Top Stories

கோலாலம்பூர், அக்.26- நாளை தாக்கல் செய்யபடவிருக்கும் 2018-ஆம் ஆண்டின் பட்ஜெட்டில் இந்திய சமுதாய வர்த்தகர்களின் வளர்ச்சிக்கு வழிவகுக்கும் வாய்ப்புகள் வழங்கப்படும் என்று இந்திய தொழில் வர்த்தக சங்கங்களின் சம்மேளனம் நம்பிக்கைத் தெரிவித்துள்ளது. 

நாட்டின் வளர்ச்சியில் இந்திய தொழில் வர்த்தக சமூகத்தின் பங்கு குறித்து அரசாங்கம் நன்கு அறிந்திருப்பதாகவும், அதனைக் கருத்தில் கொண்டு பட்ஜெட் அறிவிப்பில் இந்திய தொழில் வர்த்தக சங்கங்களின் சம்மேளனத்திற்கு முக்கியத்துவம் வழங்கப்படும் என்று அச்சமேளனத்தின் தலைவர் டான்ஶ்ரீ டாக்டர் கெ.கென்னத் ஈஸ்வரன் கருத்து தெரிவித்தார். 

சிறு மற்றும் நடுத்தர இந்திய குத்தகையாளர்களை நாட்டின் முக்கிய திட்டங்களில், குறிப்பாக இரயில் சேவை மற்றும் எம்.ஆர்.டி போன்ற பொதுப் போக்குவரத்து திட்டங்களில், ஈடுபடுத்த அரசாங்கம் முயற்சித்து வருவதாக அவர் சுட்டிக்காட்டினார். 

இத்தகைய பொதுப் போக்குவரத்து திட்டங்களில் ஈடுபடும் தகுதி மற்றும் தேவையான நிதி நிலைத்தன்மை இந்திய குத்தகையாளர்களுக்கு உண்டு என்று அவர் கூறினார். 

இதனிடையே, கடந்த 2017-ஆம் ஆண்டு தாக்கல் செய்யப்பட்ட பட்ஜெட்டில் 'சீட்' எனப்படும் இந்திய தொழில் முனைவர் நிதி திட்டத்தின் கீழ் இந்திய தொழில் முனைவர்களுக்கு 100 மில்லியன் ரிங்கிட்டை ஒதுக்கிய பிரதமருக்கு இவ்வேளையில் அவர் நன்றியைத் தெரிவித்துக் கொண்டார்.

 

 

 

 

 

 

 

 

 

 

 

 

 

 

 

 

 கோலாலம்பூர், அக்.24- மலேசியாவின் பொருளாதாரம் இவ்வாண்டு வளர்ச்சியை நோக்கி நகர்ந்து கொண்டிருப்பதாக மதிப்பீட்டு ஆய்வொன்றை வெளியிட்ட உலக வங்கி, நாட்டின் பொருளாதாரம் 5.2 விழுக்காடாக வளர்ச்சி அமையக்கூடும் என்று இரண்டாவது முறையாக மதிப்பீடு செய்துள்ளது. 

மலேசிய அரசாங்கம் மக்களின் நலனில் அக்கறைக் கொண்டு செயல்படுவதையே இது குறிக்கின்றது என்று பிரதமர் டத்தோஶ்ரீ நஜிப் தெரிவித்தார்.

பெட்ரோல் விலை உயர்வு மற்றும் ஐரோப்பிய நாடுகளில் ஏற்பட்ட பொருளாதார பின்னடைவால் சில நாடுகளின் வளர்ச்சி பாதிக்கப்பட்ட போதிலும், மலேசியாவின் பொருளாதாரம் வளர்ச்சிக் கண்டுள்ளது பெருமைக்குரிய விஷயமாகும் என்று 2018-ஆம் ஆண்டின் பட்ஜெட்  அறிவிப்பிற்கு முன் வெளியிடப்பட்டுள்ள தனது 80 அம்ச பொருளாதார தூரநோக்கத் திட்ட அறிக்கையில் அவர் கூறினார். 

2009-ஆம் ஆண்டு பிரதமராக பதவியேற்றப் பின்னர், நஜிப் பொருளாதார உருமாற்றத் திட்டத்தை அமல்படுத்தினார். அத்திட்டத்தின் கீழ் கொடுக்கப்பட்ட வாக்குறுதிகள் நிறைவேற்றப் பட்டதைத் தொடர்ந்து, நாட்டின் பொருளாதாரம் சீராக வளர்ச்சி அடைந்து வருகிறது. 

