத்தின் வீழ்ச்சி" என்றும் கூறியுள்ளார்.

மேலும், "சென்னை வெள்ளத்தின்போது உங்களின் உதவிகள் எப்படிப்பட்டது என்று உலகுக்குக் காட்டினீர்கள். அப்படிப்பட்ட நீங்கள் இன்று ரூ.20 டோக்கனுக்கு விலை போய் இருப்பது பிச்சை எடுப்பதை விட கேவலமானது. அதிலும் திருடனிடம் பிச்சை எடுத்த கேவலம் எங்கேயாவது நடந்தது உண்டா?" என்றும் கமல் கடுமையாக விமர்சித்துள்ளார். 

சென்னை, ஜன.2- திருவண்ணாமலை அண்ணாமலையார் கோயில் மீது பெட்ரோல் குண்டு வீசப்படும் என்று அந்த கோயிலின் இணை ஆணையருக்கு மிரட்டல் வந்துள்ளது. இதனால் பக்தர்கள் அதிர்ச்சி அடைந்துள்ளனர்.

அக்னி தலமாக விளங்குவது திருவண்ணாமலை அண்ணாமலையார் கோயில். இங்கு தீப திருவிழாவின்போது மலை மீது தீபம் ஏற்றுவது மிகவும் பிரபலம். இதை காண லட்சக்கணக்கான பக்தர்கள் வருகை தருவர். மிகவும் பாரம்பரியமான இக்கோயிலின் மீது பெட்ரோல் வெடிகுண்டு வீசப்படும் என்று மிரட்டல் கடிதம் வந்துள்ளது. 

கோயில் இணை ஆணையர் ஜெகநாதனுக்கு வந்த மிரட்டல் கடிதத்தில் காஞ்சி சிறுத்தைகள் என்ற பெயர் குறிப்பிடப்பட்டிருந்தது குறிப்பிடத்தக்கது. இதுகுறித்து திருவண்ணாமலை போலீஸில் ஜெகநாதன் புகார் கொடுத்தார். இதையடுத்து அங்கு கூடுதல் பாதுகாப்பு போடப்பட்டுள்ளதாக செய்திகள் கூறுகின்றன.

சென்னை, ஜன.2- அண்மைய சில காலமாக அரசியல், சமூக விசயங்களுக்கு தொடர்ந்தார் போல் குரல் கொடுத்து வரும் நடிகர் பிரகாஷ்ராஜ் தன்னை நிர்பந்தம் செய்தால் தானும் அரசியலுக்கு வருவதாக கூறியுள்ளார்.

பெங்களூர் பிரஸ் கிளப் சார்பில் பிரகாஷ்ராஜுக்கு சிறந்த மனிதர் விருது வழங்கப்பட்டது. விழாவில் கலந்து கொண்டு விருது பெற்றப்பின் செய்தியாளர்களிடம் பேசியபோது, என்னுடைய தோழி கவுரி லங்கேஷ்யின் கொலைக்குப் பிறகு தான் நான் சமூக அரசியல் விசயங்கள் குறித்து குரல் எழுப்பி வருகிறேன் என்றார்.

மேலும், "எனக்கு அரசியல் ஆசை கிடையாது. ஆனால் என்னை நிர்பந்தம் செய்தால் அரசியலுக்கு வரவும் தயங்க மாட்டேன்" என்று கூறினார்.

ரஜினி தனிக்கட்சி தொடங்குவதாக அறிவித்துள்ளது குறித்து கேட்கையில் அதனைத் தாம் வரவேற்பதாகவும் அவருக்கு இருக்கும் ரசிகர்கள் பலம், தொண்டர் பலமாக மாறும் எனவும் கூறினார். "ரஜினி அரசியலுக்கு வருவதை அவரது ரசிகர்கள் சந்தோஷமாக வரவேற்பதைப் போன்றே சக நடிகனாக நானும் வரவேற்கிறேன்" எனவும் பிரகாஷ்ராஜ் கூறினார்.

 சென்னை, ஜன.1- ரஜினிகாந்த் அரசியலுக்கு வருவது உறுதி என்று ரசிகர்களுடனான சந்திப்பின் போது அறிவித்திருக்கும் நிலையில் அவரை எதிர்த்து வருடைய தொகுதியில் தாம் போட்டி போடத்தயாராக இருப்பதாக தமிழ்ப்பட இயக்குனர் கௌதமன் பகிரங்கமாக அறிவித்துள்ளார்.

சூப்பர் ஸ்டார் ரஜினி காந்த், தனிக்கட்சி தொடங்கி 234 தொகுதிகளிலும் போட்டியிடுவேன் என்றும் கூறியுள்ளார். இது குறித்து இயக்குநர் கௌதமன் கூறுகையில், நினைத்து பார்க்க முடியாத துயரமான மனோநிலையில் தான். இந்த ஆண்டு தொடங்குகிறது. 50 ஆயிரம் ஆண்டுகள் வரலாறு கொண்ட இந்த தமிழினம் இன்று சொல்ல முடியாத அளவுக்கு உரிமையை இழந்துள்ளது என்று குறிப்பிட்டார்.

அவர் விடுத்துள்ள அறிக்கையில் மேலும் கூறியிருப்பதாவது:

நீர், நிலம், ஆறு, வளம் ஆகியவை மட்டுமல்லாமல் உயிரையும் உரிமையும் இழந்து வரும் நிலையில் மீனவர்கள், விவசாயிகள், மாணவர்கள் உரிமையை காப்பாற்ற எங்கேயாவது இருந்து ஓர் உண்மையான தெளிவான பெரும் வெளிச்சம் தமிழ் இனத்தின் விடியலுக்கு ஏதாவது கிடைத்து விடாதா என்று தேடி வருகிறோம். 

இந்நிலையில் ரஜினிகாந்த் ஒரு துக்கச் செய்தியை தமிழ் இனத்துக்கு புத்தாண்டு பரிசாக கொடுத்திருக்கிறார். தமிழர்களில் உயிர், உரிமைகள் பறிக்கப்படும் போது என்றாவது களத்தில் நின்று போராடியிருக்கிறாரா? இந்த நிலையில் ஆன்மீக அரசியலை அவர் பிரகடனப்படுத்தியுள்ளார்  மேலும் 234 தொகுதிகளிலும் போட்டியிடுவேன் என்று கூறியுள்ளார்.

விவசாயிகளை நிர்வாணமாக ஓடவிட்ட நிகழ்வுக்காகவே கத்திபாராவை இழுத்து பூட்டினோம் எங்கள் மண்ணை ஆக்கிரமிக்க அழித்தொழிக்க அபகரிக்க யார் வந்தாலும் நாங்கள் எதிராக நிற்போம். நீங்கள் போருன்னு சொல்லிட்டீங்க நாங்களும் தயார்.

வள்ளலாரின் ஆன்மிகத்தை தாண்டி எங்களுக்கு தெரியாத பாபாவின் ஆன்மிகம் எங்களுக்கு தேவையில்லை ரஜினிகாந்த் அரசியலுக்கு வருவது ஆபத்தானது. அவர் எந்த தொகுதியில் போட்டியிட்டாலும் அத்தொகுதியில் அவரை எதிர்த்து நான் நிற்பேன் என்றார் கௌதமன்.  

 

 

 

 

 

சென்னை, ஜன.1- ரஜினிகாந்த்  தொடங்கவிருக்கும் புதிய அரசியல் கட்சியின் பெயரை தைத் திருநாளான பொங்கல் திருநாளில் அறிவிப்பார் என்று நம்பத் தகுந்த வட்டாரங்கள் தெரிவித்துள்ளன.

ரஜினிகாந்த் தனது ரசிகர்களுடன் 2 ஆவது முறையாக கடந்த டிசம்பர் 26 ஆம் தேதி முதல் 31 ஆம் தேதி வரை சந்த்தித்தார். அப்போது அரசியல் பிரவேசம் குறித்து அறிவிப்பார் என்று பெரிதும் எதிர்பார்க்கப்பட்டது. 

ஆனால் அவரோ, டிசம்பர் 31 ஆம் தேதி அறிவிப்பேன் என்று கூறியிருந்தார். இதனால் நேற்றைய தினம் ஒட்டு மொத்த தமிழக மற்றும் ஆங்கில ஊடகங்கங்களும் ரஜினி என்ன அறிவிப்பார் என்று எதிர்பார்த்து காத்திருந்த வேளையில் தனிக்கட்சி தொடங்கப்போவதை அவர் அறிவித்தார்.