"2009-ஆம் ஆண்டு ஏப்ரல் மாதத்தில் பிரதமராக நான் பதவி ஏற்றேன். அப்போது உலக நாடுகள் 1930-ஆம் ஆண்டிலிருந்த பொருளாதார பின்னடைவைக் காட்டிலும், இக்கட்டான சூழ்நிலையில் பொருளாதாரம் தொய்வு கண்ட நிலையில் இருந்தது" என்று நஜிப் நினைவு கூர்ந்தார். 

"உலகப் வாணிபத்தை அடிப்படையாகக் கொண்ட மலேசியா, அந்த பொருளாதார பின்னடைவால் பெரும் பாதிப்புக்குள்ளாகியது. நம் ஏற்றுமதி 20 விழுக்காடு தொய்வு கண்டது. 2009-ஆம் ஆண்டின் முதல் காலாண்டுப் பொருளாதாரம் 6.2 விழுக்காடு வீழ்ச்சி கண்டது" என்றார் அவர். 

2009-ஆம் ஆண்டிலிருந்து 2016-ஆம் ஆண்டு வரை தேசிய ஒட்டுமொத்த உற்பத்தி வருமானம் கிட்டத்தட்ட 50 விழுக்காடு வரை அதிகரித்துள்ளது. 2.26 மில்லியன் வேலை வாய்ப்புகளும் இக்காலக் கட்டத்தில் உருவாக்கப்பட்டுள்ளன. 

கடந்த ஏழு வருடங்களில், மலேசியாவில் உருவாக்கப்பட்ட 2.26 மில்லியன் வேலை வாய்ப்புகளில், 1 மில்லியன் வேலை வாய்ப்புகள் அதிக வருமானத்தைத் தரக்கூடிய வேலை வாய்ப்புகளாகும். 

இதனிடையே, இவ்வருடம் மார்ச் மாதத்தில்மலேசியாவின் ஏற்றுமதி 82.63 பில்லியனாக உயர்வு கண்டுள்ளதாக நஜிப் தெரிவித்தார். இதுவே நாட்டின் மிக அதிகமாகப் பதிவு செய்யப்பட்ட மாதாந்திர ஏற்றுமதி உயர்வாகும் என்பது குறிப்பிடத்தக்கது. 

 கோலாலம்பூர்,அக்.2- உலகிலேயே 3ஆவது மிகப் பெரிய மோட்டார் சைக்கிள் தயாரிப்பாளர்களான இந்தியாவின் பஜாஜ் ஆட்டோ லிமிடெட் நிறுவனம் தனது தனது மோட்டார் தயாரிப்[பு தொழில் கூடத்தை மலேசியாவில் அமைக்கிறது.

தென்கிழக்காசியாவின் விற்பனைச் சந்தையை இலக்காக வைத்து ஊடுருவும் நோக்கில் கெடாவின் குரூணில் உள்ள தொழிற்சாலையில் மோட்டார் சைக்கிள்கள் பொருத்தும் திட்டம் மேற்கொள்ளப் படவிருப்பதாக அதன் அனைத்துலக வர்த்தகப் பிரிவின் தலைவர் ரகேஷ் சர்மா தெரிவித்தார்.

தொழிற்சாலையில் மோட்டார் சைக்கிள்களைப் பொருத்தும் பகுதியை உருவாக்கும் தொழில்நுட்பங்களை பஜாஜ் வழங்கும் பணியைத் திட்டம் ஏற்கெனவே தயார்நிலையில் இருக்கிறது என்று அவர் சொன்னார்.

இந்த வாகனங்கள் பொருத்தும் தளம், அடுத்த 6 மாதங்களுக்குள் தனது பணியைத் தொடங்கிவிடும். இங்குள்ள அந்தத் தொழிற்சாலை மலேசியாவின் டிஆர்பி-ஹைகோம் நிறுவனத்தின் ஒரு பிரிவான மோடெனாஸுக்கு சொந்தமானது. இதற்கான கூட்டு ஒப்பந்தத்தில் பஜாஜ் கையெழுத்திட்டுள்ளது என்று ரகேஷ் சர்மா தெரிவித்தார்.

இந்தியாவின் புனே நகரில் பாஜாஜ்-மோடெனாஸ் வினியோகஸ்தர்களுக்கான சந்திப்புக்குப் பிறகு செய்தியாளர்களிடம் ரகேஷ் சர்மா இதனைத் தெரிவித்தார்.

மோடேனாஸ் தொழிற்சாலையில் பஜாஜ் மோட்டார் சைக்கிள்கள் உற்பத்தி செய்யப்படும். மோடேனாஸ் எங்களின் உற்பத்தி மையமாக விளங்கும் என்றார் அவர். 