 ரசிகர்கள் மத்தியில் பேசுகையில், ''நான் அரசியலுக்கு வருவது உறுதி உள்ளாட்சி தேர்தலில் போட்டியிடவில்லை . சட்ட சபை தேர்தலில் 234 தொகுதிகளிலும் போட்டியிடுவோம் என்று அறிவித்தார்.

இதையடுத்து அவர் கட்சியின் பெயர், கொடி குறித்த ஆர்வம் அதிகரித்தது. இந்நிலையில் பொங்கல் பண்டிகை அன்று அவர் கட்சி பெயர் குறித்து அறிவிப்பார் என்று தகவலறிந்த வட்டாரங்கள் தெரிவித்தன. 

தை பிறந்தால் வழி பிறக்கும் என்பது பழமொழி. அது போல தமிழக மக்களுக்கு  தனது கட்சியின் பெயரை பொங்கல்  திருநாளன்று அறிவிக்க ரஜினி திட்டமிட்டிருப்பதாகவும் தெரிகிறது. 

 

 

 

 

சென்னை, டிசம்.31- அரசியலுக்கு வருவாரா, வரமாட்டாரா? என்று பல லட்சம் ரசிகர்கள் மத்தியில் கடந்த சில ஆண்டுகளாகவே நிலவி வந்த கேள்விக்கு பதிலாக, "தனிக் கட்சி தொடங்கி, அடுத்து வரும் சட்டமன்றத் தேர்தலில் போட்டியிவேன்" என இன்று தமது ரசிகர்கள் முன்னிலையில் பகிரங்கப் பிரகடனம் செய்தார் சூப்பர் ஸ்டார் ரஜினிகாந்த். 

சென்னை ராகவேந்திரா மண்டபத்தில் ஆறாவது நாளாக நடந்த ரசிகர்களுடனான சந்திப்புக்காக ரஜினிகாந்த் மண்டபத்திற்கு வந்து சேர்ந்த போது  அவருக்கு மாபெரும் வரவேற்பை நல்கினர். உரிய பாதுகாப்பு ஏற்பாட்டிற்கு இடையே மண்டபம் நிரம்பி வழிந்த நிலையில், திரண்டிருந்நத தம்முடைய ரசிகர்கள் முன்னிலையில் ரஜினி உரையாற்றினார்.

அவர் கூறியதாவது: 

ரசிகர்கள் இந்த அளவுக்கு கட்டுப்பாடோடு  இருப்பது மகிழ்ச்சி அளிக்கிறது. இந்தக் கட்டுப்பாடும் ஒழுக்கமும் இருந்தால் நாம் எதையும் சாதித்து விடலாம்.

நான் அரசியலுக்கு வருவது குறித்து எனக்குப் பயம் இல்லை. இந்த மீடியாக்காரர்களைக் கண்டால் தான் பயம்.  நான் எதையாவது சொல்ல அவர்கள் அதை விவாதமாக்கி விடுகிறார்கள். 

நான் அரசியலுக்கு வருவது உறுதி. இது காலத்தின் கட்டாயம். வரப்போகின்ற சட்டமன்றத் தேர்தலில் தனிக்கட்சி, ஆரம்பித்து தமிழ்நாடு முழுவதும் உள்ள 234 தொகுதிகளிலும் போட்டியிடுவோம்.

உள்ளாட்சித் தேர்தலுக்கு கால அவகாசம் இலலததால் போட்டியிடவில்லை. நான் பணம், பெயர், புகழுக்காக அரசியலுக்கு வரவில்லை.  கனவில் கூட நினைத்துப் பார்க்க முடியாத அளவுக்கு ஆயிரம் மடங்கு அதை மக்கள்  எனக்கு கொடுத்திருக்கிறார்கள்.

இப்போது அரசியல் கெட்டுப் போய்விட்டது.  ஜனநாயகம் சீர் கெட்டுப் போய் விட்டது.  எல்லாவற்றையும் மாற்றவேண்டும். இவ்வாறு ரஜினிகாந்த் அறிவித்தார்.

 

 

 

 

 

 

 

 

 

More Articles ...