ஏற்கெனவே பஜாஜ் மோட்டார் சைக்கிள்கள் பிலிப்பைன்ஸ், கம்போடியா ஆகிய நாடுகளுக்குள் பிரவேசித்து விட்டது. அடுத்து தாய்லாந்து மற்றும் வியட்னாமிற்குள் ஊடுருவ திட்டமிடப்பட்டுள்ளது. மலேசியாவின் சிறந்த வர்த்தகச் சுற்றுச் சூழலே தங்களது பிராந்திய மையத்தை மலேசியாவில் அமைக்க முடிவெடுத்தற்குக் காரணம் என்று ரகேஷ் சர்மா விளக்கினார்.

 

 

 

 

  கோலாலம்பூர், ஜூலை.20- மலேசியாவில் கியா ரக வாகனங்களை விநியோகிக்கும் நாசா கியா மலேசியா செண்டிரியான் பெர்ஹாட் நிறுவனம், 2017-ஆம் ஆண்டில் 5,100 வாகனங்களை விற்பனை செய்ய இலக்கு கொண்டுள்ளது.

இவ்வாண்டின் முதல் பாதியிl, கியா கார்களின்விற்பனையில் புதிய உந்துதல் உருவாக்கியிருப்பதால் கடந்தாண்டைக் காட்டிலும் இந்நிறுவனம் சிறந்த அடைவு நிலையை எட்டும் என நாசா கார்ப்பரேஷன் ஹோல்டிங்ஸ் நிறுவனத்தின் வாகன குழுமத் தலைமை நிர்வாக அதிகாரி டத்தோ ஷாம்சன் ஆனந்த் ஜியார்ஜ் நம்பிக்கை தெரிவித்தார். 

கடந்த ஆண்டோடு ஒப்பிடுகையில், இவ்வாண்டின் முதல் பாதியில் கியா ரக கார்களின் விற்பனை 14.4 விழுக்காடு உயர்வு கண்டுள்ளது. ஆகையால், இவ்வாண்டு இறுதிக்குள் நிர்ணயிக்கப்பட்ட இலக்கை அடையமுடியும் என்று அவர் இன்று புதிய கியா ரியோ ரக வாகனத்தை அறிமுகப்படுத்திய போது கூறினார்.

இந்நிறுவனம் கடந்த ஆண்டு மொத்தம் 4,378 கியா ரக கார்களை விற்பனை செய்யப்பட்டுள்ளது என்பது குறிப்பிட்டத்தக்கது.

 

கோலாலம்பூர், ஜூலை.3- எதிர்வரும் 2020-ஆம் ஆண்டுக்குள் 1,200 கோடி ரிங்கிட் மதிப்புள்ள மரத் தளவாடப் பொருட்களை மலேசிய தளவாட உற்பத்தியாளர்கள் ஏற்றுமதி செய்வார்கள் என அரசாங்கம் நம்புகிறது. ரப்பர் மரக் கட்டைகளின் ஏற்றுமதிக்கு தடை விதிக்கப்பட்டிருக்கும் நிலையில் உள்ளூர் தளவாடப் பொருள்களின் தயாரிப்பு அதிகரிக்கும் என அரசாங்கம் எதிர்பார்க்கிறது.

ஜூலை 1 முதல் தேதியிலிருந்து மலேசியாவின் ரப்பர் மரக் கட்டைகளின் ஏற்றுமதிக்குத் தடை விதிதந்திருக்கும் காரணத்தினால் தற்போது தளவாடப் பொருட்களின் ஏற்றுமதி அதிகரிக்க வாய்ப்பு ஏற்பட்டிருப்பதாக தோட்டத் தொழில் மற்றும் மூலப் பொருள் துறை அமைச்சர் டத்தோஶ்ரீ மா சியூ கியோங் தெரிவித்தார்.

கடந்த ஆண்டு மலேசியாவில் 952 கோடி ரிங்கிட் தளவாடப் பொருட்கள் ஏற்றுமதி செய்யப்பட்டது. 2015ஆம் ஆண்டின் இடம்பெற்ற 914 கோடி ரிங்கிட் மதிப்புள்ள தளவாடப் பொருள்களின் ஏற்றுமதியை காட்டிலும் 4.2 விழுக்காடு அதிகமாகும்.

அதிகத் தளவாடப் பொருளின் உற்பத்தியில் உலகில் எட்டாவது இடத்தில் மலேசியா இருக்கிறது.

மலேசியாவில் ரப்பர் மர ஏற்றுமதிக்குத் தடை விதித்ததால், இனி தளவாடப் பொருட்கள் உற்பத்தியாளருக்கு நிறைய வாய்ப்புகள் அமையும் என எதிபார்க்கப்படுகிறது. 

இதன் மூலம் உற்பத்தியாளர்கள், தங்கள் வாடிக்கையாளர்களின் கோரிக்கைகளை எளிதில் நிறைவேற்றுவதோடு மலேசிய ஏற்றுமதியின் அளவையும் ளாத்கரிக்கும் வகையில் அமையும் என்று அவர் சொன்னார். 

 

 

 கோலாலம்பூர் ஜூன்,21- போட்டிகள் நிறைந்த வர்த்தக உலகில், ஒன்றை விட ஒன்று புதுமையாக இல்லாவிடில், சந்தையில் தோல்வி கண்டு விடுவோம்.  போட்டிகள் இல்லாத புதிய சந்தை உலகிற்கு செல்லும் வியூகம் மிக முக்கியம். அதற்கு உதவக்கூடிய யுக்திகளை வழங்கும் 'புளூ ஓசன் வியூகம்' இன்று உலகளவில் பரவியுள்ளது என்று தமிழகத்தின் முன்னோடி புதுமை வியூக தொழிபதிபர் அசோக் குமார் தெரிவித்தார்.

கற்றது கை மண் அளவு, கல்லாதது கடலளவு என்று சொல்வார்களே, அப்படி நாம் அறிந்திராத விதத்தில் புதுமை நோக்கில் சிந்திக்க வைப்பது தான் புளூ ஓசன் வியூகம் (Blue Ocean Strategy) திட்டம். 

இன்றைய இளைஞர்கள் கடிவாளம் போட்ட மாதிரி, ஒரு குறிப்பிட்ட மாதிரியான, ஒரு முன்கூட்டியே வரையறுக்கப்பட்ட ஒரு வாழ்க்கை வட்டத்திற்குள் சுழன்று கொண்டிருக்காமல், மாறுபட்டு சிந்திக்கவும் வாழ்க்கையை வடிவமைக்கவும் இந்த புளூ ஓசன் வியூக முறை கற்பிக்கிறது என்று தொழில் அதிபரும், சிந்தனையாளருமான அசோக்குமார் கூறுகிறார்.

மலேசியா உள்பட இன்றைக்கு உலக நாடுகள் பலவற்றை ஆக்கிரமித்து இருக்கும் இந்த புளூ ஓசன் வியூகக் முறை குறித்து தொழிலதிபர் அசோக் குமார், 'வணக்கம் மலேசியா'வுக்கு அளித்த காணொளிப் பேட்டி ஒன்றில் விளக்கினார்.

வாழ்க்கையில் சவால்கள் இல்லாமல் இருக்கமுடியாது. புதுமைகளை நோக்கி இன்றைய இளைய சமுதாயம் சிந்திக்க தங்களை தயார் படுத்திக் கொள்ளவேண்டும். அத்தகைய சிந்தனைகள் சாவால்களை வெல்ல நமக்கு உதவும் என்று அவர் வலியுறுத்தினார். இந்த 'புளூ ஓசன் வியூகத் திட்டம்' குறித்து அவரது பேட்டியை மேற்கண்ட காணொளியில் விரிவாக காணலாம்.   

கோலாலம்பூர், ஜூன்.-15- அஸ்ட்ரோ வரிக்கு பிந்திய இலாபமாக (PATAMI) 196 மில்லியன் ரிங்கிட் ஈட்டியுள்ளது. இலவச செயற்கைக்கோள் தொலைக்காட்சி சேவையான ‘என்ஜோய்’ வாடிக்கையாளர்களின் எண்ணிக்கை தொடர்ந்து வளர்ச்சி கண்டுள்ளது என்று அறிக்கை ஒன்று தெரிவித்தது.

“சவால்மிக்க இன்றைய பங்குச் சந்தையில் அஸ்ட்ரோ தொடர்ந்து நிலையான வருவாய் மற்றும் இலாப வளர்ச்சி எட்டுவதில் கவனம் செலுத்தி வந்துள்ளது என்று அஸ்ட்ரோ நிறுவனத்தின் தலைவர் துன் சாக்கி அஸ்மி கூறியுள்ளார். இதன் வழி,  இடைக்கால இலாப ஈவாக ஒவ்வொரு பங்குக்கும் 3 சென்கள் வழங்கப்படும் என்பதை இயக்குநர் வாரியம் பெருமனதுடன் அறிவிக்கின்றது என்று அவர் சொன்னார்.    

மேலும்  இது குரித்து அஸ்ட்ரோவின் தலைமை நிர்வாக அதிகாரி, டத்தோ ரோஹானா ரோஷன் கூறியதாவது:

மலேசியா மற்றும் பிராந்தியத்தில் வாடிக்கையாளர்களின் உறவை மேம்படுத்தி வளர்ப்பதை வருவதை அதிகரிக்கிறோம். டிஜிட்டல் தளங்களைப் பயன்படுத்துவதானது தனிநபர்களுக்கு சேவை செய்வதன் மூலம் எங்களின் செலவைக் குறைக்க உதவுகிறது. 

எங்களின் அஸ்ட்ரோ தொலைக்காட்சி சேவை மலேசியாவிலுள்ள 71% குடும்பங்களில் ஊடுருவியுள்ளது. அதாவது, 5.2 மில்லியன் வாடிக்கையாளர்களைக் கொண்டுள்ள அஸ்ட்ரோ, சுமார் 21 மில்லியன் பேருக்கு இச்சேவை வழங்கி வருகின்ற நிலையில் இவ்வாண்டு இறுதிக்குள் 75% வீட்டிற்குள் ஊடுருவி வருவதற்கான பாதையில் நாங்கள் இருக்கிறோம். 

எங்களின் அஸ்ட்ரோ வானொலி 15.6 மில்லியன் ரசிகர்கள் கொண்டு தொடர்ந்து முன்னிலை வகித்து மலேசியாவில் பிரபலமான வானொலி நிலையமாக விளங்குகின்றது. அதுமட்டுமின்றி, எங்களின் டிஜிட்டல் அகப் பக்கங்களை சுமார் 7.5 மில்லியன் பார்வையாளர்கள் ஈர்த்துள்ள அதை வேளையில் 66 மில்லியன் பேர் எங்களின் அகப்பக்கத்தைப் பார்வையிட்டுள்ளன. 

அஸ்ட்ரோவின் உள்நாட்டு தயாரிப்பில் வெளிவந்த நிகழ்ச்சிகள் அனைத்தும் அதிகமானவர்கள் கண்டு களித்துள்ளார்கள். அவ்வகையில், Maharaja Lawak Mega 2017 நிகழ்ச்சியை 4.9 மில்லியன் கண்டு களித்துள்ள அதை வேளையில், டிஜிட்டல் மற்றும் சமூக வளத்தளங்களின் வாயிலாக முறையே 28 மில்லியன் மற்றும் 58 மில்லியன் ரசிகர்களைக் கவர்ந்துள்ளது. 

எங்களின் பலத்தரப்பட்ட நிகழ்ச்சிகளை தொலைக்காட்சி பார்ப்பவர்களின் பங்கு 76% சதவிதத்தை எட்டியுள்ள வேளையில் தினந்தோறும் சராசரி 4 மணி நேரம் அஸ்ட்ரோவின் நிகழ்ச்சிகளைக் கண்டுக் களிக்கின்றனர். 

“நாம் இப்போது சவால்மிக்க ஒரு கட்டத்தில் செயல்பட்டுக் கொண்டிருக்கிறோம். 2018-ஆம் நிதியாண்டுக்கான முதல் காலாண்டில் நமது வருமானம் ஆண்டுக்கு ஆண்டு என்ற அடிப்படையில் மிதமான அளவிலேயே பதிவாகியுள்ளது. உரிம வருமான சரிவே அதற்கு காரணமாகும். எங்களது விளையாட்டு அலைவரிசைகளின் துணை உரிமம் அதற்கு வித்திட்டுள்ளது. 

எங்கள் வாடிக்கையாளர்களின் பங்கேற்பை மேலும் ஆழமாக்குவதிலும், விரிவாக்குவதிலும் நாங்கள் முன்னேற்றகரமான முயற்சிகளை மேற்கொண்டு வருகிறோம். எங்கள் செயலாக்கத்தின் முடிவிலும் அது வெளிப்படுகிறது. 

எங்கள் வாடிக்கையாளர்களின் வாழ்க்கை முறை தேர்வு டிஜிட்டல் மயமாகவும், கையடக்க முறையிலும், தனிப்பட்டதாகவும் வேகமாக மாறி வருகிறது. அவர்களுக்குச் சேவையளிக்க ஏதுவாக எங்களது மொத்த வர்த்தகத்தையும் நாங்கள் தீவிரமாக மறுசீரமைத்து வருகிறோம்.

மேற்கண்டவாறு அஸ்ட்ரோவின் தலைமை நிர்வாக அதிகாரி, டத்தோ ரோஹானா ரோஷன் குறிப்பிட்டார். 

 புத்ராஜெயா, மே.24- சீனாவைச் சேர்ந்த ஷிஜியாங் கீலி ஹோல்டிங்ஸ் நிறுவனம் மலேசியாவின் புரொட்டோன் ஹோல்டிங்ஸ் கார் நிறுவனத்தின் 49.9 விழுக்காடு பங்குகளை வாங்குகிறது என அறிவிக்கப்பட்டது.

இந்தப் பங்குகளை இதுவரை வைத்திருந்த டிஆர்பி-ஹைகோம் பெர்ஹாட் நிறுவனத்திடமிருந்து இப்போது சீன நிறுவனம் வாங்க முடிவு செய்துள்ளது.

அதேசமயத்தில், இந்த வர்த்தக இணக்கத்தின் ஒரு பகுதியாக, லோட்டஸ் கார் நிறுவனத்தின் ஒட்டுமொத்த பங்குகளையும் கீலி ஹோல்டிங்ஸ் நிறுவனமே வாங்கிக் கொள்ள முன்வந்துள்ளது.

நஷ்டத்தில் புரொட்டோன் நிறுவனம் இருந்து வந்த நிலையில் அதன் பங்குகளை கீலி ஹோல்டிங்ஸ் நிறுவனம் வாங்கி இருப்பதன் வழி புரொட்டோன் புது உந்துதலைப் பெறும் என்று எதிர்பார்க்கப்படுகிறது. கடந்த மார்ச் மாதத்தின் முடிவில் புரொட்டோன் கிட்டத்தட்ட 100 கோடி ரிங்கிட் வரையில் இழப்பை அடைந்திருந்தது என்பது குறிப்பிடத்தக்கது.

இந்தப் பங்கு விற்பனைக்கான உடன்பாடு காணப்பட்டிருக்கிறது. அடுத்த ஜூலை மாதம் இதற்கான உடன்பாடு திட்டவட்டமாக கையெழுத்தாகும் என்று டிஆர்பி-ஹைகோம் பெர்ஹாட் தெரிவித்தது.

 

 

 

 கோலாலம்பூர், ஏப்ரல்.21- பங்குச் சந்தை நிலவரம் தொடர்ந்து மேல்நோக்கிச் சென்று கொண்டிருக்கும் நிலை நீடிக்குமானால் தொழிலாளர் சேமநிதியான இபிஎப் வாரியம் தனது உறுப்பினர்களுக்கு வழங்கும் இலாப ஈவு இவ்வான்டில் கூடுதலாக அமைய வாய்ப்பு இருக்கிறது.

கடந்த இரண்டுகளாக, அதாவது 2015 மற்றும் 2016 ஆகிய இரு ஆண்டுகளிலும் குறைவான இலாப ஈவையே இபிஎப் வழங்கியது.  ஆனால், கடந்த 2014-ஆம் ஆண்டில் 6.75 விழுக்காடு வரை இலாப ஈவு வழங்கப்பட்டது என்பது குறிப்பிடத்தக்கது.

கடந்த 2 ஆண்டுகளாகவே பங்குச் சந்தையில் தரமான முதலீடுகளைச் செய்வதில் ஏற்பட்ட குறைபாடுகள் காரணமாக குறைந்த இலாப ஈவு வழங்கப்பட நேர்ந்தது.

ஆனால், இவ்வாண்டில் பங்குச் சந்தை நிலவரத்தில் நல்ல முன்னேற்றம் தென்படத்தொடங்கி விட்டது. இந்நிலை இவ்வாண்டு இறுதிவரை நீடிக்குமானால் இலாப ஈவை அதிகரிப்பதற்கு வாய்ப்பு உள்ளது என்று இபிஎபின் தலைமை நிர்வாகச் செயல் அதிகாரி டத்தோ ஷாரில் ரிட்ஸா ரிடுவான் சொன்னார்.

 

தோக்கியோ, ஏப்ரல்.12- உலகின் பிரசித்திபெற்ற மின்னியல் நிறுவனமான டொஷிபா, தன்னைத் தொடர்ந்து நிலைநிறுத்திக் கொள்ளமுடியாத இக்காட்டில் இருக்கிறது. நிறுவனத்தின் நிதிநிலை கணக்கறிக்கை இரண்டு முறை தள்ளி வைக்கப்பட்டிருக்கும் நிலையில் அதன் எதிர்காலம் கேள்விக்குறியாகி இருக்கிறது.

மின்னியல் சாதனங்கள் முதல் கட்டுமானத் தொழில்கள் வரை பரந்து காலூன்றி இருக்கும் டொஷிபா, உலகப் பெருநிறுவனங்களில் ஒன்றாக கருதப்பட்ட போதிலும், கடந்த ஏப்ரல் முதல் டிசம்பரை வரையில் அதற்கு ஏற்பட்டிருக்கும் நஷ்டம் 480 கோடி அமெரிக்க டாலராகும்.

இந்த இழப்பைக் காட்டும் கணக்கறிக்கைகள் சமர்ப்பிக்கப்படாமல் இருமுறை தள்ளி வைக்கப்பட்டிருக்கிறது. நிறுவனத்தின் கணக்குத் தணிக்கை அதிகாரிகள் இதை அங்கீகரிக்க மறுத்து வருவதே இதற்குக் காரணமாகும். 

இதன் விளைவாக, தோக்கியோ பங்குச் சந்தையிலிருந்து டொஷிபா நீக்கப்படும் ஆபத்தில் உள்ளது. இது குறித்துக் கருத்துரைத்த அதன் தலைவர் சட்டோஷி சுனாகாவா, தங்களது நிறுவனம் எதிர்நோக்கும் நிதி நெருக்கடிகளுக்காக முதலில் மன்னிப்புக் கேட்டுக்கொண்டார். அதேவேளையில் நிதி அறிக்கையை கணக்குத் தணிக்கையாளர்கள் அங்கீகரிக்காமல் இருப்பது பெரும் கவலையைத் தருகிறது என்றார்.

கடந்த 2015ஆம் ஆண்டு பல மூத்த நிர்வாகிகள் நிறுவனத்தை விலக நேர்ந்தது. கிட்டத்தட்ட 7 ஆண்டு காலத்திற்கு மேலாக நிறுவனத்தின் இலாபத்தை வேண்டுமென்றே உயர்த்திக் காட்டியது மீதான ஊழல் காரணமாக அவர்கள் விலகினார்கள்.

அதேபோன்ற நெருக்கடி ஒன்று இவ்வாண்டு ஜனவரியில் உருவானது. டொஷிபாவின் அமெரிக்கத் துணைநிறுவனமான வெஸ்ட்டிங் ஹவுஸ் நிறுவனம் நிதி நெருக்கடிக்கு உள்ளாகி மார்ச்சில் திவாலில் வைக்கப்பட்டது. இதனைத் சீரமைக்கும் பணிகள் நடந்து வருகின்றன.

டொஷிபாவின் கணினி சிப்ஸ் வர்த்தகப் பிரிவை தைவானின் மின்னியல் நிறுவனமான 'ஃபோக்ஸ்கோன்' வாங்கிக் கொள்ள முன்வந்துள்ளது. அதற்காக 270 கோடி டாலர் தரவும் அது தயாராகவுள்ளது என்றாலும் அந்த விற்பனை வருமானம் டொஷிபாவை தூக்கி நிறுத்தப் போதுமானது அல்ல என்றே கருதப்படுகிறது. 

 

கோலாலம்பூர், மார்ச்.24- தங்களின் வாங்கும் திறனுக்கு ஏற்ற விலைகளைக் கொண்ட வீடுகளை வாங்குவதில் மக்கள் எதிர்கொள்ளும் சிரமங்களுக்கு விடிவு வராது என்று தெரியவந்துள்ளது.

குறைந்த விலை வீடுகளின் கட்டுமானம் குறைவாக இருக்கிறது. இந்த ஆண்டில் இது இன்னும் மேலும் மோசமடையும் என்று பேங்க் நெகாராவின் நிதி நிலைத்தன்மை மற்றும் பணப் பட்டுவாடா முறை மீதான 201ந்ஆம் ஆண்டின் அறிக்கை கூறுகிறது.

மக்களின் வாங்கும் திறனுக்கு ஏற்ற மலிவான வீடுகள் உள்நாட்டு சொத்துடமைச் சந்தையில், போதுமான அளவில் இல்லை. சப்ளை குறைவாக இருக்கும் நிலையில் மக்களிடையே தேவை மிக அதிகமாகிக் கொண்ட போகிறது.

கடந்த 2012ஆம் ஆண்டிலிருந்தே மக்களின் வருமானநிலை அதிகரிக்கவில்லை. ஆனால் வீடுகளின் விலைகள், மக்களின் வருமான வரம்பையெல்லாம் மிஞ்சிச் சென்று கொண்டிருக்கிறது.

சராசரியாக வீட்டு விலைகள் பெரும்பாலான மலேசியர்களுக்கு எட்டாத அளவுக்குப் போய்க்கொண்டே இருக்கும். இதற்குக் காரணம், அத்தகைய வீடுகளின் சப்ளைக்கும் மக்களின் தேவைக்கும் இடையே நிலவும் இடைவெளியைச் சுட்டிக்காட்டலாம். மக்களின் எதிர்பார்ப்பும் வீடமைப்பாளர்களின் எதிர்பார்ப்பும் ஒன்றுக்கொன்று முரணாக உள்ளன.

2007-ஆம் ஆண்டு முதல் 2009-ஆம் ஆண்டுவரையில் மக்களின் தேவைக்கு அதிகமாகவே வாங்கும் திறன்கொண்ட வீடுகள் சந்தையில் இருந்தன. அதன் பின்னர் 2012ஆம் ஆண்டு முதல் 2014-ஆம் ஆண்டு வரையில் நிலைமை தலைகீழாகி, விலைகள் கண்ணை மூடிக்கொண்டு விண்ணைத் தொட்டன.

வாங்கும் திறன் கொண்ட வீடுகளின் சப்ளை குறைவினால் உருவான பாதிப்பு மிகவும் தீவிரமடைந்ததற்கு மற்றொரு முக்கிய காரணம், ஒவ்வொரு குடும்பத்திற்கும் உரிய குடும்ப வருமானம் மிகவும் மந்தகதியில் அதிகரித்ததுதான். அதாவது ஒரு குடும்பத்தின் வருமானம் என்பது 12 புள்ளி 4 விழுக்காடு அதிகரித்த வேளையில் வீட்டு விலை மட்டும் 17 புள்ளி 6 விழுக்காடாக அதிகரித்தது என்று பேங்க் நெகாரா அறிக்கைச் சுட்டிக்காட்டியுள்ளது.

 

 கோலாலம்பூர், மார்ச்.24- மலேசிய ரிங்கிட்டின் மதிப்பு வீழ்ச்சி அடைந்து இருப்பதால், அதன் வெளிநாட்டுக் கடன்களின் மதிப்பும் அதிகரித்து விட்டது. 2016ஆம் ஆண்டில் மலேசியாவின் ஒட்டுமொத்த வெளிநாட்டுக் கடன், கிட்டத்தட்ட 90 ஆயிரத்து 870 கோடி ரிங்கிட் என்று அறிவிக்கப்பட்டுள்ளது.

மலேசியாவின் உள்நாட்டு உற்பத்தி மதிப்பீட்டில் 73 புள்ளி 9 விழுக்காட்டுக்கு இணையானது இந்தக் கடன் தொகை என்று பேங்க் நெகாரா தெரிவித்தது.

இந்தக் கடன் தொகையில், கிட்டத்தட்ட மூன்றில் இரண்டு பங்கு அன்னிய கரன்சியில் செலுத்தப்படவேண்டிய கடன்கள். ரிங்கிட் வீழ்ச்சியினால் ஏற்பட்ட வெளிநாட்டுக் கடன் மதிப்பு அதிகரிப்புக்கு அப்பாற்பட்டு, இம்முறை 6 புள்ளி 2 விழுக்காடு வரையிலான வெளிநாட்டுக் கடன் புதிதாக அதிகரித்துள்ளது என்று பேங்க் நெகாரா குறிப்பிட்டது.

மலேசியாவின் வெளிநாட்டுக் கடன்களைத் திருப்பிச் செலுத்துவற்கான தவணைப் பணம், அதற்கான வட்டி மற்றும் சேவைக் கட்டணம் ஆகியவற்றின் அடிப்படையில் பார்க்கும் போது கடந்த ஆண்டில் மலேசியாவுக்குக் கிடைத்த ஏற்றுமதி வருமானத்தில் 25 விழுக்காடு வெளிநாட்டுக் கடன்களை அடைக்கவே சரியாக இருக்கும்.

மலேசியாவின் இந்தக் கடன் தொகை என்பது நம்மால் சமாளிக்கக்கூடிய ஒன்றுதான். குறிப்பாக, நாம் செலுத்தவேண்டிய வெளிநாட்டுக் கடன்களில் முக்கால்வாசி ரிங்கிட்டில் செலுத்தப்படவேண்டிய கடன்கள் என்பதால் நம்மால் சமாளிக்க முடியும் என்று பேங்க் நெகாரா கூறியுள்ளது.

Advertisement